ފެނަކަ ކޯޕަރޭޝަނުގެ ކުރީގެ މެނޭޖިން ޑިރެކްޓަރު އަހުމަދު ސައީދާއި އިތުރު ވެރިއެއްގެ މައްޗަށް ކޮރަޕްޝަނުގެ ތުހުމަތުކޮށް، ދައުވާ ކުރުމަށް ކްރިމިނަލް ކޯޓަށް މިއަދު ފޮނުވައިފި އެވެ.ސައީދުގެ އިތުރުން، އެތަނުގެ ޕްރޮކިއުމަންޓް ހެޑް، މަރިޔަމް ދީނާ ސޯލިހުގެ މައްޗަށް ކުރަނީ މާކެޓިން، ޕަބްލިކް ރިލޭޝަންސް އަދި ބިޒްނަސް މެނޭޖްމެންޓް ކުންފުންޏެއް ކަމަށްވާ، ބްލޭޒަން އިންކަށް ނާޖާއިޒް ފައިދާ ހޯދައިދިނުމުގެ ތުހުމަތެވެ.ޕްރޮސެކިއުޓާ ޖެނެރަލް (ޕީޖީ)ގެ އޮފީހުން މިއަދު ބުނީ، ދެ މީހުންގެ މައްޗަށް ވެސް އުފުލާފައިވަނީ ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ކުށުގެ ދައުވާ ކަމަށެވެ. އެ ކުށުގެ އަސާސީ އަދަބަކީ އެއް އަހަރާއި ހަތް މަހާއި ހަ ދުވަހުގެ ޖަލު ހުކުމެކެވެ.އެ މުއާމަލާތާ ގުޅިގެން ފެނަކައަށް 848,000 ރުފިޔާގެ ގެއްލުންވި ކަމަށް ދައުވާގައި ބުނެފައިވެއެވެ.މިދިޔަ ސަރުކާރުގައި އެންމެ ގިނަ ކޮރަޕްޝަންގެ ތުހުމަތުކުރެވުނު ސަރުކާރު ކުންފުންޏަކީ ފެނަކައެވެ. އެކަމަކު، އޭރު ފެނަކައިގެ މެނޭޖިން ޑިރެކްޓަރަކަށް ހުންނެވި ސައީދު އަންނަނީ އެ ތުހުމަތުތައް އިންކާރުކުރަމުންނެވެ.ފާހަގަކޮށްލެވޭ ގޮތުގައި އެންޓި ކޮރަޕްޝަން ކޮމިޝަން (އޭސީސީ)ން ބަލަމުން އަންނަ މައްސަލައަކާ ގުޅިގެން މިދިޔަ އޮކްޓޫބަރު މަސް ތެރޭގައި ވަނީ އޭނާގެ ޕާސްޕޯޓު ވެސް ހިފަހައްޓާފައެވެ. ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގައި ސައީދު ފެނަކަ ހިންގެވިއިރު ހިޔާނާތުގެ ވަރަށް ބޮޑެތި ތުހުމަތުތައް އެ ކުންފުންޏަށް އަމާޒުވި އެވެ. އަދި ވަކި ބަޔަކަށް ނާޖާއިޒު މަންފާ ލިބޭ ގޮތަށް ޕްރޮޖެކްޓް ހަވާލުކުރުން ފަދަ ކޮރަޕްޝަންގެ ގިނަ މައްސަލަތަކެއް އޭސީސީއަށް އޭރު ހުށަހެޅި އެވެ.އެކަމަކު އެ މައްސަލަތައް ތަހުގީގުކޮށް އެކަށީގެންވާ ފިޔަވަޅެއް އޭސީސީން އޭރު އަޅާފައެއް ނުވެ އެވެ.