މި މަހު އެވެރެޖުކޮށް ދުވާލެއްގެ މައްޗަށް ޓޫރިސްޓުން އަންނަމުންދާ މިންވަރަށް ބަލާއިރު، މި މަހުގެ ނިޔަލަށް ދެ މިލިއަނަށްވުރެ ގިނަ ޓޫރިސްޓުން ރާއްޖެއަށް އަންނާނެ ކަމުގައި ބެލެެވެ އެވެ.
ޑިސެންބަރު މަހުގެ ފުރަތަމަ 17 ދުވަހު އެވެރެޖުކޮށް ދުވާލަކު 6،092 ޓޫރިސްޓުން ރާއްޖެއަށް އައިސްފައިވާއިރު، މި އަހަރަށް ކަނޑައެޅި އަމާޒުކަމަށްވާ ދެ މިލިއަން ފަތުރުވެރިވާން ހަމަވާން ބައިލައްކައާ ގާތްކޮށްފައިވާކަން ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފި އެވެ. 
ޓޫރިޒަމް މިނިސްޓްރީން މިއަދު އާންމުކުރި ތަފާސްހިސާބުތަކަށް ބަލާއިރު ޑިސެންބަރު 17 ވަނަ ދުވަހުގެ ނިޔަލަށް 1،941،195 (އެއް މިލިއަން ނުވަލައްކަ ސާޅިސްއެއްހާސް ސަތޭކަ ނުވަދިހަފަސް) ފަތުރުވެރިން ރާއްޖެއަށް އައިސްފައިވެ އެވެ. އެއީ ނިމުނު އަހަރުގެ އެ މުއްދަތުގައި ރާއްޖެއަށް އައި ފަތުރުވެރިންނާ އަޅާބަލާއިރު 8.8 އިންސައްތަ އިތުރު އަދަދެކެވެ. 
ހިނގަމުންދާ ޑިސެންބަރު މަހުގައި އިއްޔެގެ ނިޔަލަށް 103،560 ޓޫރިސްޓުން ރާއްޖެއަށް އައިސްފައިވެ އެވެ. ނިމުނު އަހަރު ޑިސެންބަރު މަހުގެ ފުރަތަމަ 17 ދުވަހު އައިސްފައިވަނީ 100،652 ޓޫރިސްޓުންނެވެ. އެހެންކަމުން މި އަހަރުގެ އެ މުއްދަތުގައި އައި ޓޫރިސްޓުގެ އަދަދުވަނީ 2.9 އިންސައްތަ އިތުރުވެފަ އެވެ. 
ޓޫރިޒަމް ތަފާސްހިސާބުތައް ދައްކާ ގޮތުން ޑިސެންބަރު މަހުގެ ފުރަތަމަ 17 ދުވަހު އެވެރެޖުކޮށް 6،092 ޓޫރިސްޓުން އައިސްފައިވެ އެވެ.
 މި އަހަރަށް ސަރުކާރުން ކަނޑައަޅާފައިވާ ދެ މިލިއަން ޓޫރިސްޓުން ގެނައުމުގެ އަމާޒު ހާސިލުވުމަށް މިހާރު ބޭނުންވާ 58،805 ޓޫރިސްޓުންނެވެ. ނަމަވެސް ފާއިތުވި 17 ދުވަހު އެވެރެޖުކޮށް ދުވާލަކު ފަތުރުވެރިން އައި އަދަދަށް މި މަހުގެ ބާކީ އޮތް 13 ދުވަހު ޓޫރިސްޓުން އަންނަ ނަމަ އެ މުއްދަތުގައި 70،000 އަށްވުރެ ގިނަ ޓޫރިސްޓުން އަންނާނެ އެވެ.  
އެހެންކަމުން އެވެރެޖުކޮށް ދުވާލަކު އަންނަ ޓޫރިސްޓުންގެ އަދަދަށް ބަލާއިރު މި އަހަރު ނިމޭއިރު ދެ މިލިއަނަށްވުރެ ގިނަ ފަތުރުވެރިން އަންނާނެ ކަމުގައި ބެލެވެ އެވެ. 
ޓޫރިޒަމް ދާއިރާއިން އަންނަ އަހަރުގެ އަމާޒަކީ 2.5 މިލިއަން ޓޫރިސްޓުން ގެނައުމެވެ. އެކަމަށްޓަކައި ސަރުކާރުން އަންނަނީ ރާއްޖެ ޕްރޮމޯޓުކުރުމަށް ހާއްސަ މަސައްކަތްތަކެއް އަންނަ އަހަރު ހިންގުމަށް ބޮޑެތި ތައްޔާރީތަކެއް ވަމުންނެވެ. 
މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