ކްރިމިނަލް ކޯޓުގެ އިސް ގާޒީ އަބްދުﷲ މުހައްމަދު ސިފައިންގެ ބެލުމުގެ ދަށަށް ގެންދިޔަ މައްސަލައިގައި ކުރީގެ ރައީސް މުހައްމަދު ނަޝީދުގެ މައްޗަށް އުފުލާފައިވާ ޓެރަރިޒަމްގެ ދައުވާގެ ޝަރީއަތުގެ ހަތްވަނަ އަޑުއެހުން މިއަދު ހަވީރު 4:00 ޖަހާއިރު ބާއްވަން ކްރިމިނަލް ކޯޓުން ތާވަލްކޮށްފި އެވެ.
މިއަދުގެ ޝަރީއަތުގައި ކުރިއަށް ދާނީ ދައުލަތުގެ ފަރާތުން ނަޝީދާ ދެކޮޅަށް ހުށަހަޅާ ހެކީގެ ތެރޭގައި ހިމެނޭ ވީޑިއޯއާއި އޯޑިއޯ ތަކެއް ހުށަހެޅުމެވެ.
އެ މައްސަލައިގެ އަޑުއެހުމެއް ރޭވެސް ބާއްވާފަވާއިރު، ދައުލަތުން ވަނީ ނަޝީދުއާއި ދެކޮޅަށް ތިން މީހެއްގެ ހެކިބަސް ހުށަހަޅާފަ އެވެ.
ރޭގެ އަޑުއެހުމުގައި ފަނޑިޔާރުން ވިދާޅުވީ ވީޑިއޯއާއި އޯޑިއޯ މިއަދުގެ ޝަރީއަތުގެ މަޖިލީހަށް ހުށަހެޅުން އޮންނާނެ ކަމަށެވެ. އަދި ރޭގައިވެސް އެކަން ކުރަން މަސައްކަތް ކޮށްފައިވެ އެވެ. އެހެން ނަމަވެސް ދިފާއީ ވަކީލުން ޑޮކިއުމެންޓްރީ ހެއްކަށް ތައްޔާރުވެވަޑައިގެންފައި ނުވާ ކަމަށް ދެންނެވެމުން ރޭގެ ޝަރީއަތުގައި އެބައި ކުރިއަށް ގެންގޮސްފައެއް ނުވެ އެވެ.
މިއަދުގެ ޝަރީއަތުގެ ކުރިން ރައީސް ނަޝީދާއި، އެމަނިކުފާނުގެ ގާނޫނީ ވަކީލުންގެ ޓީމަށް ޝަރީއަތަށް ހުށަހެޅޭ ޑޮކިއުމެންޓްރީ ހެއްކަކީ ކޮބައިކަން އަންގަވާނެ ކަމަށާއި، އޯޑިއޯތަކާއި، ވީޑިއޯތައް ބެލުމާއި، އަޑު އެހުމުގެ ފުރުސަތު ދެއްވާނެ ކަމަށްވެސް ފަނޑިޔާރުން ވަނީ ވިދާޅުވެފަ އެވެ. ނަޝީދުވެސް ވަނީ ޝަރީއަތުގެ ކުރިން އޯޑިއޯތައް އަޑުއެއްސެވޭނެ އިންތިޒާމް ހަމަޖައްސައި ދެއްވުމަށާއި، އެކަން އެގޮތަށް ނުވެއްޖެ ނަމަ ޝަރީއަތް ކުރިއަށް ނުގެންދިއުމަށް އެދިވަޑައިގެންފަ އެވެ.
ރޭ ބޭއްވި ޝަރީއަތުގެ މަޖިލިހުގައި ދައުލަތުގެ ވަކީލް ވިދާޅުވީ އަބްދުﷲ ގާޒީގެ އަނބިކަބަލުންނާއި ދައްތަގެ ހެކިބަހުން ދައުވާ ސާބިތު ކުރަން ބޭނުންވާ ހެކި ލިބިފައިވާ ކަމަށާއި އެހެންކަމުން އެމައްސަލައިގައި ހެކިންގެ ގޮތުގައި ހުށަހަޅުއްވާފައިވާ ގާޒީ އަބްދުﷲ މުހައްމަދުގެ ހެކިބަސް ނަންގަވަން ބޭނުން ނުވާ ކަމަށެވެ.