‏ދުޅަހެޔޮ ނޫން އާދަތަކުގެ ސަބަބުން ހިތުގެ އުމުރު އަވަހަށް މަތިވެދާނެ ކަމަށް ފަހުގެ ‏‏ދިރާސާއަކުން ދައްކައިފިއެވެ. ‏
‏އިނގިރޭސިވިލާތުގެ ޔުނިވަރސިޓީ އޮފް އީސްޓް އޭންގްލިއާގެ ނޯވިޗް މެޑިކަލް ‏‏ސްކޫލުގެ ކާޑިއޮލޮޖިސްޓެއް ކަމުގައިވާ ޑރ. ޕަންކަޖް ގާގްގެ އިސްނެންގެވުމުގެ ‏‏ދަށުން ކުރެވުނު ދިރާސާއަކުން ދައްކާގޮތުގައި ދުޅަހެޔޮ ނޫން އާދަތަކުގެ ‏‏ސަބަބުން ހިތުގެ އުމުރު އަވަހަށް މަތިވެދާނެ އެވެ.‏
‏މި ދިރާސާގައި ބަލާފައި ވަނީ ސްޓްރެސް، މަތީ ފެޓް އެކުލެވޭ ކާނާ ބޭނުންކުރުމާއި ‏‏އަދި ކަސްރަތު ނުކުރުން ފަދަ ކަންކަމުގެ ސަބަބުން ހިތުގެ އުމުރު މައްޗަށް ‏‏ދިއުމުގެ މައްސަލައަށެވެ. މިގޮތުން އެމްއާރްއައި ސްކޭން ބޭނުންކޮށްގެން ހިތުގެ ‏‏މަސައްކަތްކުރާ މިންވަރަށް ބަލައި، ހިތުގެ އުމުރު ވަޒަންކުރެވިދާނެ ކަމަށް ‏‏ދިރާސާއިން ދައްކައެވެ.‏
‏"55 އަހަރުގެ މީހަކަށް އޭނާގެ ހިތް 65 އަހަރުގެ މީހެއްގެ ހިތެކޭ އެއްފަދަ ކަމަށް ‏‏ބުނުމަކީ އެ މީހަކު ބްލަޑް ޕްރެޝަރު ކޮންޓްރޯލް ކުރުމަށާއި، ބަރުދަން ‏‏ލުއިކުރުމަށާއި، އިތުރަށް ކަސްރަތު ކުރުމަށް ބާރުއަޅާ ކަމަކަށް ވެދާނެ،" ‏‏ގާގް ވިދާޅުވި އެވެ.‏
‏މީގެ އިތުރުން، 30 އާއި 40 އަހަރާ ދެމެދުގެ ގިނަ ބަޔަކު ދެކޭގޮތުގައި ހިތުގެ ‏‏ބަލިތަކަކީ ހަމައެކަނި އުމުރުން ދުވަސްވީ މީހުންނަށް ޖެހޭ ބައްޔެކެވެ. ނަމަވެސް، ‏‏ނުރަނގަޅު ކާނާ ބޭނުން ކުރުމާއި ސްޓްރެސް އާއި އިށީނދެ އުޅުމުގެ އާދަތަކުގެ ސަބަބުން ‏‏ޒުވާނުންގެ ހިތުގެ އުމުރުވެސް މައްޗަށް ދެ އެވެ. އެހެންކަމުން، ޒުވާން އުމުރުގައި ‏‏ހިތުގެ ސިއްހަތަށް ސަމާލުވުމަކީ މުހިންމު ކަމެއް ކަމަށް ޑޮކްޓަރުން ބުނެ އެވެ.‏
‏ހިތުގެ މަސައްކަތްކުރާ އުމުރު އަވަހަށް މަތިވަމުންދާކަން ދެނެގަތުމަކީ ނުބައި އާދަތައް ‏‏ދޫކޮށްލައި، ހިތުގެ ސިއްހަތަށް ސަމާލުވުމަށް ބާރުއަޅާ ކަމަކަށް ވެދާނެ ކަމަށް ‏‏ސައިންޓިސްޓުން ބުނެ އެވެ‏‎.‎
