ތިމާ އެންމެ ބޮޑަށް ލޯބިވަނީ ﷲ ތަޢާލާގެ ޙަޟްރަތަށް ކަމަށާއި ހުންނަން ބޭނުންވަނީ އިސްލާމް ދީނުގައި ކަމަށް ބުނަމުން ފާފަކުރުންމަތީގައި ދެމިހުރުމުގެ ހުރި ނުބައިކަމުގެ ބޮޑުކަމާއިމެދު އެއްވެސް ވަރަކަށް ވިސްނާލަމުހެއްޔެވެ؟ ނޫންނަމަ ނުވަތަ ނުއެނގޭނަމަ އަޑުއަހާށެވެ!  
ކޮންމެ މުސްލިމަކުވެސް ބުނާނީ އެންމެ ބޮޑަށް ލޯބިވަނީ ﷲ ތަޢާލާ ދެކެ ކަމަށެވެ. އެހެން ބުނަމުންވެސް ބައެއް މީހުން ބޮޑެތި ފާފަތައް ކުރެއެވެ. ފާފަކުރަނިކޮށްވެސް ސުވާލުކޮށްފިނަމަ ބުނާނީ ތިމަންނާ އެންމެ ބޮޑަށް ލޯބިވަނީ ﷲ ތަޢާލާ ދެކެ ކަމަށެވެ.  
"ބަލަ ﷲ ތަޢާލާ ދެކެ ލޯބިވާނަމަ ތިއަފަދަ ބޮޑެތި ފާފަތައް ކުރަނީ ކީއްވެގެންތޯ؟" ސުވާލުކޮށްފިނަމަ ބުނާނީ ތިމަންނާގެ ހިތް ﷲ ދެނެވޮޑިގެންވާނެ ކަމަށެވެ. އެއީ މީހަކު ނުބުނި ނަމަވެސް އެންމެންނަސްވެސް އެނގޭ ކަމެކެވެ. އެންމެންގެ ހިތްވެސް ﷲ ތަޢާލާ ދެނެވޮޑިގެންވެއެވެ. 
އެހެންބުނާ މީހުންގެ ހިތާއިމެދު އެއްވެސް އެއްޗެއް ބުނާކަށް ނެތީމެވެ. ނަމަވެސް ބުނަން އޮތީ ﷲ ތަޢާލާ ދެކެ ލޯބިވާކަމަސް ބުނަމުން ބޮޑެތި ފާފަތައް ކުރަމުން ތިމާގެ ހިތް އެކަލާނގެ ދެނެވޮޑިގެންވާނެ ކަމަށް ބުނުމަކީ މުނާފިޤުންގެ ސިފައެއް ކަމަށެވެ. އެހެނީ ﷲ ތަޢަލާ ދެކެ ކިތަންމެ ވަރަކަށް ލޯބިވާ މީހަކަށްވެސް ފާފައެއް ކުރެވިދާނެއެވެ. ނަމަވެސް ﷲ ތަޢާލާ ދެކެ ލޯބިވާނަމަ ފާފަކުރުންމަތީގައި ދެމިނުހުންނާނެތީއެވެ.  
މިކަމުން އެނގެނީ އެމީހަކު ދީން ބޭނުން ނުވާކަމެވެ. ﷲ ތަޢާލާގެ ދީން ބޭނުން ނުވާނަމަ ﷲ ތަޢާލާ ދެކެ ލޯބިވުމުގެ އޮތީ ކޮން ބޭނުމެއް ހެއްޔެވެ؟ އެކަމުން ކުރާނީ ކޮން ފައިދާއެއް ހެއްޔެވެ؟
 
- ޝައިޚް މުޙައްމަދު ހޮބްލްސްގެ ދަރުސަކުން