ކޮންމެ ފިލްމަކީ ވެސް އެ ފިލްމަކަށް ހާއްސަ ސިފަތަކެއް ލިބިދީފައިވާ އުފެއްދުމެކެވެ. ފިލްމުތައް މި އަންނަނީ އެކި ގައުމުތަކުން އެކި މީހުންގެ ހިޔާލުތަކުން މުއްސަނދިވެގެންނެވެ. އެކި މީހުން އެކި މިންވަރަށް އޭގައި ބައިވެރިވެގެން ވަކި ކުލަތަކެއް ވަކި ސިފަތަކެއް އޭގައި ޖެހިގެންނެވެ. މި ގޮތަށް އަންނަ ފިލްމެއް ބަލާލުމުން އެއީ ކާކުގެ ކޮން ވައްތަރެއްގެ ކޮން ގައުމެއްގެ ފިލްމެއްކަން ވަރަށް ފަސޭހައިން ދެނެގަނެވެ އެވެ. ފިލްމުތައް މި ވަނީ މި އެއްޗެހި އުފައްދާ ގައުމުތަކުގެ ވަރަށް ބޮޑު އައިޑެންޓްޓީ އަކަށެވެ.
އެގޮތުން މި އުފެއްދުންތަކަށް ވަކި ކޮލިޓީއެއް ނުވަތަ މި އުފެއްދުންތައް ވަކި އުސޫލުތަކެއްގައި ހިފެހެއްޓުމަށް މި ގައުމުތަކުގެ ރަސްމީ ފަރާތްތަކުން ފިލްމު އުފައްދާ މީހުންނަށް އެއްބާރުލުންދީ އެކަމަށް މަސައްކަތްކުރާކަން ފާހަގަކޮށްލެވެ އެވެ. ގިނަ ގައުމުތަކުގެ ފިލްމުތައް މި އަންނަނީ މި އުސޫލުގެ ދަށުން ވަކި ގޮތަކަށް އެތުރިގެންނެވެ. މިސާލަކަށް ހޮލީވުޑްގެ ފިލްމުތަކުގައި ވެސް ވަކި ކޮލިޓީއެއް ހިފެހެއްޓުމަށް ހަރުކަށި އުސޫލުތަކެއް އެކުލަވާލާފައި އެބަހުއްޓެވެ. އެ މީހުންގެ ފިލްމުތަކަކީ އެމެރިކާގެ ޝަރަފާއި ބާރުވެރިކަން ވިއްކާ ފިލްމުތަކެކެވެ.
އެހެންވީމަ، އެކި ގައުމުތަކުން އުފައްދާ ފިލްމުތަކުގައި ޖެހިފައި މި ހުންނަނީ އެކި ކުލަތަކެވެ. މި ފިލްމުތަކުން ކޮންމެ ގައުމަކަށް ވެސް ވަކި ކޮލިޓީއެއް ވަކި އައިޑެންޓްޓީއެއް އެބަލިބެ އެވެ.
ދެން މި އޮތީ ދިވެހި ފިލްމީ ދާއިރާގެ ވާހަކަ އެވެ. ދުނިޔޭގެ އެހެން ސިނަމާތަކަށް ބަލާއިރު އަދި އެމީހުން ތަބާވާ ކަންތައްތަކަށް ބަލާއިރު ދިވެހި ސިނަމާގައި ހަގީގަތުގައި މިއިން އެއްވެސް ކަމެއް ނެތެވެ. ކޮލިޓީއެއް ނެތްއިރު އަހަރެމެންގެ ވަކި އައިޑެންޓްޓީއެއް ވެސް ހަގީގަތުގައި ނެތެވެ. އެހެންވީމަ ސިނަމާއެއްގެ ގޮތުގައި އެސްޓަބްލިޝްވާން ބޭނުން ނަމަ އަހަރެމެން ވަކި ވައްތަރެއް އަދި ވަކި ކޮލިޓީއަކަށް ތަބާވުން ވަރަށް މުހިންމެވެ.
މިސާލަކަށް ދިވެހި ފިލްމުގެ ކޮލިޓީ ރަނގަޅުކުރަން ވަކި އުސޫލުތަކެއް ވެސް ކަނޑައެޅިދާނެ އެވެ. އަދި މި އުސޫލުތަކަށް ތަބާ ނުވެ އުފައްދާ ފިލްމުތައް ދިވެހި ފިލްމުތަކުގެ ގޮތުގައި ބަލައިނުގަންނަ ގަވާއިދެއް ވެސް ތައާރަފްކުރެވިދާނެ އެވެ. މި ދައްކަނީ، ވަކި ކޮލިޓީއަކަށް ނުފެތެންޏާ އެ ފިލްމެއް ދިވެހި ފިލްމަކަށް ނުވާ ވާހަކަ އެވެ.
