ފުލުހުންނަށް ހައުސިން ޔުނިޓުތަކެއް އެޅުމުގެ މަޝްރޫއު ކުރިއަށް ގެންދިޔައިރު ހިންގި ކޮރަޕްޝަންތަކުގެ މައްސަލައިގައި ހިމެނޭ އެންމެންގެ މައްސަލަ އެންޓި ކޮރަޕްޝަން ކޮމިޝަނަށް ހުށަހަޅައި ޕޮލިސް ކޯޕަރޭޓިވް ސޮސައިޓީ (ޕޮލްކޯ) ގެ ބޯޑު މެންބަރުންނަށް ފިޔަވަޅު އަޅަން އޮޑިޓު އޮފީހުން ލަފާ ދީފި އެވެ.
އޮޑިޓު އޮފީހުން ބުރާސްފަތި ދުވަހު އާންމު ކުރި ހާއްސަ އޮޑިޓުން ހާމަވި ގޮތުގައި ބްލޫސް ހައުސިން ޔުނިޓުގެ 13 ބުރީގެ ތިން ޓަވަރު އެޅުމުގެ މަސައްކަތުގައި، ޕޮލްކޯގެ ނާގާބިލްކަމާއި ކޮރަޕްޝަނުގެ ސަބަބުން ދައުލަތަށް ވަނީ 354 މިލިއަން ރުފިޔާ ގެއްލިފަ އެވެ. އެ މަޝްރޫއަށް ޖުމުލަ މިހާތަނަށް 1.06 ބިލިއަން ރުފިޔާ ވަނީ ހަރަދުވެފަ އެވެ.
އެ މަޝްރޫއު އެންމެ ފުރަތަމަ ހަވާލު ކުރީ ނޫމަޑި ކުންފުންޏާ އެވެ. ފަހުން ހަވާލު ކުރީ ނޫމަޑި ރިޕްރެޒެންޓު ކުރާ މީހާގެ މެނޭޖިން ޑައިރެކްޓަރުކަމުގެ ދަށުން ހިންގާ އައިލެންޑް އެކްސްޕާޓްސް ކިޔާ ކުންފުންޏަކާ އެވެ. އޮޑިޓު އޮފީހުން ބުނަނީ އެ މަޝްރޫއުގެ އެއްބަސްވުންތައް ޕޮލްކޯއިން ހަދައި ކޮންޓްރެކްޓު ހަވާލުކޮށްފައި ވަނީ އޭނާއަށް ފައިދާވާ ގޮތަށް ކަމަށެވެ.
އޮޑިޓު އޮފީހުން ބުނެފައި ވަނީ އެ މަޝްރޫއުގެ ދަށުން ކޮންޓްރެކްޓަރުންނާއެކު ވެފައިވާ އެއްބަސްވުންތަކަށް އެކި ފަހަރު ބޮޑެތި ބަދަލު ގެނެސް، ކޮށްފައިވާ މަސައްކަތަށް ނުބަލައި ފައިސާ ދޫކޮށްފައި ވަނީ ވަކި ބަޔަކަށް މަންފާ ހޯދަން ކަމަށެވެ.
"މިކަމުގައި ޝާމިލްވާ ހުރިހާ ފަރާތްތަކެއް ހޯދައި ފިޔަވަޅު އެޅުމަށްޓަކައި މި މައްސަލަ ތަހުގީގު ކުރުމަށް އެންޓި ކޮރަޕްޝަން ކޮމިޝަނާއި އެހެނިގެން ތަހުގީގީ އިދާރާތަކަށް ހުށަހެޅުމަށް ލަފާ ދެން،" ހާއްސަ އޮޑިޓުގައި ބުނެފައިވެ އެވެ.
ބްލޫސް ހައުސިން ޔުނިޓުތައް އެޅުމުގެ މަސައްކަތް ޕޮލްކޯއިން ނަގައި މިހާރު ވަނީ ހައުސިން މިނިސްޓްރީގެ ބެލުމުގެ ދަށަށް ގެނެސްފަ އެވެ. ނަމަވެސް އޮޑިޓުގައި ލަފާ ދީފައި ވަނީ ޕޮލްކޯއިން މަޝްރޫއު ކުރިއަށްދިޔައިރު އެތަނުގެ ބޯޑުގައި ތިބި މީހުންނަށް ފިޔަވަޅު އެޅުމަށެވެ.
"މިކަންތައްތައް ކުރިއަށްގެންދިޔައިރު، ނިންމުންތައް ނިންމިއިރު، އޮތް ޕޮލްކޯގެ އޮތް ބޯޑް އޮފް ޑިރެކްޓަރުން އަދި އިސް ވެރިން މިކަމާ ގުޅޭ ގޮތުން ބަލަންޖެހޭ ބެލުންތައް ބަލައި އަމަލީ ފިޔަވަޅު އަޅާފައިނުވާތީ އޭރުގެ ޕޮލްކޯގެ ބޯޑާއި އިސް ވެރިން މިކަމުގައި ޒިންމާ ކުރުވުމަށް ލަފާ ދެން،" އޮޑިޓުގައި ބުނެފައިވެ އެވެ.
