މީގެ 7 އަހަރު ކުރިން، ވިޔަފާރީގެ ބޭނުމަށް އަތުގައި މަސްތުވާތަކެތި ބެހެއްޓުމުގެ ކުށް ގދ. ނަޑެއްލާ އިބްރާހިމް ނާފިޒު (ޗިކާ) ގެ މައްޗަށް ކުށް ސާބިތު ނުވާ ކަމަށް ކަނޑައަޅައި، ހައިކޯޓުން ކުރި ހުކުމަށް ސުޕްރީމް ކޯޓުން ތާއީދުކޮށްފިއެވެ.
ސުޕްރީމް ކޯޓުން މި މައްސަލަ ބަލައި ހުކުމް ކޮށްފައިވަނީ އުއްތަމަ ފަނޑިޔާރު މުއުތަސިމް އަދުނާނާއި، ފަނޑިޔާރު އާއިޝާ ޝުޖޫން މުހައްމަދު އަދި ފަނޑިޔާރު ހުސްނުއްސޫއޫދެއެވެ.
އޭނާގެ މައްޗަށް ވިޔަފާރީގެ ބޭނުމަށް މަސްތުވާތަކެތި އަތުގައި ބެހެއްޓުމުގެ ދައުވާ އުފުލާފައިވަނީ 2008 ވަނަ އަހަރުއެވެ. އޭނާ ހައްޔަރު ކޮށްފައިވަނީ ފުލުހުން އޭނާ ދިރިއުޅޭ މ. ހެޕީކޯނާގެ ބަލައި ފާސްކުރި އިރު އޭނާ ދިރިއުޅޭ ކޮޓަރީގެ އަލަމާރި މަތީގައި އޮތް ސިޓީ އުރައަކުން މަސްތުވާތަކެތި ފެނިފައިވާ މައްސަލައިގައި 22 މާރޗް 2008 ގައެވެ.
އޭނާގެ ކޮޓަރިން ފެނިފައިވާ ސިޓީ އުރައިން އޭނާގެ ފިންގާ ޕްރިންޓް ފެނިފައި ނުވާތީ އޭނާގެ މައްޗަށް ކުށް ސާބިތު ނުވާކަމަށް ކްރިމިނަލް ކޯޓުން ކުރި ހުކުމަށް ހައިކޯޓުން ވެސް ވަނީ ތާއީދު ކޮށްފައެވެ. އެ ހުކުމް ސުޕްރީމް ކޯޓުގައި އިސްތިއުނާފު ކޮށްފައިވަނީ 2012 ވަނަ އަހަރުއެވެ. އަދި ހައިކޯޓުން ކޮށްފައިވާ ހުކުމް ސައްހަ ކަމަށް ސުޕްރީމް ކޯޓުން ނިންމާފައިވަނީ މިއަދުއެވެ.
އޭނާގެ މައްސަލައިގައި ކްރިމިނަލް ކޯޓުން ކޮށްފައިވާ ހުކުމުގައި ބުނެފައިވަނީ އޭނާ ދިރިއުޅުމުން އަންނަ ކޮޓަރިން މަސްތުވާތަކެތި ފެނުނު ނަމަވެސް މަނާ ކުރެވިފައިވާ މަސްތުވާއެއްޗެއް ވިޔަފާރިކުރުމަށްޓަކައި އަތުގައި ބަހެއްޓުމުގެ ކުށުގެ ދައުވާ އޭނާގެ މައްޗަށް ސާބިތުވާ ވަރަށް ތަފާތެއް ނެތް ފުރިހަމަ ހެއްކާއި ހަރުދަނާ ގަރީނާ ލިބިފައި ނުވާތީ، އެ ދައުވާ އޭނާގެ މައްޗަށް ސާބިތުނުވާ ކަމަށެވެ.
އެ ކޯޓުން އޭނާގެ މައްޗަށް ދައުވާ ސާބިތު ނުވާކަމަށް ނިންމާފައިވަނީ މަސްތުވާތަކެތި ފެނިފައި ވަނީ އޭނާގެ ހަށިގަނޑުން ކަމަށް ނުވާތީ އާއި، އޭނާ މަސްތުވާތަކެއްޗަށް ޕޮޒިޓިވް ނުވާތީއާއި، އޭނާގެ މަސްތުވާތަކެތީގެ ރެކޯޑެއް ނުތުމާއި، ކޮޓަރިން ފެނުނު މަސްތުވާތަކެތި ތަހުލީލުކުރި އިރު އޭނާގެ ފިންްގަޕްރިންޓް ނަގާފައި ނުވާތީއާއި ނާފިޒުގެ ކޮޓަރިން ސިޓީއުރަ ފެނުނު ތިން މީހުންނަށް އެ ސިޓީއުރަ އޮތް ނެތްގޮތަ ފަތާތެއް ނެތި ބުނެދެވިފައި ނުވާތީއެވެ.
މި ހުކުމަށް ހައިކޯޓުންވެސް ވަނީ ތާއިދު ކޮށްފައެވެ. އެގޮތުން ހައިކޯޓުން ފާހަގަކޮށްފައިވަނީ މަސްތުވާތަކެތި ފެނިފައި ވަނީ ނާފިޒްގެ ހަށިގަނޑުން ނުވަތަ އޭނާ ބަންދުކޮށްގެން ގެންގުޅޭ ފޮށި، އަލަމާރި އަދި ވަތްގަނޑަކުން ކަމަށް ނުވާއިރު، އަދި އެ ކޮޓަރިއަކީ އޭނާގެ ރައްޓެހިން ވެސް ވަދެ ނުކެމެ ހަދާތަކަށް ވާއިރު، އަލަމާރިމަތީގައި ސިޓީއުރަ ބޭއްވުމަކީ އެހެން މީހަކުވެސް ކޮށްފާނެ ކަމެއް ކަމަށެވެ.
ފުލުހުން އޭނާގެ ކޮޓަރިން ނަގާފައިވާ މަސްތުވާތަކެތީގެ ބާވަތެއް ކަމަށްވާ "އޯޕިއޭޓްސް" ގެ ބަރުދަނުގައި ޖުމްލަ 56.8003 ގްރާމް ހުއްޓެވެ. އެ މަސްތުވާތަކެއްޗާއި ރ. މަޑުއްވަރީ މުޝްތަރީގޭ ހަސަން ސޮބާހު ވަނީ ހަވާލުވެފައެވެ.