މިއީ ދުނިޔޭގެ އެހެން ގައުމުތަކުގައި ވެސް ކުރާ ކަމެކެވެ. މިސާލަކަށް އިނގިރޭސި ވިލާތުގެ ފިލްމަކަށް ފިލްމެއްވުމަށް އެ ފިލްމަކަށް ވަކި ކޮލިޓީއެއް ބޭނުންވެ އެވެ. ހާއްސަ މިންގަނޑަކުން ކިރާލުމުން ވަކި ވަރަށް ޕޮއިންޓް ލިބެން ޖެހެ އެވެ. ވަކި ކްރައިޓީރިއާތަކެއް މި ހުންނަނީ ކަނޑައަޅައިފަ އެވެ. އެހެންވީމަ މިފަދަ ކްރައިޓީރިއާތަކެއް ދިވެހި ސިނަމާއަށް ތައާރަފްކޮށްގެން މި ސިނަމާގެ އުފެއްދުންތަކުގެ ފެންވަރު މިހާރަށް ވުރެ ރަނގަޅުކުރެވިދާނެކަމާ މެދަކު ސުވާލެއް ވެސް ނުއުފެދެ އެވެ.
ފިލްމު އުފެއްދުމަށް ވަކި އުސޫލުތަކެއް ނުވަތަ ވަކި ކޮލިޓީތަކެއް މަޖުބޫރުކުރަން އަހަރެމެންނަށް ބޭނުންވަނީ މި ސަބަބުތަކާ ހެދި އެވެ. އެކަން ވެގެންދާނީ އުފެއްދުންތެރިކަމަށް ދެވޭ އެއްބާރުލުމަކަށެވެ.
މިހާރު އަޅުގަނޑުމެންގެ ތެރޭގައި މި ހަދަނީ ޖުމްލަކޮށް ދެ ތިން ވައްތަރެއްގެ ފިލްމެވެ. އެއީ "ނަހޫ ސްޓައިލް" އާއި "އަމްޖޭ" އަދި "މޫމިން ފުއާދު" ގެ ސްޓައިލެވެ. މީގެ ތެރޭގައި، ފެންވަރުގެ ގޮތުން ބަލާއިރު ފިލްމެއްގެ ގޮތުގައި ފާސްނުވާނެ ފިލްމުތައް ވެސް އެބަހުއްޓެވެ. އަދި ކަނޑައެޅިގެން މި ދާއިރާގެ ހިތްމަރުވާ ގޮތަށް ނުވަތަ މި ދާއިރާ ދެކެ މީހުން ފޫހިކުރުވާ ގޮތަށް އުފައްދާފައިވާ ފިލްމުތަކެއް ވެސް އެބަހުއްޓެވެ.
ވަކި ސިފަތަކަކަށް ތަބާނުވުމުގެ ސަބަބުން ދިވެހި ފިލްމީ ދާއިރާ މި އޮތީ ހަގީގަތުގައި ވެސް ވަރަށް ފުން ވަޅުގަނޑަކަށް ވެއްޓިފަ އެވެ. ދާއިރާ އަށް އޮތް އިތުބާރު ގެއްލި މި ތަނުގައި ތިބި ފަންނުވެރި މީހުންގެ މަސައްކަތް ބަޔަކު ބަލައިނުގަތުގެ އަސްލު ވެސް ގުޅިފައި އޮތީ މިކަމާ އެވެ. ފިލްމު ބަލަން އޮތް އަސްލު އޯޑިއެންސްގެ އެއްވެސް އިތުބާރެއް ދިވެހި ފިލްމީ ދާއިރާއަކަށް ނެތެވެ. ދިވެހި ފިލްމީ ދާއިރާ އިން ފެންވަރު ރަނގަޅު ފިލްމެއް އުފައްދަފާނެ ކަމަށް ގިނަ ދިވެހިން މިހާރު ގަބޫލެއް ވެސް ނުކުރެ އެވެ.
އެހެންވީމަ މި ތަނުގެ ހާލަތު މި އޮތީ، ނަން ވެސް ބަދަލުކުރަން ޖެހޭ ހިސާބަށް ވެއްޓިފަ އެވެ. ދިވެހި ފިލްމެކޭ ބުނާ ހިސާބުން އެންމެން ވެސް ފިލަނީ އެވެ. ނުވަތަ އެ ފިލްމެއް ބަލަން ލަދު ވެސް ގަންނަނީ އެވެ. އަޅުގަނޑު މި ދަނީ ނަހުލާގެ ފިލްމަކަށޭ ބުނެފި ނަމަ އެ އަޑު އިވޭ އެކުވެރިޔާ ކުރަނީ މަލާމާތެވެ.