އަތްމަތި ތަނަވަސް ގިނަ މީހުންގެ ދިރިއުޅުމަށް ބަލާށެވެ! އެމީހުންގެ ދަރިންގެ ކަންކަމަށްވެސް ސަމާލުކަންދެވިފައިވާނީ ނިޞްބަތުން މަދު ބައަކަށެވެ. ގިނަވާނީ ދަރިން ކުރާ ކަންކަން ބަލައިލާނެ ވަޤުތުނުވާ، އަދި ދަރިން ތަރުބިއްޔަތުކުރަން ކުރަންޖެހޭ ކަންކަން ނުކުރެވޭ މީހުންނެވެ.  
ނަތީޖާއަކީ ކޮބައިހެއްޔެވެ؟ މުސްކުޅިވާ ދުވަހު ތިމާ ހިމެނިގެންދަނީ އަބަދު ދެރަވެ ހިތާމަކުރަންޖެހޭ މީހުންގެ ތެރެއިންނެވެ. އެއީ މީހަކަށް ލިބޭނެ އެންމެ ބޮޑު އެއް ދެރައެވެ. އެންމެ ބޮޑު އެއް ހިތާމައެވެ.  
އެއިގެ ބަދަލުގައި ލިބޭ ދަރިން ރަނގަޅު ގޮތުގަ ތަރުބިއްޔަތުކުރެވިއްޖެނަމަ އެކަމުން ލިބޭނެ އެންމެ ބޮޑު ހިތްހަމަޖެހުމަކީ މުސްކުޅި ޢުމުރުގައި ހަމަޖެހިލައިގެން އުޅެވުމެވެ. ތިމާއަކީ ދަރިންނަށްޓަކައި ފަޚުރުވެރިވެވޭނެ މަންމައަކަށް ނުވަތަ ބައްޕައަކަށް ވެވުމަށްވުރެ ބޮޑު ހިތްހަމަޖެހުމެއް، އުފާވެރިކަމެއް ނެތެވެ.  
ވީމާ ކައިވެނިކުރާއިރު ބަލަންވީ ތަނަވަސްކަމަކަށް ނޫނެވެ. ޙަޤީޤީ ހިތްހަމަޖެހުމާއި އުފާވެރިކަން ލިބޭނެ ގޮތަކަށެވެ. އެކަން ގުޅިފައިވަނީ ތަނަވަސްކަމަކާއިއެއް ނޫނެވެ. ރިވެތި އަޚްލާޤާއި ތަޤްވާވެރިކަމާއިއެވެ. ވީމާ ޒަވާޖީ ޙަޔާތެއް ފަށަންވާނީ ތިމާއަށް ޙަޤީޤީ ހިތްހަމަޖެހުމާއި އުފާވެރިކަން ލިބޭނެ މަގުންނެވެ. ދުނިޔެވެސް އަދި ޢާޚިރަތްވެސް އުފާވެރިކުރެވޭނީ އެއިރުންނެވެ!  
- އިސްލާމީ ތިލަފަތުގެ ދަރުސަކުން