އިއާދަކުރަނިވި ހަކަތަ ބޭނުންކޮށްގެން ރާއްޖޭގައި ކަރަންޓު އުފެއްދުމުގެ 75 މިލިއަން ޑޮލަރުގެ މަޝްރޫއެއްގެ އެއްބަސްވުމެއްގައި އޭޝިއަން ޑިވެލޮޕްމެންޓް ބޭންކް (އައިޑީބީ)އާއެކު ރާއްޖެއިން ސޮއިކޮށްފިއެވެ.
ފިނޭންސް މިނިސްޓްރީގައި މިއަދު ބޭއްވި ރަސްމިއްޔާތެއްގައި އެކަމުގެ އެއްބަސްވުމުގައި ރާއްޖޭގެ ފަރާތުން ސޮއިކުރެއްވީ ފިނޭންސް މިނިސްޓަރު ޑރ. މުހައްމަދު ޝަފީގެވެ. އޭޑީބީގެ ފަރާތުން ސޮއިކުރެއްވީ ޑެޕިއުޓީ ޑިރެކްޓާ ޖެނެރަލް ސިންޑީ މަލްވަޗީނީއެވެ.
އެންވަޔަރަމެންޓް މިނިސްޓްރީން ބުނީ އެ މަޝްރޫއަކީ "އެކްސަލަރޭޓިން ސަސްޓެއިނަބަލް ސިސްޓަމް ޑިވެލޮޕްމެންޓް ޔޫސިން ރިނިއުބަލް އެނާޖީ (އެޝުއާ)"ގެ ޕްރޮޖެކްޓެއް ކަމަށެވެ.
އެ ޕްރޮޖެކްޓުގެ ދަށުން ހިންގުމަށް ހަމަޖެހިފައިވާ މައިގަނޑު ހަރަކާތްތަކުގެ ތެރޭގައި ޕަވާ ޕާޗޭސީން އެގްރީމެންޓް އުސޫލުން 20 ރަށެއްގައި 20 މެގަވޮޓް އިރުގެ އަލިން ކަރަންޓު އުފައްދާ ނިޒާމުތަކެއް ގާއިމުކުރާނެ ކަމަށް މިނިސްޓްރީން ބުންޏެވެ. އެ ނިޒާމު ގާއިމުކުރާ ރަށްރަށުގައި ގްރިޑް ސްޓެބިލިޓީ ހަރުދަނާކުރުމަށް 34 މެގަވޮޓްއަވާގެ ބެޓެރި އެނާޖީ ސްޓޯރޭޖު ސިސްޓަމް ގާއިމުކުރާނެ ކަމަށާއި އެ ރަށްރަށުގެ ކަރަންޓު ވިއުގައިގެ ހާލަތު ވެސް ރަނގަޅުކުރާނެ ކަމަށް ބުންޏެވެ.
އޭގެ ތެރެއިން ކޮންމެވެސް އެއް ރަށެއްގައި ވައިގެ ހަކަތަ ބޭނުންކޮށްގެން ކަރަންޓު އުފައްދާ ނިޒާމެއް ގާއިމުކުރުން ވެސް ހިމެނޭ ކަމަށް މިނިސްޓްރީން ބުންޏެވެ. އަދި ކޮންމެވެސް އެއް ރަށެއްގައި ކަނޑުގެ އޮއިވަރު ބޭނުންކޮށްގެން ކަރަންޓު އުފައްދާ ނިޒާމެއް ޕައިލެޓްކުރުން ވެސް ހިމެނޭ ކަމަށް މިނިސްޓްރީން ބުންޏެވެ.
މިނިސްޓްރީން ބުނީ "ސޯލާ ޕްރޮގްރާމް"ގެ ފުރަތަމަ ފިޔަވަހީގެ ތިން މެގަވޮޓް ސޯލާ ޕީވީ ސިސްޓަމްތައް ހޯދުމަށް ހަރަދުކުރުމާއި އިރުގެ އަލި ބޭނުންކޮށްގެން ކަރަންޓު އުފައްދައި އެ ކަރަންޓުގެ އެހީގައި ހިންގާގޮތަށް އެއް ރަށުގައި ކޮމިއުނިޓީ އިރިގޭޝަން ސިސްޓަމަކާއި ކޮމިއުނިޓީ ފާމިން ޑިވެލޮޕްމެންޓް ޕްރޮގްރާމެއް ހިންގުމަށް ހަމަޖެހިފައިވާ ކަމަށެވެ.
އެ ޕްރޮޖެކްޓުތަކުގެ ސަބަބުން އަހަރެއްގެ މައްޗަށް 10 މިލިއަން ލީޓަރުގެ ޑީސަލް ސަލާމަތްކުރެވި، އެއާއެކު އަހަރަކު 26،000 ޓަނުގެ ވިހަ ގޭސް ޖައްވަށް ބޭރުކުރުން މަދުކުރެވޭނެ ކަމަށް މިނިސްޓްރީން ބުންޏެވެ.