ތައިލެންޑުގެ އުތުރު-އިރުމަތީ ޕްރޮވިންސެއް ކަމަށްވާ މުކްދަހާން ގައި އިއްޔެ ހިނގި އެކްސިޑެންޓެއްގައި، މަގުމަތިން ހިނގާފައި ދިޔަ ބުޑިސްޓް ހާމުދުރުންގެ ޖަމާޢަތެއްގެ ތެރެއަށް ޕިކަޕް ޓްރަކެއް ވަދެ، 9 ފާދިރީން މަރުވެއްޖެއެވެ.
މި ހާދިސާ ހިނގަން މެދުވެރިވީ އުމުރުން އެންމެ 11 އަހަރުގެ ފިރިހެން ކުއްޖަކު، އޭނާގެ މައިންބަފައިންނަށް ނޭނގި ގޭގެ ޕިކަޕް ޓްރަކް ދުއްވަން ބޭރަށް ނިކުމެ އުޅުމުގެ ތެރޭގައެވެ. ބާރު ދުވެލީގައި ދިޔަ އެ ޕިކަޕް ކޮންޓްރޯލް ނުވެގެން ގޮސް، މަގުމަތިން ހިނގާފައި ދިޔަ ހާމުދުރުން ގައިގައި ބާރަށް ޖެހުނީއެވެ.
މި އެކްސިޑެންޓުގެ ސަބަބުން ލިބުނު ބޮޑެތި އަނިޔާތަކުގެ ސަބަބުން 5 ހާމުދުރުން ވަނީ އެކްސިޑެންޓް ހިނގި ތަނުގައި މަރުވެފައެވެ. އަދި ބާކީ ތިބި ހާމުދުރުން މަރުވީ ހޮސްޕިޓަލަށް ގެންގޮސް ފަރުވާ ދެމުން ދަނިކޮށެވެ. މީގެ އިތުރުން، މި ހާދިސާގައި 10 އަށްވުރެ ގިނަ މީހުންނަށް އެކިވަރުގެ އަނިޔާތައް ލިބިގެން ހޮސްޕިޓަލުގައި މިހާރު ދަނީ ފަރުވާ ދެމުންނެވެ.
އެކްސިޑެންޓްވި ޕިކަޕް ދުއްވި 11 އަހަރުގެ ކުއްޖާއާ ބެހޭގޮތުން ފުލުހުން ބުނެފައިވަނީ، އެވަގުތު ގޭގައި އެއްވެސް ބޮޑު މީހަކު ނެތް ކަމަށާއި، އެ ކުއްޖާ ހުރީ ބަލިވެގެން ސުކޫލަށް ނުގޮސް ގޭގައި ކަމެވެ.
ތައިލެންޑަކީ ބުޑިޒަމްގެ އަޤީދާ ވަރަށް ވަރުގަދައަށް ޤަބޫލުކުރާ އަދި އެ ޤައުމުގެ އާބާދީގެ ބޮޑު ބައެއް އެ ދީނަށް ތަބާވާ ޤައުމެކެވެ. އެ ޤައުމުގައި ބުޑިސްޓް ހާމުދުރުންނަކީ މުޖުތަމަޢުގައި ނުހަނު ބޮޑު އިޙްތިރާމަކާއި ޤަދަރެއް ދެވިގެންވާ ބަޔެކެވެ.
އާންމުގޮތެއްގައި ހާމުދުރުން ހެނދުނުގެ ވަގުތުތަކުގައި ޖަމާޢަތް ހަދާފައި މަގުމަތިން ހިނގާފައި ދަނީ ދީނީ އަޅުކަމެއްގެ ގޮތުންނާއި އާންމުންގެ ފަރާތުން ހަދިޔާ އާއި ކާބޯތަކެތި ހޯދުމުގެ ބޭނުމުގައެވެ.
މިފަދަ ދީނީ ހިނގާލުންތަކަކީ ތައިލެންޑުގެ ސަގާފަތާ ވަރަށް ބޮޑަށް ގުޅިފައިވާ ކަމަކަށް ވާއިރު، މިފަދަ އެކްސިޑެންޓެއްގައި ގިނަ އަދަދެއްގެ ހާމުދުރުން މަރުވުމަކީ މުޅި ތައިލެންޑަށް ބޮޑު ސިހުމަކާއި ހިތާމައެއް ގެނުވި ޙާދިސާއެކެވެ.