މީގެ ދެ އަހަރުކުރިން, 2024 ވަނަ އަހަރުގެ ރިޔާސީ އިންތިޚާބުގެ ބަހުސްގެ ތެރޭގައި އޭނާގެ ފިރިކަލުން، އޭރުގެ އެެމެރިކާގެ ރައީސް ޖޯ ބައިޑަންގެ ފަރާތުން ފެނުނު އާދަޔާޚިލާފު ކަންތައްތަކުގެ ސަބަބުން، އޭނާއަށް ސްޓްރޯކެއް ޖެހުނީކަމަށް ހީފުޅުކުރެވި ވަރަށް ބޮޑަށް ބިރުގަތްކަމަށް ކުރީގެ ފަސްޓް ލޭޑީ ޖިލް ބައިޑަން ވިދާޅުވެއްޖެއެވެ. ސީބީއެސް ނިއުސްއަށް ދެއްވި އިންޓަވިއުއެއްގައި ޖިލް ބައިޑަން ވިދާޅުވީ، އެ ބަހުސްގައި ޖޯ ބައިޑަން ފެނުނު ގޮތުން އޭނާ ކަންބޮޑުވި ކަމަށެވެ. "އަޅުގަނޑު ހުރީ ބިރުން، ސަބަބަކީ އޭގެ ކުރިން ވެސް އަދި ފަހުން ވެސް ޖޯ އެގޮތަށް ފެނިފައި ނުވާތީ. ދުވަހަކުވެސް އެގޮތަކަށް ނުފެނޭ،" ޖިލް ވިދާޅުވިއެވެ. އޭނާ އިތުރަށް ވިދާޅުވީ، އެ މަންޒަރު ބަލަން ހުރިއިރު ބައިޑަންއަށް ސްޓްރޯކެއް ޖެހެނީއޭ ހިތަށް އެރި ކަމަށާއި ވަރަށް ބިރުގަތް ކަމަށެވެ. 2024 ވަނަ އަހަރުގެ ޖޫން މަހު ރިޕަބްލިކަން ކެންޑިޑޭޓް ޑޮނަލްޑް ޓްރަމްޕާއެކު ބޭއްވި މި ބަހުސްގައި، ޖޯ ބައިޑަންގެ އަޑު ކުރަކިވެފައި ހުރުމުގެ އިތުރުން، ބައެއް ފަހަރު ވާހަކަދައްކަންވީ މައުޟޫއު އޮޅި، ވިސްނުން ގެއްލިފައި ހުންނަ މަންޒަރު ފެނުނެވެ. އޭރު ބައިޑަންގެ ކެމްޕޭން ޓީމުން ބުނެފައިވަނީ އޭނާގެ އަޑު ކެނޑި ކުރަކިވީ ބަލިވެ އުޅުއްވާތީ ކަމަށެވެ. ނަމަވެސް، މި ބަހުސަށްފަހު އޭރު 81 އަހަރުގެ ބައިޑަންގެ އުމުރާއި، ސިއްހީ ހާލަތާއި، ވިސްނުމުގެ ގާބިލްކަމާމެދު އާންމުންނާއި މީޑިއާތަކުން ބޮޑެތި ސުވާލުތަކެއް އުފެއްދިއެވެ. މި ނާކާމިޔާބު ބަހުސާ ގުޅިގެން ޑިމޮކްރެޓިކް ޕާޓީގެ އިސް ބޭފުޅުންނާއި ފަންޑުކުރާ ފަރާތްތަކުގެ ސުވާލުތަކާއި ފިއްތުންތައް ވެސް ބައިޑަންއަށް ކުރިމަތިވިއެވެ. ފުރަތަމަ ކޮޅު ކެމްޕޭން ޓީމުން ބައިޑަން ރޭހުން ވަކިނުވާނެ ކަމަށް ބުނި ނަމަވެސް، އެންމެ ފަހުން އޭނާ ވަނީ ރިޔާސީ ރޭހުން ވަކިވެވަޑައިގެން، ނައިބު ރައީސް ކަމަލާ ހެރިސްއަށް ތާއީދު ކުރައްވާފައެވެ. ޖޯ ބައިޑަންގެ ސިޔާސީ ހަޔާތުގައި އެންމެ ގާތް އެއް މުޝީރަކީ ޖިލް ބައިޑަން ކަމަށްވާއިރު، ބައިޑަން ރޭހުން ވަކިވުމަށް އެންމެ ބޮޑަށް ބާރުއެޅުއްވި ބޭފުޅުންގެ ތެރޭގައިވެސް އޭނާ ހިމެނެއެވެ. ފާހަގަކޮށްލެވޭ ގޮތުގައި، ބަހުސް ނިމުނުތަނާހެން އެޓްލާންޓާގައި ބޭއްވި އެއްވުމެއްގައި ޖިލް ވަނީ ފާޅުގައި ފިރިކަލުންނަށް ތައުރީފު ކުރައްވާފައެވެ. އޭރު އޭނާ ވިދާޅުވީ ޖޯ ވަރަށް މޮޅަށް ކަންތައް ކުރެއްވި ކަމަށާއި، ހުރިހާ ސުވާލަކަށް ޖަވާބުދެއްވައި ހުރިހާ ހަގީގަތްތަކެއް ސާފުކޮށްދެއްވި ކަމަށެވެ. ނަމަވެސް މިހާރު ހާމަވެފައިވާ ގޮތުގައި، އެ ވަގުތުވެސް އޭނާގެ ހިތުގައި ބޮޑެތި ބިރުވެރިކަމެއް އޮތެވެ. ޖިލް ބައިޑަންގެ މި އިންޓަވިއު ސީބީއެސް ނިއުސްގެ "ސަންޑޭ މޯނިންގް" ޕްރޮގްރާމުން އަންނަ އާދިއްތަ ދުވަހު ފޮނުވުމަށް ވަނީ ހަމަޖެހިފައެވެ.