ސޫރިޔާގެ ކުރީގެ ސަރުކާރުން މަރާލި ކަމަށް ބެލެވޭ އެތައް ހާސް މީހުންގެ ކަށިތައް ހިމެނޭ މާސިންގާ ކަށްވަޅެއް ފެނިއްޖެއެވެ.
ދިމިޝްޤުގެ އުތުރުން 40 ކިލޯމީޓަރު ދުރުގައިވާ އަލް ޤުޠައިފާ ސަރަހައްދުން ފެނުނު މި މާސިންގާ ކަށްވަޅުގައި މަދުވެގެން 100،000 މީހުންގެ ހަށިގަނޑު ވާކަމަށް އެމެރިކާގައި ހިންގާ ސޫރިޔާގެ އެޑްވޮކަސީ ޖަމްޢިއްޔާއެއްގެ އިސްވެރިޔާ މުޢާޒު މުސްޠަފާ ވިދާޅުވެފައިވެއެވެ.
ރޯއިޓަރސްއަށް ދެއްވި ފޯނު އިންޓަވިއުއެއްގައި މުޢާޒު މުސްޠަފާ ވިދާޅުވީ މި ކަށްވަޅުތަކުގައި ސޫރިޔާގެ ރައްޔިތުންގެ އިތުރުން އެމެރިކާ އަދި ބްރިޓިޝް ރައްޔިތުންނާއި އެހެނިހެން ބޭރު މީހުންގެ ހަށިގަނޑުތައްވެސް ހިމެނޭ ކަމަށެވެ. އަދި މިފަދަ އިތުރު ކަށްވަޅުތައް ހުރެދާނެ ކަމަށް އޭނާ ޔަޤީންކުރައްވައެވެ.
Advertisement
ސޫރިޔާގެ ކުރީގެ ރައީސް ބަޝާރު އަލް އަސަދުގެ ވެރިކަމުގައި 2011 ވަނަ އަހަރުން ފެށިގެން ހިނގި ހަނގުރާމައިގައި އެތައް ސަތޭކަ ހާހަށްވުރެ ގިނަ މީހުން މަރުވެފައިވާ ކަމަށް ލަފާކުރެވެއެވެ. އަސަދުގެ ސަރުކާރުން އިންސާނީ ޙައްޤުތަކަށް އަރައިގަތްކަމުގެ ތުހުމަތުތައް ކުރެވޭއިރު، އޭގެ ތެރޭގައި ޖަލުތަކުގައި ގިނަ އަދަދެއްގެ މީހުން މަރާލުން ހިމެނެއެވެ.
އަސަދުގެ ސަރުކާރުން މި ތުހުމަތުތައް ދެކޮޅުހަދާ، އިންސާނީ ޙައްޤުތަކަށް އަރައިގަތްކަމުގެ ތުހުމަތުތައް ދޮގުކުރަމުން އައި ނަމަވެސް، މިހާރު އަސަދުގެ ވެރިކަން ވަނީ ނިމުމަކަށް އައިސްފައެވެ. އެކަމަކު މި މައްސަލައާ ގުޅޭގޮތުން ސޫރިޔާގެ އދ. އަށް ކަނޑައަޅާފައިވާ ސަފީރު ޤުސައި އަލްދައްހާކު އަދި އެއްވެސް ބަހެއް ވިދާޅުވެފައެއް ނުވެއެވެ.