ފުލުހުންނަށް ހައުސިން ޔުނިޓު އެޅުމުގެ މަސައްކަތް އެންމެ ފުރަތަމަ ހަވާލު ކުރީ ނޫމަޑި ކުންފުންޏާ އެވެ. ނޫމަޑިއާ މަސައްކަތް ހަވާލު ކުރީ އިއުލާނު ކުރުމެއް، ޓެންޑާ ކުރުމެއް ނެތި އެވެ. ފަހުން މުޅި ޕްރޮޖެކްޓު ހަވާލު ކުރީ ނޫމަޑީގެ ސަބް ކޮންޓްރެކްޓަރު އައިލެންޑް އެކްސްޕާޓްއާ އެވެ. އައިލެންޑް އެކްސްޕާޓުގެ މެނޭޖިން ޑިރެކްޓަރަކީ ނޫމަޑީގެ ރިޕްރެޒެންޓޭޓަރެވެ. އެހެންކަމުން، އެކަމުގައި ފައިދާވީ ދައުލަތުގެ ބަދަލުގައި އޭނާއަށްކަން އޮޑިޓުގައި ފާހަގަ ކުރެ އެވެ.
"މި މަޝްރޫއުގެ އަގު އާދަޔާ ހިލާފަށް ބޮޑުވެފައި ވަނީ ޓެންޑާ ކުރުމުގެ އުސޫލުތަކާ ހިލާފަށް ސިންގަލް ސޯސްކޮށް ފަންނީ އަދި މާލީ ގާބިލްކަން ނެތް ކޮންޓްރެކްޓަރުންނަށް މަސައްކަތް ހަވާލު ކުރުމާއި ކޮންޓްރެކްޓަރުންނަށް ފައިދާވާ ގޮތަށް އެއްބަސްވުންތަކުގެ އަގަށް ބޮޑެތި ބަދަލުތަކެއް ގެނެސްފައިވުމުންނާއި ފްރޯޑާއި ކޮރަޕްޝަނުގެ އަމަލުތަކަށް ޝައްކު ކުރެވޭ ކަންކަން މި މަޝްރޫއުގެ ތެރެއިން ހިންގާފައިވާތީ،" އެ އޮޑިޓުގައި ބުނެފައިވެ އެވެ.
ޕޮލްކޯއިން ކަނޑައެޅިގެން މަސައްކަތް ކޮށްފައި ވަނީ ނޫމަޑީގެ ރިޕްރެޒެންޓޭޓިވްއަށް ފައިދާވާ ގޮތަށް ކަމަށް ވެސް ރިޕޯޓުގައި ބުނެފައިވެ އެވެ. އޭނާގެ ނަމެއް އޮޑިޓް ރިޕޯޓުގައި ފާހަގައެއް ނުކުރެ އެވެ. އޭނާއަށް ދީފައިވާ ނަމަކީ "މިސްޓާ އެކްސް" އެވެ.
"މި އޮފީހުން ބެލި ބެލުމުން ޕޮލްކޯއިން މި މަޝްރޫއަށް ހަދާފައި ހުރި 628.7 މިލިއަން ރުފިޔާގެ ކޮންޓްރެކްޓުތަކަކީ މިސްޓާ އެކްސްއާ ސީދާ ގޮތުންނާއި ނުސީދާ ގޮތުން ގުޅިފައިވާ އެސޯސިއޭޓެޑް ކުންފުނިތަކެއް ކަމަށް ބެލެވޭ،" އޮޑިޓުގައި ބުނެފައިވެ އެވެ. "އެއްބަސްވުންތަކުގެ ދަށުން ދީފައިވާ މާލީ ލުއިތަކާއި އަގު އިތުރުކޮށްދިނުމާއި ކޮންޓްރެކްޓުގެ މުއްދަތު އިތުރުކޮށްދިނުން ފަދަ ހުރިހާ ފައިދާއެއް ސީދާ ގޮތުންނާއި ނުސީދާ ގޮތުން ލިބިފައިވާ ފަރާތަކީ މިސްޓާ އެކްސް ކަމަށް ބެލެވޭ."
ނޫމަޑި ކުންފުނި ހިމެނޭ ގޮތަށް (އަމީން ކޮންސްޓްރަކްޝަން ފިޔަވައި) އެ މަސައްކަތް މިހާތަނަށް ކޮށްފައިވާ ހުރިހާ ކުންފުންޏަކަށް އިތުރަށް ފައިސާ ދޫކޮށްފައިވާކަން އޮޑިޓުން ދައްކަ އެވެ. އެއީ ސަބް ކޮންޓްރެކްޓަރުން ހިމަނައިގެން ޖުމުލަ ހަ ކޮންޓްރެކްޓަރުންނެވެ.
އޭގެ އިތުރުން އަދި ނުދައްކާ އެ ޕްރޮޖެކްޓުގެ ބައެއް ބިލުތަކަށް ފައިސާ ނުދައްކާ ވެސް އެބަ ހުއްޓެވެ. އެއީ އެމްޓީސީސީއަށް ދައްކަންޖެހޭ 480،006ރ. އާއި އަމީން ކޮންސްޓްރަކްޝަންގެ ބިލުތަކަކަށް ދައްކަންޖެހޭ 18.3 މިލިއަން ރުފިޔާ އެވެ.