ކުރީގެ ހޯމް މިނިސްޓަރ އުމަރު ނަސީރު އިސްކޮށް ހުންނަވައިގެން އާ ސިޔާސީ ހަރަކާތެއް އުފެއްދުމުގެ މަސައްކަތް ފަށައިފިއެވެ.
އެނގިފައިވާ ގޮތުގައި މި ސިޔާސީ ހަރަކާތުގެ ނަމަކީ "ދިވެހި ނެޝަނަލް އެކްޝަން" ނުވަތަ ޑީއެންއޭއެވެ. މިކަން ކުރިއަށްގެންދާނީ ސިޔާސީ ހަރަކާތެއްގެ ގޮތުގައިތޯ ނުވަތަ ރަޖިސްޓަރކޮށްފައިވާ ސިޔާސީ ޕާޓީއެއްގެ ގޮތުގައިތޯ އަދި ސާފުވެފައެއް ނުވެއެވެ.
ބައެއް މީޑިޔާތަކުގައި ރިޕޯޓްކޮށްފައިވާ ގޮތުގައި މި ހަރަކާތުގައި އުމަރުގެ އިތުރުންވެސް ސިޔާސީ ދާއިރާގައި ހަރަކާތްތެރިވާ ބައެއް ފަރާތްތަކާއި ވިޔަފާރިވެރިންވެސް ބައިވެރިވާނެއެވެ. އެގޮތުން ކުރީގެ ފޮރިން މިނިސްޓަރ ދުންޔާ މައުމޫން، އެމްޑީޕީގެ ކުރީގެ ރައީސް ޑރ.އިބްރާހިމް ދީދީ (ޑރ.ޑީޑީ)، ކުރީގެ ކޮމިޝަނަރ އޮފް ޕްރިޒަންސް މުނާޒް އަދި ހެޕީމާކެޓް ކުންފުނީގެ ސީއީއޯ ކެޕްޓަން (ރިޓަޔަޑް) އަލީ އިހުސާން ހިމެނިވަޑައިގަންނަވާކަމަށް ވަނީ ބުނެފައެވެ.
ފާހަގަކޮށްލެވޭ ގޮތުގައި މިއީ އުމަރު އިސްކޮށް ހުންނަވައިގެން އުފައްދަވާ ދެވަނަ ސިޔާސީ ހަރަކާތެވެ. މީގެކުރިން އެބޭފުޅާ ވަނީ އިސްލާމިކް ޑިމޮކްރަޓިކް ޕާޓީގެ ނަމުގައި ސިޔާސީ ޕާޓީއެއް އުފައްދަވައި، އެ ޕާޓީގެ ޓިކެޓްގައި 2008ވަނަ އަހަރުގެ ރިޔާސީ އިންތިޚާބްގައިވެސް ވާދަކުރައްވާފައެވެ.