އެމްޑީޕީއަކީ ވަކި މީހެއްގެ މުށުތެރޭގައި އޮތް ޕާޓީއެއް ނޫން ކަމަށާއި އެ ޕާޓީއަކީ ރައްޔިތުންގެ ހައްގުތައް ކަށަވަރުކުރުމަށްޓަކައި މިއަދު ވެސް އަދި މާދަމާ ވެސް އޮތް ހަމައެކަނި ޕާޓީ ކަމަށް އެމްޑީޕީގެ ޕާލިމަންޓަރީ ގްރޫޕް (ޕީޖީ)ގެ ކުރީގެ ލީޑަރު މުހައްމަދު ރަޝީދު ހުސައިން (ބިގޭ) ރޭ ވިދާޅުވެއްޖެ އެވެ.
ބުނީ ކީކޭ؟ - ކުރިއަށް އޮތް ކައުންސިލް އިންތިހާބުގައި ވާދަކުރައްވާ ކެންޑިޑޭޓުންނަށް ހާއްސަކޮށް ރޭ ބޭއްވި ހަރުގެ ޖަލްސާގައި މުހައްމަދު ރަޝީދު ވިދާޅުވީ، އެމްޑީޕީގެ ސަރުކާރުގައި ކައުންސިލްތަކަށް މިނިވަންކަމާ އެކު ކަންކަން ކުރެވޭނެ ބާރުވެރިކަން ފޯރުކޮށްދީފައި ވަނިކޮށް، މި ސަރުކާރުން އެ ކަންކަން ކައުންސިލުތަކުން ނިގުޅައިގެންފައިވާ ކަމަށެވެ.
އެކަމަކު އެމްޑީޕީ އެނބުރި އަންނާނެ ކަމަށާއި، އެއަށް ފަހު ކުރިއަށް ވުރެ މާ ރަނގަޅަށް އެ މިނިވަންކަން ކައުންސިލުތަކާއި ރައްޔިތުންނަށް ފަހިކޮށްދޭނެ ކަމަށް އޭނާ ވިދާޅުވި އެވެ.
އަލިފުށި ދާއިރާގެ ކުރީގެ މަޖިލިސް މެންބަރުކަން ވެސް ކުރައްވާފައިވާ މުހައްމަދު ރަޝީދު ވަނީ، ކުރިއަށް އޮތް ކައުންސިލް އިންތިހާބުގައި އެމްޑީޕީއަށް އެ ފުރުސަތު ދިނުމަށް އެދިވަޑައިގެންފަ އެވެ.
މުހައްމަދު ރަޝީދު އިތުރަށް ވިދާޅުވީ:
މީގެ 45 އަހަރު ކުރިން އެމްޑީޕީން ސިޔާސީ މަސައްކަތް ފެށިއިރު ހުރިހާ ބާރުތަކެއް އޮތީ އެކެއްގެ އަތްމަތީގައި
ތިން ބާރު ވަކިވެފައިވާ ވެރިކަމުގެ ނިޒާމެއް ގާއިމުކުރެވުނީ އެމްޑީޕީގެ ވަރަށް ބޮޑެތި ގުރުބާނީތަކާއި މިންނެތް މަސައްކަތުން 
ރާއްޖޭގައި އޮތީ މައިގަނޑު ދެ ފިކުރެއް ކަމަށްވާއިރު، ޕީޕީއެމް، ޕީއެންސީ ނުވަތަ ޑީއާރްޕީ ފަދަ ނަންނަމުގައި ވެރިކަމަށް އަންނަ ކޮންމެ ފަހަރަކު ފެންނަނީ ބާރުތައް އެއްކޮށް، ރައްޔިތުން ނިކަމެތި ކުރާ ތަން
"އެމްޑީޕީއަކީ ވަކި މީހެއްގެ މުށުތެރޭ އޮތް ޕާޓީއެއް ނޫން މިހާރު. އެމްޑީޕީއަކީ 20 އަހަރު ފުރި ތަސައްރަފު ފުދިފައި އޮތް މުއައްސަސާއެއް ގޮތަށް އޭގެ ޒާތުގައި ހިނގަހިނގާ އޮންނަ ޕާޓީއެއް މިހާރު. ޕާޓީ ދޫކޮށްފައި ދާ މީހުން އެނބުރި އަންނާނެ. ދާނެ، އެހެން ނަމަވެސް އެމްޑީޕީއަކީ އޭގެ ޒާތުގައި އޮވެގެން ހިނގަހިނގާ ދާ ޕާޓީއެއް،" މުހައްމަދު ރަޝީދު ވިދާޅުވި އެވެ.
ޕީއެންސީއަށް ވެރިކަމާ އެކު ރައްޔިތުންގެ މަޖިލިސް ވެސް ދީފައި ވާއިރު، ތިން އަހަރު ވެގެންދިޔައިރު ފެންނަނީ ރާއްޖެ ބަނގުރޫޓުވަމުންދާ ތަން ކަމަށް މުހައްމަދު ރަޝީދު ވިދާޅުވި އެވެ. ރާއްޖެ މިހާރު ދަނީ ދުވަހެއް ދުވަހަކަށް އަޑިއަށް ދަމުން ކަމަށާއި އެގޮތަށް އަޑިއަށްދާން ދޫކޮށްލައިފި ނަމަ އަންނަން އޮތް ޖީލުތަކަށް މި ރާއްޖެ ސަލާމަތްކޮށްދެވޭނެ އެއްވެސް ގޮތެއް ނޯންނާނެ ކަމަށް އޭނާ ވިދާޅުވި އެވެ.
އެހެންކަމުން، ޕީއެންސީއަށް ރައްޔިތުންގެ ގައިގައި "ތިންވަނަ ކައްޓެއް ޖަހަން" ފުރުސަތު ނުދިނުމަށް މުހައްމަދު ރަޝީދު އެދިވަޑައިގެންނެވި އެވެ.
މުހައްމަދު ރަޝީދު ވިދާޅުވީ ސަރުކާރުގެ ކެންޑިޑޭޓުންނާއި ވާދަކުރަން އެމްޑީޕީގެ ފަރާތުން މި އިންތިހާބުގައި 1000އަށް ވުރެ ގިނަ ކެންޑިޑޭޓުން ނެރޭނެ ކަމަށެވެ.
ރާއްޖޭގެ އާބާދީގެ ބޮޑު ބަޔަކީ ޒުވާނުން ކަމަށް ވާއިރު، ވިސްނާ ފިކުރުކޮށް، އަންނަން އޮތް ޖީލުތަކަށްޓަކައި ގައުމު ސަލާމަތް ކޮށްދިނުމުގެ ޒިންމާ އޮތީ ޒުވާނުންގެ އަތުގައި ކަމަށް އޭނާ ވިދާޅުވި އެވެ. އެކަމަށްޓަކައި ކުރިއަށް އޮތް ކައުންސިލް އިންތިހާބު އެމްޑީޕީއަށް ކާމިޔާބުކޮށްދިނުމަށް ޒުވާނުން މަސައްކަތްކޮށްދިނުމަށް ވެސް އޭނާ އެދިވަޑައިގަތެވެ.