ބޯޑަރަކުން ގުޅިފައި އޮތް އިރާގުގެ ވެރިރަށް ބަގްދާދުގެ މައި އެއާޕޯޓާއި ކައިރީގައި ހުރި އެމެރިކާގެ އަސްކަރީ ބޭސްއަކަށް އިރާނުން ވަރުގަދަ ހަމަލާއެއްދީފި އެވެ.
އިރާނުގެ ތަސްނީމް ނިއުސް އޭޖެންސީން ރިޕޯޓުކުރާ ގޮތުގައި އިރާނުގެ ހަމަލާއަކާއި ގުޅިގެން ބަގުދާދު އެއާޕޯޓް ކައިރީގައިހުރި އެމެރިކާގެ ވިކްޓޯރިއާ ބޭސްގައި ގޮވުންތަކެއްގެ އަޑު ވަނީ އިވިފައި އެވެ.
އެގޮތުން މިއީ އިރާނުގެ ބާރުތަކުން އެތަނަށް ދިން މިސައިލް ހަމަލާތަކެއްކަމަށާއި މިއީ ވަރަށް ކާމިޔާބު ހަމަލާއެއްގެ ގޮތުގައި އިރާނުގެ އައިއާރްޖީސީއާއި ހަވާލާދީ ތަސްނީމް ނިއުސް އޭޖެންސީން އަންނަނީ ރިޕޯޓުކުރަމުންނެވެ.
އިރާނުން މިރޭ ވަނީ އިރާގުގައި އެމެރިކާ ސިފައިން ތިބޭ ހޮޓާތަކަކަށްވެސް އަމާޒުކޮށް މިސައިލް ހަމަލާތަކެއް ދީފައި އެވެ. މި ހަމަލާތަކުގައި އެމެރިކާ ސިފައިން ޒަހަމްވި ކަމަށް އިރާނުން ބުނި ނަމަވެސް އަދި މިހާތަނަށް އެކަން އެމެރިކާއިން ރަސްމީކޮށް ހާމައެއް ނުކުރެއެވެ.
މިދިޔަ ހޮނިހިރު ދުވަހު އިސްރާއީލާއި އެމެރިކާއިން އިރާނަށް ވަރުގަދަ ހަމަލާތަކެއް ދޭން ފަށައި އެގައުމުގެ އެންމެ މަތީ ލީޑަރު އާޔަތުالله އަލީ ޚާމަނާއީ އާއި ލީޑަރޝިޕްގެ އިސްވެރިންތަކެއް ވަނީ އަވަހާރަކޮށްލާފައި އެވެ. މި ހަމަލާތައް އިސްރާއީލާއި އެމެރިކާއިން ފެށީ އިރާނުން ނިއުކްލިއާ ހަތިޔާރު އުފައްދާ ކަމަށާއި އެކަމުގެ ބިރު މުޅި ދުނިޔެއަށް އޮތް ކަމަށްބުނެ އެވެ. މި ހަމަލާތަކާއިއެކު އިރާނުން ވަނީ ވަރުގަދަ ބަދަލު ހަމަލާތަކެއް ފަށާފައި އެވެ.
މި ހަމަލާތައް އިސްރާއީލުގެ އިތުރުން މެދުއިރުމަތީގައި އެމެރިކާގެ ބޭސްތައް ގާއިމްކޮށްފައިވާ ހުރިހާ ގައުމަކަށް އިރާނުން ދެމުންދާއިރު މި ހަމަލާތައް އިރާނުން ހުއްޓާލަން އިއްޔެ ވަނީ އެއްބަސްވެފައި އެވެ. ނަމަވެސް ހުއްޓާލަން އެއްބަސްވެފައިވަނީ އިރާނުގެ އަވަށްޓެރި ގައުމުތަކަށް ދެމުންދާ ހަމަލާތަކެވެ. އިސްރާއީލަށް ހަމަލާތައް ހުއްޓާނުލާން ނިންމައި އިސްރާއީލަށް ދޭ ހަމަލާތައް އިތުރަށް ވަރުގަދަ ކުރަން ވަނީ ނިންމާފައި އެވެ.
ހަމަލާތައް ހުއްޓާލަން އިރާނުން ނިންމީ އިރާނަށް ހަމަލާ ދިނުމަށް އަވަށްޓެރި ގައުމުތަކުގައި ހުރި އެމެރިކާގެ ބޭސްތައް ބޭނުން ނުކުރަން ޝަރުތުކޮށެވެ. ނަމަވެސް އަދިވެސް އިރާނަށް ހަމަލާތައް ދިނުމަށް އެބޭސްތައް ބޭނުންކުރަމުންދާތީ މިރޭ އިރާނުން ވަނީ ބޭސްތަކަށް އަމާޒުކޮށް އިތުރު ހަމަލާތަކެއް ދީފައި އެވެ.