124 ވަނަ ސިފައިންގެ ދުވަސް ފާހަގަކުރުމުގެ ގޮތުން ހިންގާ ހަރަކާތްތަކުގެ ތެރޭގައި ހިމެނިގެން ބޭއްވި، ސިފައިންގެ އާއިލީ ހަވީރު މިއަދު ނިންމާލައިފިއެވެ.
ދެ ދުވަހުގެ ނިޔަލަށް ޖުމްހޫރީ މައިދާނުގައި ބޭއްވި ސިފައިންގެ އާއިލީ ހަވީރަކީ ސިފައިންގެ އާއިލާތަކަށާއި އާންމުންނަށް ހުޅުވާލައިގެން ކުރިއަށް ދިޔަ ޢާއިލީ ހަވީރެކެވެ. މި އާއިލީ ހަވީރުގައި ކޯސްޓްގާޑް ޝިޕް ޝަހީދު ޢަލީއަށް ޒިޔާރަތްކުރުމާއި ސިފައިން ބޭނުންކުރާ ބައެއް އެއްގަމު އުޅަނދުތަކާއި ސިފައިންގެ ޔުނީފޯމްތަކުގައި ފޮޓޯނެގުން ހިމެނެއެވެ.
އަދި އިންޑިއާ ސަރުކާރުން ދިވެހިރާއްޖެއަށް ހަދިޔާކުރި ދެވަނަ ހެލިކޮޕްޓަރުގެ އުދުހުމުގެ ހަރަކާތްތައްވެސް އިއްޔެ ވަނީ އެސަރަހައްދުގައި ދައްކާލާފައެވެ. މީގެ އިތުރުން ކުޑަކުދިންނަށް ޚާއްޞަކޮށްފައިވާ ތަފާތު ކުޅިވަރުތަކާއި ސްޓޯލްތަކުގެ އިތުރުން ސްޓޭޖް އައިޓަމްގައި "ހަބޭސް ބޮޑުބެރު ގްރޫޕް" އަދި "މަންދީރާ ބޮޑުބެރު ގުރޫޕު" ބައިވެރިވެފައިވާއިރު މޫދުގެ ޚާއްޞަ ކުޅިވަރުތައް ވެސް ބާއްވާފައިވެއެވެ.
މިއާއިލީ ހަވީރުގައި ގިނަ އަދަދެއްގެ ސިފައިންނާއި އަދި ސިފައިންގެ އާއިލާތަކުގެ މެންބަރުންގެ އިތުރުން ގިނަ އަދަދެއްގެ ކުޑަކުދިންނާއި އާންމު ރައްޔިތުންވަނީ ބައިވެރިވެފައިވާ ކަމަށް އެމްއެންޑީއެފްއިން ހާމަކުރެއެވެ.