މިނިވަން މީޑިއާ ނެތިކޮށްލަން ރައްޔިތުންގެ މަޖިލީހަށް މިހާރު ހުށަހަޅާފައިވާ ބިލުގެ ބަހުސް މިއަދަށް ނިންމާލީ ކަމަށް އިއުލާން ކުރުމަށް ފަހު އެ ބިލު ބަހުސް އަލުން ފަށައިފި އެވެ.
ހެނދުނު ދަންފަޅީގައި އެ ބިލުގެ ބަހުސް ކުރިއަށްގެންދިޔުމަށް ފަހު ސައިގަޑިއަށް މެދުކަނޑާލި އެވެ. އެއަށް ފަހު އަނެއްކާ ވެސް ބިލުގެ ބަހުސް ފަށައި ކަނޑިތީމު ދާއިރާގެ މެންބަރު އަމީން ފައިސަލް ވާހަކަ ނިމުމާއެކު ރިޔާސަތުން އިއުލާން ކުރީ މިއަދަށް ބަހުސް ނިމުނީ ކަމަށެވެ.
"މިހާ ހިސާބުން ބިޮލުގެ ބަހުސް މިއަދަށް ނިންމާލަން. ނިންމާލާފައި ދާނީ ކޮމިޓީން ހުށަހަޅާ ކަންކަމަށް،" ރިޔާސަތުގައި އިންނެވި އަބްދުއްރަހީމް އަބްދުالله ވިދާޅުވި އެވެ.
އާންމު އުސޫލެއްގެ ގޮތުން ބިލުގެ ބަހުސެއް ނިންމައި ވޯޓަށް އަހާނަމަ އެ ކަން ކުރީ ބައިގައި އިއުލާން ކުރާނެ އެވެ. ނަމަވެސް، ހުސްވަގުތުކޮޅަށް މަޖިލިސް ދިޔައީ އެކަން އިއުލާން ނުކޮށެވެ.
މެންދުރު 01:00 ގައި ޖަލްސާ ފެށުމަށް ފަހު އަލުން ކުރިއަށްގެންދިޔައީ އަނެއްކާ ވެސް އެ ބިލުގެ ބަހުސް އެވެ. ތޮއްޑު ދާއިރާގެ މެންބަރު ހުސައިން ސަމީރުގެ ބަހުސަށް ފަހު އަބްދުއްރަހީމް އިއުލާން ކުރެއްވީ މިއަދު ބަހުސް ނިންމާނެ ކަމަށެވެ.
"މި ބިލުގެ ބަހުސް ނިމުމާއެކު މިއަދުގެ މަސައްކަތުން ވޯޓާ ހަމައަށް ގޮސްފައިވާ ކަންކަމަށް ވޯޓަށް އެހުން އޮންނާނެ،" އަބްދުއްރަހީމް ވިދާޅުވި އެވެ.
އެ ބިލަށް ޕީއެންސީގެ ތާއިދު އޮތްކަން އެ ޕާޓީގެ ޕާލިމެންޓަރީ ގްރޫޕްގެ ލީޑަރު އިބްރާހިމް ފަލާހު އެއަށްފަހު ހާމަކުރެއްވި އެވެ. މި ބިލު ޕީއެންސީގެ ތާއިދާއެކު ބަލައިގަނެ މިއަދު ކޮމިޓީ ބާއްވާއި މާދަމާ ބިލު ފާސްކުރާނެ ކަމަށް ބެލެވެ އެވެ.
އެ ބިލު ބޭރުކޮށްލުމަށް ރާއްޖޭގެ ނޫސްވެރިންނާއި ހައްގުތަކަށް ވަކާލާތު ކުރާ ބޭރުގެ ވަރަށް ގިނަ ޖަމިއްޔާތަކުން ވެސް ދަނީ ގޮވާލަމުންނެވެ. އެކަމަކު، ސަރުކާރުން މިހާތަނަށް އެކަންކަމަށް ޖަވާބެއް ނުދެ އެވެ. ގިނަ ބަޔަކު ބުނަނީ، މިއީ އެފަދަ ބިލެއް ހުށަހެޅި ދެ ވަނަ ފަހަރު ކަމުން މި ފަހަރު އެ ބިލު ފާސް ކުރާނެ ކަމަށެވެ.
ރައްޔިތުންގެ މަޖިލީހަށް އެ ބިލު ހުށަހެޅި ފަހުން، މުއިއްޒު ގެންދަވަނީ މީޑިއާއާ ގުޅޭ ގޮތުން ދޮގު ފަތުރައި، ހަގީގަތް އޮޅޭ ގޮތަށް ވާހަކަ ދައްކަވަމުންނެވެ. ގައުމީ ދުވަހުގެ މުނާސަބަތުގައި މިއަދު ބޭއްވި ޖަލްސާގައި މުއިއްޒު ވަނީ އެމަނިކުފާނުގެ ރުޅިވެރިކަން މީޑިއާތަކަށް އަމާޒުކޮށްފަ އެވެ.
"މި ހޯލު ތެރޭގަ މި ތިބީ އެންމެން. މިސާލެއްގެ ގޮތުގަ މިކަމާ ބެހޭ ގޮތުން އެއްޗެއް ދަންނަވާލާނަން. ތީގެ ތެރެއިން ބޭފުޅަކު ތިމަންނަގެ ހިޔާލުފާޅުކުރުމުގެ މިނިވަންކަމޭ މިތާ ތެދުވެ އިއުލާނުކޮށްލަންވީ މިތާ ބޮމެއް އެބަ އޮތޭ. [އެހެން] ކިޔާފަ ހަޅޭލަވައިލައްވަންވީ. އެއީ މިނިވަންކަންތޯ. ދެން އެހެން މީހުންގެ ހައްގުތަކަށް އެ ހިސާބުން ވާނީ ކިހިނެއްތޯ،" މުއިއްޒު ވިދާޅުވި އެވެ.