‏ހިތުގެ މަސައްކަތްކުރާ އުމުރު ބެލުމަށްޓަކައި ސައިންޓިސްޓުން ބަލަނީ ހިތުން ލޭ ‏‏ޕަންޕުކުރާ މިންވަރާއި ސްޓްރެސްގެ ދަށުގައި ހިތުގެ އޮނިގަނޑު ހުންނަ ގޮތެވެ. މި ‏‏މިންގަނޑުތައް ހުންނަނީ ޅަ އުމުރުގެ މީހެއްގެ ހިތާ އެއްގޮތަށް ނަމަ، އެ މީހެއްގެ ‏‏ހިތް، ވަރަށް ރަނގަޅު ހާލަތެއްގައި ހުރި ކަމަށް ބެލެވެ އެވެ. ނަމަވެސް، މި ‏‏މިންގަނޑުތައް ހުންނަނީ އުމުރުން ދުވަސްވީ މީހެއްގެ ހިތާ އެއްގޮތަށް ނަމަ، އެ ‏‏މީހެއްގެ ހިތަށް މައްސަލަތަކެއް ކުރިމަތިވަމުންދާ ކަމަށް ބެލެވެ އެވެ‏‎.‎
‏ހިތުގެ މަސައްކަތްކުރާ އުމުރު ދެނެގަތުމަކީ ހިތުގެ ބޮޑެތި މައްސަލަތައް ކުރިމަތިވުމުގެ ‏‏ކުރިން އެކަމަށް ފަރުވާ ހޯދުމަށް ލިބޭ ފުރުސަތެއް ކަމަށް ވެސް ޑޮކްޓަރުން ބުނެ އެވެ. ‏‏މިގޮތުން، ހިތުގެ މަސައްކަތްކުރާ އުމުރު އަވަހަށް މަތިވަމުންދާކަން އެނގުމުން، ‏‏ދިރިއުޅުމުގެ ވައްޓަފާޅި ބަދަލުކުރުމަށާއި ބޭސް ބޭނުންކުރަން ފެށުމަށް ‏‏ބާރުއެޅިދާނެ އެވެ‏‎.‎
‎"‎‏މިއީ ހިތް ދުޅަހެޔޮކަމާއެކު ގިނަ ދުވަހު ބޭއްވުމަށް ލިބުނު ވަރަށް މުހިންމު ‏‏ކުރިއެރުމެއް، މި އާ ވިސްނުމުގެ ސަބަބުން މުޅި ދުނިޔޭގައި ހިތުގެ ބަލިތައް ‏‏ދެނެގަތުމުގެ ގޮތްތައް އިތުރަށް ހަރުދަނާވެގެންދާނެ" ގާގް ވިދާޅުވިއެވެ.‏
‏މި ދިރާސާގެ ނަތީޖާތަކުން ހިތުގެ ބަލިތަކަށް ފަރުވާ ދިނުމުގެ ގޮތްތަކަށް ‏‏ބަދަލުތަކެއް އަތުވެދާނެ ކަމަށް ބެލެވެ އެވެ. އަދި މީހުންގެ "ހިތުގެ މަސައްކަތްކުރާ ‏‏އުމުރު" އެމީހުންނަށް އަންގައިދިނުމަކީ އެ މީހުން ދުޅަހެޔޮ ދިރިއުޅުމެއް އިޚްތިޔާރު ‏‏ކުރުމަށް ބާރުއަޅާ ކަމަކަށް ވެދާނެ ކަމަށްވެސް ދިރާސާގެ ހޯދުންތަކުން ދައްކައެވެ.‏
މިއީ އޯޕަން ޔޫރަޕިއަން ހާޓް ޖާނަލްގައި ޝާއިއުކޮށްފައިވާ ދިރާސާއެކެވެ.