އިޒްރޭލުން ގާޒާގައި ހިންގަމުން ގެންދިޔަ ލާއިންސާނީ ހަނގުރާމަ ހުއްޓާލަން އިޒްރޭލާއި ހަމާސް ޖަމާއަތުން އެއްބަސްވެފައިވާއިރު، އިޒްރޭލުން ފަލަސްތީނަަށް ބަދަލު ދޭން ޖެހޭނެ ކަމަށް ރައީސް މުހައްމަދު މުއިއްޒު ރޭ ވިދާޅުވެއްޖެ އެވެ.
ވީ ކިހިނެއް؟ - 15 މަސްދުވަހަށް ވަރު ދިގު މުއްދަތަކަށް ދެމިގެންދިޔަ ގާޒާގެ ހަނގުރާމަ ހުއްޓާލަން އެއްބަސްވިކަން، އިޒްރޭލާ ގުޅިފައިވާ އެމެރިކާ އާއި ހަމާސް ޖަމާއަތުން ވެސް ރޭ ވަނީ އިއުލާންކޮށްފަ އެވެ. އޮކްޓޯބަރު 2023ގައި ފެށި މި ހަނގުރާމައިގައި ފަލަސްތީނުގެ 46،000އަށް ވުރެ ގިނަ މީހުން ވަނީ މަރުވެފަ އެވެ.
ބުނީ ކީކޭ؟ - އެ އެއްބަސްވުން އިއުލާނުކުރުމާ އެކު ރައީސް 'އެކްސް'ގައި ކުރެއްވި ޕޯސްޓެއްގައި ވިދާޅުވީ ނަސްލު ނައްތާލުމުގެ ހަނގުރާމަ ހުއްޓާލުމުގެ އެއްބަސްވުމަކަށް އާދެވުމަކީ ލިބިވަޑައިގެންނެވި ލުޔެއް ކަމަށެވެ.
އެއާ އެކު، ރައީސް ބައިނަލްއަގުވާމީ މުޖުތަމައަށް ގޮވާލެއްވީ:
ހަނގުރާމަ ހުއްޓާލުން ދެމެެހެއްޓޭނެ ގޮތް ހެދުމަށް 
ގެދޮރު ގެއްލިފައިވާ މީހުންނަށް އެނބުރި ގައުމަށް ދިއުމުގެ ފުރުސަތު ދިނުމަށް 
އިންސާނީ އެހީތެރިކަން ލިބޭނެ ގޮތް ހެދުމަށް
އިޒްރޭލުގެ އަނިޔާވެރިކަމުގެ ސަބަބުން ފަލަސްތީނަށް ލިބިފައިވާ ގެއްލުންތަކުން އަރައިގަތުމަށް، ފަލަސްތީނު އަލުން ބިނާކުރުމަށް ބޭނުންވާ އަވަސް އެހީތެރިކަން ފޯރުކޮށްދިނުމަށް
"އަޅުގަނޑުމެން ގޮވާލަން، އިޒްރޭލުން ފަލަސްތީނަށް ބަދަލު ދިނުމަށް،" ހަނގުރާމަ ހުއްޓާލުމުގެ އެއްބަސްވުމަށް މަގުފަހިކޮށްދިން ގައުމުތަކަށް ޝުކުރު އަދާކުރެއްވި ރައީސްގެ ޕޯސްޓުގައި ލިޔުއްވާފައިވެ އެވެ.
އެނގުން މުހިންމު - މި އެއްބަސްވުމުގައި ހިމެނެނީ މައިގަނޑު ތިން މަރުހަލާއެކެވެ. 
