ދިރިއުޅުމުގެ ކަންކަން ނުބައި މަގަކުން ދާނަމަ ގިނަބައަކަށް ކުރެވޭ ކަމަކީ އެކަކު އަނެކަކު ކުށްވެރި ކުރުމެވެ. އެކަމަކު އެއީ އަކީ އެއްވެސް ކަމެއް ޙައްލުކުރެވޭނެ ގޮތެއް ނޫނެވެ. އަދި އެއްވެސް ކަމެއް ރަނގަޅުކުރެވޭނެ ގޮތެއް ނޫނެވެ. ވީމާ އަހުރެމެން ވިސްނަންވީ މައްސަލަ ޙައްލުކޮށް އުފާވެރިކަމުގައި ދިރިއުޅެވޭނެ ގޮތަކަށެވެ. 
ހިތާމައަކީ ގެތަކުގެ ފަރުނީޗަރާއި ލާހެދުމާއި ބޭރުފުށުގެ ރީތިކަން އިންތިހާއަށް އިތުރުކުރާއިރު އަމިއްލަ ދިރިއުޅުމުގެ ކަންކަން ރީތިކުރުމުގައި ފެއިލްވަމުންދާކަމެވެ. ދިރިއުޅުމުގެ އެންމެ މުހިންމު އަސާސްކަމުގައިވާ ޒަވާޖީ ޙަޔާތް ކާމިޔާބުކުރުމުގައި ކާމިޔާބު ނުހޯދޭކަމެވެ! ގަދައަޅައި މަސައްކަތްކުރަންވީ ޒަވާޖީ ޙަޔާތުގެ ކަންކަން ވީހައި ފުރިހަމަކުރުމަށެވެ! އުފާވެރި ދިރިއުޅުމެއް އުޅެވޭނީ އެއިރުންނެވެ. 
ދެމަފިރިން އެކުގައި ދިރިއުޅޭއިރު ކުރިމަތިވާ މައްސލަތައް ޙައްލުނުކޮށް ލަސްކުރުމަކީ ވަރަށް ގިނަ އިތުރުމައްސަލަތައް ކުރިމަތިވާ ކަމެކެވެ. އެގޮތުން ދެމަފިރިންގެ މެދުގައި ކަންކަން ގޯހުން ގޯހަށް ދިއުމުގެ އިތުރުން އެހެން މީހުން ދެކެ ރުޅި އާދެވުންވެސް އެކަމާއި ގުޅިގެންދެއެވެ. ވީމާ ދެމަފިރިންގެ މެދުގައި އެއްވެސް ބާވަތެއްގެ މައްސަލައެއް ކުރިމަތިވެއްޖެނަމަ އެކަމެއް ޙައްލުކުރަން އަވަސވެގަންނަން ޖެހޭނެއެވެ. 
ދެމަފިރިންގެ މެދުގައި ހުންނަ މައްސަލަތައް ހިފައިގެން އެމީހަކު މަސައްކަތްކުރާތަނަކަށް ދާންޖެހުމަކީވެސް ވަރަސް ނުރައްކައުތެރިކަމެކެވެ. ވެރިއެއްނަމަ އެކަމުގެ ރުޅި މުވައްޒިފުންނަށް ބާލައެވެ. މުވައްޒިފެއްނަމަ އެކަމަށް ވިސްނަން ހަދައިގެން އޮންނަނީ ރަނގަޅަށް މަސައްކަތް ނުކުރެވިފައެވެ. ކުރާ މަސައްކަތްތަކުގައި ކުށްތައް ކުރެވިފައެވެ. މިހިރަ ފެންނަނީ ހަމަ އެންމެ މައްސަލައެއްގެތެރެއިން ނުކުންނަ މައްސަލަތަކެވެ. 
ދެމަފިރިއެއްގެ މެދުގައި އެއްވެސް ކަމެއް ކުރިމަތިވެއްޖެ ނަމަ ފޮރުވައި ސިއްރުނުކުރާށެވެ! އަދި ހިތުގައި ޝައްކުކަން އުފައްދައިގެން ނުބުނެ ނުހުންނާށެވެ! ސުވާލުކުރާށެވެ! މަޝްވަރާކުރާށެވެ! ޝައްކު އުފައްދައިގެން ހުރުމަކީ ހަސަދަވެރިވެވޭ ކަމެކެވެ. ޙައްޤު ނޫން ތުހުމަތުތައް ކުރެވި އެފަދަ ތުހުމަތުތައް ފިތުނައަށް ބަދަލުވެ މައްސަލަތައް އަތްނުފޯރާފަށަށްދާފަހުން ޙަޤީޤަތް އެނގުމުން ލަދުގަންނަން ޖެހޭ ޙާލަތަށް ދަނީ މަދަކުންނޫނެވެ!
އަނެއްކަމަކީ ޝައްކުކުރުމާއި ނުބައި ހީތައްކުރުމަކީ ކުރެވޭ ފާފައެކެވެ. އެފާފައިންވެސް ސަލާމަތްވެ ހުރެވޭނީ ހިތް ސާފުކޮށްގެންނެވެ. މިބުނިމަގުން ހިތް ކިލާވެއްޖެނަމަ ހިތް ސާފުކުރަންޖެހޭނެއެވެ. އެކަން ކުރަން ޖަހަންޖެހޭ ބޭހަކީ ދެމަފިރިންގެ މެދުގައި މަޝްވަރާކުރުމެވެ. މިފަދަ މަޝްވަރާތަކުގައިވެސް ތެދުވެރިކަން އިސްކުރަންވާނެއެވެ. އޮޅުވާލައިގެން ނުވާނެއެވެ. ނޫންނަމަ ދާނީ ކިލާކަން އިތުރުވަމުންނެވެ.
 
 
- އިސްލާމީ ތިލަފަތުގެ ދަރުސަކުން