ސްޓޭޓު ޓްރޭޑިން އޯގަނައިޒޭޝަން (އެސްޓީއޯ) ގެ މެނޭޖިން ޑިރެކްޓަރު ޝިމާދު އިބްރާހިމް އިސްތިއުފާ ދެއްވައިފި ކަމަށް ބުނެ ފެތުރޭ ވާހަކަތައް އެ ކުންފުނިން ދޮގުކޮށްފިއެވެ.
ރައީސް އޮފީހުން އެފްއެސްއެމްގެ ބޯޑު ބަދަލުކުރަން އެންގުމާ ގުޅިގެން އެކަމާ އެއްބަސް ނުވެ އުފެދުނު ދެބަސްވުންތަކަކާ ގުޅިގެން ޝިމާދު އެސްޓީއޯގެ އެމްޑީކަމުން އިސްތިއުފާ ދެއްވާފައިވާ ކަމަށް އަންނަނީ އަޑު ފެތުރެމުންނެވެ. އެފްއެސްއެމް އަކީ އެސްޓީއޯގެ ސަބްސިޑިއަރީއެކެވެ.
މިކަމާ ގުޅިގެން 'ދަ ޕްރެސް' އަށް މައުލޫމާތު ދެމުން އެސްޓީއޯގެ މީޑިއާ އޮފިޝަލް ވަނީ ޝިމާދު އިސްތިއުފާ ނުދެއްވާ ކަން ކަށަވަރު ކޮށްދެއްވާފައެވެ.
އެފްއެސްއެމްއާ ގުޅިގެން ފެތުރެމުން ދަނީ އެ ކުންފުނީގެ މުވައްޒަފުންތަކެއް ތެލުން ވައްކަންކޮށް، އެއިން ލިބޭ ފައިސާ ލޯންޑާކުރާ މައްސަލައެކެވެ. އެގޮތުން ހޯމް މިނިސްޓަރު އަލީ އިހުސާން ވިދާޅުވެފައި ވަނީ، މި މައްސަލައިގައި 10 މީހަކާއި ދެ ގެއަކާއި ދެ ބާޖެއް ބަލައި ފާސްކޮށްފައިވާ ކަމަށެވެ. މި މައްސަލައާ ގުޅުންހުރި ލިޔެކިއުންތަކާއި އިލެކްޓްރޯނިކް ވަސީލަތްތައް ހޯދާފައިވާ ކަމަށް ވެސް ހޯމް މިނިސްޓަރު ވަނީ ވިދާޅުވެފައެވެ.
އެސްޓީއޯގެ އެމްޑީގެ މަގާމަށް ޝިމާދު އައްޔަން ކޮށްފައި ވަނީ ނޮވެމްބަރު 28، 2023 ގައެވެ.
ޝިމާދަކީ މަލްޓިލޭޓަރަލް އަދި ކޮމާޝަލް ފައިނޭންޝަލް އިންސްޓިޓިއުޝަން ތަކުގެ އިތުރުން ބޭންކް ތަކުގައި 15 އަހަރަށް ވުރެ ގިނަ ދުވަހު މަސައްކަތް ކޮށް ތަޖުރިބާ ހާސިލް ކުރައްވާފައިވާ ބޭފުޅެކެވެ. އަދި ހަމައެހެންމެ އޭނާ ވަނީ ސަރުކާރު ހިއްސާވާ ކުންފުނިތަކުގެ އިތުރުން އަމިއްލަ ކުންފުނިތަކުގެ ބޯޑުތަކުގައި މަސައްކަތް ކުރައްވާފައިވެއެވެ. މީގެ އިތުރުންވެސް ވިލާ ގްރޫޕްގައި ހެޑް އޮފް ފައިނޭންސް އެންޑް ޓެކްސްގެ މަގާމުވެސް އޭނާ ފުރުއްވާފައެވެ.
ޝިމާދު ވަނީ މެލޭޝިޔާގެ އިންޓަނޭޝަނަލް އިސްލާމިކް ޔުނިވާސިޓީން ބެޗެލާ އޮފް އެކައުންޓިން ހާސިލް ކުރައްވާފައެވެ. އަދި މެނޭޖްމެންޓް އެންޑް އެކައުންޓިންގެ ދާއިރާއިން އޭނާ ވަނީ އެޑްވާންސްޑް ޑިޕްލޮމާ ހާސިލް ކުރައްވާފައެވެ.