ފުރަތަމަ މަރުހަލާ
ފުރަތަމަ މަރުހަލާ ހިނގާނީ 6 ހަފްތާއަށް؛ މި މަރުހަލާގައި ހައްޔަރުކޮށްފައިވާ މަދަނީން ދޫކޮށްލުމާއި ގާޒާއިން އިޒްރޭލު ސިފައިން އެއްކޮށް ފައިބައި އިންސާނީ އެހީތެރިކަން އިތުރުކުރެވޭނެ
7 އޮކްޓޯބަރު 2023ގައި ހަމާސްއިން އިޒްރޭލަށް ދިން ހަމަލާގައި ހިފަހައްޓާފައިވާ 33 މަދަނީން ދޫކޮށްލާނެ؛ މީގެ ތެރޭގައި އަންހެނުންނާއި ކުޑަކުދިންނާއި 50 އަހަރުން މަތީގެ މީހުން ހިމެނޭ. މީގެ ބަދަލުގައި އިޒްރޭލުން ފަލަސްތީނުގެ 2،000 މީހުން ޖަލު ބަންދުން ދޫކޮށްލާނެ؛ މީގެ ތެރޭގައި އުމުރަށް ޖަލަށްލާފައިވާ 250 މީހުންނާއި 7 އޮކްޓޯބަރުން ފެށިގެން ހައްޔަރުކޮށްފައިވާ 1،000 މީހުން ހިމެނޭ
މަދަނީން ދޫކޮށްލުމާ އެކު، އިޒްރޭލު ސިފައިން ގާޒާއިން ފައިބައި އިޒްރޭލުގެ ބޯޑަރުން 700 މީޓަރު ދުރަށް ދާނެ؛ ނަމަވެސް ނެޓްޒަރިމް ކޮރިޑޯއިން ސިފައިން ފޭބުން އެހެން މަރުހަލާތަކަކަށް ބަހާލެވިދާނެ
އެހީގެ ގޮތުގައި ދުވާލަކު 600 ޓްރަކުގެ މުދާ ގާޒާއަށް ވެއްދޭނެ؛ ހަނގުރާމައިގެ ސަބަބުން ގެދޮރު ދޫކޮށް ދިޔަ މީހުންނަށް އެނބުރި އުތުރު ސަރަހައްދުތަކަށް ދިއުމާ އެކު، ޒަހަމްވެފައިވާ ފަލަސްތީނު މީހުން ބޭރު ގައުމުތަކުން ފަރުވާ ހޯދުމުގެ ފުރުސަތު ދެވޭނެ
ފުރަތަމަ މަރުހަލާ ފެށޭތާ 7 ދުވަހުގެ ތެރޭގައި މިސްރާއި ދެމެދު އޮންނަ ރަފާ ބޯޑަރު ހުޅުވާނެ؛ މިސްރާއި ގާޒާއާ ދެމެދު އޮންނަ ފިލަޑެލްފިއާ ކޮރިޑޯއިން އިޒްްރޭލު ސިފައިން މަދުކޮށް، ފަހުގެ މަރުހަލާއެއްގައި އެއްކޮށް ފައިބާނެ
ފުރަތަމަ މަރުހަލާއަށް ފަހު
ދެވަނަ އަދި ތިންވަނަ މަރުހަލާގެ ތަފްސީލުތައް ވަނީ ނިންމާފައި؛ ނަމަވެސް މި މަރުހަލާތަކުގެ މަޝްވަރާތައް ކުރިއަށްދާނީ ފުރަތަމަ މަރުހަލާގެ ތެރޭގައި
ފުރަތަމަ މަރުހަލާގައި ދޫކުރެވޭ މަދަނީން ދޫކުރުމަށް ފަހު، އިޒްރޭލުން އަލުން ހަމަލާތައް ފަށާނެކަމުގެ ޔަގީންކަން ނުދިނުމަށް އިޒްރޭލުން ވަނީ އިންކާރުކޮށްފައި
ނަމަވެސް އެސޯސިއޭޓެޑް ޕްރެސްއިން ބުނާ ގޮތުގައި، މަޝްވަރާތަކުގައި ބައިވެރިވާ ތިން ފަރާތް ކަމުގައިވާ މިސްރު، ގަތަރު އަދި އެމެރިކާއިން ވަނީ މަޝްވަރާތައް ކުރިއަށްދާނެކަމުގެ ޔަގީންކަން ހަމާސްއަށް އަނގަބަހުން ދީފައި؛ ހަ ހަފްތާގެ މުއްދަތު ހަމަވުމުގެ ކުރިން ދެވަނަ އަދި ތިންވަނަ މަރުހަލާ ތަންފީޒުކުރުމަށް މަސައްކަތްކުރާނެ
ދެވަނަ މަރުހަލާ
ދެވަނަ މަރުހަލާއަށް އިޒްރޭލުން ނިންމައިފި ނަމަ، ހަމާސްއިން ބާކީ ތިބި ހައްޔަރުކުރެވިފައިވާ މީހުން ދޫކޮށްލާނެ؛ މީގެ ތެރޭގައި ގިނައީ ފިރިހެން ސިފައިން. މީގެ ބަދަލުގައި އިޒްރޭލުން އިތުރު ފަލަސްތީނު މީހުން ޖަލު ބަންދުން ދޫކޮށްލާނެ އަދި އިޒްރޭލުން ގާޒާއިން އެއްކޮށް ފައިބާނެ
ނަމަވެސް މި ޝަރުތުތަކާ މެދު އިޒްރޭލުގެ ކެބިނެޓުން އަދި ވޯޓުލާފައެއް ނުވޭ؛ މި ޝަރުތުތަކަކީ އިޒްރޭލުގެ ބޮޑުވަޒީރު ބެންޖަމިން ނަތަންޔާހޫގެ ސަރުކާރުގައި ހިމެނޭ ހަރުކަށި ވިސްނުމުގެ މެމްބަރުން ބޭނުންވާ ގޮތާ ހިލާފު ޝަރުތުތަކެއް
ތިންވަނަ މަރުހަލާ
ތިންވަނަ މަރުހަލާގެ ތަފްސީލުތައް އަދި ސާފެއް ނޫން