ބޮލީވުޑްގެ އެކްޓަރު ރަންބީރު ކަޕޫރުގެ ކެރިއަރުގެ އެންމެ ކާމިޔާބު އެއް ފިލްމު ކަމަށްވާ "އެނިމަލް"ގެ ދެވަނަ ބައިގެ މަސައްކަތް އަންނަ އަހަރަށް ފަސްކުރެވިފައިވާ ކަމަށް އެކްޓަރު ބުނެފިއެވެ. ޑެޑްލައިން ހޮލީވުޑްއަށް ދިން އިންޓަވިއުއެއްގައި ރަންބީރު ބުނީ، ފިލްމު "އެނިމަލް ޕާކް"ގެ މަސައްކަތް މި އަހަރު ތެރޭ ފަށަން ނިންމި ނަމަވެސް ފިލްމުގެ ޑައިރެކްޓަރު ސަންދީޕް ރެޑީ ވަންގާ މިވަގުތު އަވަދިނެތި މަސައްކަތް ކުރަމުން ދަނީ އަންނަ އަހަރުގެ މާޗް މަހު ރިލީޒްކުރުމަށް ތާވަލުކޮށްފައި އޮތް ފިލްމު "ސްޕިރިޓް"ގެ ނިންމުމަށް ކަމަށެވެ. އެހެންވެ ފިލްމު "އެނިމަލް ޕާކް" ބެލުންތެރިންނަށް ގެނެސްދެވޭނެ ތާރީޚެއް އަދި ބުނަން ނޭނގޭ ކަމަށާއި އެ ފިލްމުގެ މަސައްކަތް އެންމެ އަވަހަށް ވެސް ފެށޭނީ އަންނަ އަހަރު "ސްޕިރިޓް" ރިލީޒް ކުރުމަށްފަހު ކަމަށް އެކްޓަރު ވަނީ ބުނެފައެވެ. ފިލްމު "ސްޕްރިޓް" އަކީ ޕްރަބާސް އަދި ބަތަލާ ތުރިޕްތީ ދިމްރީ ލީޑް ރޯލްތައް ކުޅޭ ވަރަށް ވަރުގަދަ އެކްޝަން ތުރިލާއެކެވެ. ރަންބީރު ކަޕޫރު އަދި ބަތަލާ ތުރިޕްތީ ދިމްރީ ފިލްމު "އެނިމަލް"ގެ މަންޒަރެއްގައި--ފޮޓޯ/އެންޑީޓީވީ ބުޝަން ކުމާރުގެ ޓީ-ސީރީސްއިން ގެނެސްދިން "އެނިމަލް" ތިން ބަޔަކަށް ބަހާލައިގެން ގެނެސްދޭން ނިންމާފައިވާއިރު އެ ފްރެންޗައިސް ގެނެސްދޭނީ ޓްރިލޮޖީއެއް ގޮތަށް ކަމަށް ރަންބީރު ވަނީ ބުނެފައެވެ. ފިލްމު "އެނިމަލް ޕާކް"ގައި ރަންބީރު ފެންނާނީ ޑަބަލް ރޯލްއިންނެވެ. އެހެންވެ ތަފާތު ދެ ކެރެކްޓާއެއް ކުޅުމުގެ ފުރުސަތު އެ ފިލްމުން ލިބޭތީ އެއީ ވަރަށް ޝައުގުވެރި މަސައްކަތަކަށް ވާނެ ކަމަށް ރަންބީރު ވަނީ ބުނެފައެވެ. ރަންބީރުގެ އިތުރުން ބަތަލާ ރަޝްމިކާ މަންދަންނާ، ތުރިޕްތީ ދިމްރީ، ބޮބީ ޑިއޯލް އަދި އަނިލް ކަޕޫރު މުހިއްމު ރޯލްތަކުން ފެނުނު 2023ގެ ފިލްމު "އެނިމަލް"އަށް ބޮކްސް އޮފީހުގައި 920.82 ކްރޯޑު ރުޕީސް (110.4 މިލިއަން ޑޮލަރު)ގެ އާމްދަނީއެއް ވަނީ ލިބިފައެވެ. ރަންބީރުގެ ކުރިއަށްހުރި ފިލްމުތަކުގެތެރޭ ޑައިރެކްޓަރު ސަންޖޭ ލީލާ ބަންސާލީގެ ފިލްމު "ލަވް އެންޑް ވޯ" އަދި ނިތޭޝް ތިވާރީގެ މިތޮލޮޖިކަލް ސާގާ "ރަމަޔާނާ: ޕާޓް ވަން" ހިމެނެއެވެ.