އެމެރިކާގެ ކޮންގްރެސްގެ ރެޕްރެޒެންޓޭޓިވް އިލްހާން އޮމަރު ބޭއްވި "ޓައުން ހޯލް" ބައްދަލުވުމެއްގެ ތެރެއިން އޭނާ އަށް މީހަކު ހަމަލާދީފިއެވެ.
އަންގާރަ ދުވަހު މިނިއަޕޮލިސްގައި ބޭއްވި ބައްދަލުވުމުގެ ތެރެއިން ހިނގި މި ހާދިސާގައި، މީހަކު ވަނީ ކޮންގްރެސްގައި މިނެސޯޓާ ތަމްސީލު ކުރައްވާ އިލްހާންގެ ގަޔަށް ކޮން އެއްޗެއްކަން ނޭނގޭ މާއްދާއެއް ބުރުވާލާފަ އެވެ.
އެ ހާދިސާ ހިނގުމާއެކު އެއްވުމަށް ހާޒިރުވެތިބި މީހުން، ހަމަލާ ދިން މީހާ ވަގުތުން ހިފެހެއްޓި އެވެ.
ރޮއިޓާސް ނިއުސް އެޖެންސީން ރިޕޯޓްކުރި ގޮތުގައި، މި ހަމަލާގައި އިލްހާންއަށް އެއްވެސް އަނިޔާއެއް ލިބިފައެއް ނުވެއެވެ. އަދި އޭނާގެ ގަޔަށް ޖެހީ ކޮން އެއްޗެއްކަމެއް ނުވަތަ އެ ހަމަލާދިން މީހާއަށް އެއްވެސް ދައުވާއެއް އުފުލިކަމެއް ކަމާބެހޭ ފަރާތްތަކުން އަދި ހާމައެއް ނުކުރެއެވެ.
މި ހާދިސާގެ ވީޑިއޯ ފުޓޭޖްތަކުން ފެންނަ ގޮތުގައި، ހަމަލާދިން މީހާ ހިފަހައްޓައި އޭނާގެ އަތް ފަހަތަށް ބަނދެލި ވަގުތު އެތަނަށް އެއްވެ ތިބި އާންމުން ވަނީ އުފާފާޅުކޮށް އަޑުގަދަކޮށްފައެވެ.
އެސޯސިއޭޓެޑް ޕްރެސް އިން ރިޕޯޓްކުރާ ގޮތުގައި، އެ ވަގުތު މީހަކު "އޭނާ އިލްހާންގެ ގަޔަށް އެއްޗެއް ޖަހައިފި" އޭ ބުނާ އަޑު ވީޑިއޯއިން އިވެއެވެ. ހަމަލާދިން މީހާ އެ ތަނުން ނެރުމަށްފަހު، އިލްހާން ވަނީ އަލުން އެ ބައްދަލުވުން ކުރިއަށް ގެންގޮސްފައެވެ.
ހަމަލާ ދިނުމުގެ ކުޑަ ވަގުތުކޮޅެއް ކުރިން، އިލްހާން ވަނީ އެމެރިކާގެ އިމިގްރޭޝަން އެންޑް ކަސްޓަމްސް އެންފޯސްމަންޓް (ICE) އުވާލުމަށާއި، ހޯމްލޭންޑް ސެކިއުރިޓީ ސެކްރެޓަރީ ކްރިސްޓީ ނޯމް އިސްތިއުފާ ދެއްވުމަށް ގޮވާލައްވާފައެވެ. އިލްހާން ވިދާޅުވީ އައިސީއީއަކީ އިސްލާހު ކުރެވޭނެ މުއައްސަސާއެއް ނޫން ކަމަށެވެ.
މި ހާދިސާއާ ގުޅިގެން މިނިއަޕޮލިސް ފުލުހުންނާއި ވައިޓް ހައުސްއިން އަދި ރަސްމީކޮށް އެއްވެސް ބަހެއް ބުނެފައެއް ނުވެއެވެ.