ރާއްޖޭގައި މިހާރު އިޢުލާނުކޮށްފައިވާ ކުއްލި ނުރައްކަލުގެ ހާލަތު އުވާލަންދެން، ނޮވެމްބަރު ހަވަނަ ދުވަހު އެމްޑީޕީއިން ބާއްވަން ހަމަޖެހިފައިވާ މުޒާހަރާ ފަސްކޮށްފިއެވެ.
އެމްޑީޕީގެ ޤައުމީ މަޖިލީހުން މިރޭ ބޭއްވި ޖަލްސާގައި ވަނީ، ރާއްޖޭގައި އިޢުލާނު ކޮށްފައިވާ ކުއްލި ހާލަތު އުވައިލުމަށް ގޮވާލާ ޤަރާރެއް ފާސްކޮށްފައެވެ. އެ ޤަރާރުގައި ވަނީ، ކުއްލި ހާލަތު ގޮވާލައި، އެ ހާލަތު އިޢުލާނު ކުރުމާއި އެކު ހިފެހެއްޓިފައިވާ އަސާސީ ހައްޤުތައް އަލުން އިޔާދަ ކުރުމަށާއި، އަދި އެމްޑީޕީގެ ރައީސް، ރައީސް މުހައްމަދު ނަޝީދު މިނިވަން ކުރުމަށެވެ.
ނޮވެމްބަރު ހަވަނަ ދުވަހު އޮންނަ ބޮޑު މުޒާހަރާ ފަސްކުރުމަށް އެދި ޤަރާރަށް އިސްލާހެއް ވެސް ހުށަހެޅުނެވެ. ނަމަވެސް އެ އިސްލާހަށް ވޯޯޓަށް އަހައިފައެއް ނުވެއެވެ. ކުއްލި ހާލަތު އުވައިލުމަށް ގޮވާލާ ޤަރާރު ފާސްކޮށްފައިވަނީ ޤައުމީ މަޖިލީހަށް ހާޒިރުވި 42 މެމްބަރުންގެ އަޣުލަބިއްޔަތުންނެވެ.
އެހެން ނަމަވެސް، އެމްޑީޕީގެ ޗެއާޕާސަންގެ ނައިބު އަލީ ނިޔާޒު ރާއްޖެޓީވީގައި ވިދާޅުވީ، ހުކުރު ދުވަހު މުޒާހަރާ ކުރުމަށް ކުރިން އޮތް ނަމަވެސް، ކުއްލި ހާލަތު ނިމެންދެން މުޒާހަރާ ފަސްކޮށްފައިވާ ކަމަށެވެ.
އޭގެ ބަދަލުގައި، އެމްޑީޕީއިން ވަނީ މާދަމާ ހަވީރު 16:00 ގައި އެމްޑީޕީގެ ހަރުގޭގައި ހަވީރު ސައި ބޭއްވުމަށް ރާވައިފައެވެ. އެމްޑީޕީއިން ވަނީ ހަވީރު ސައި ބެއްލެވުމަށް ވީހާވެސް ގިނަ ބަޔަކު ހަރުގެއަށް އައުމަށް ގޮވާލައިފައެވެ.
މިރޭގެ ޖަލްސާއަށް ފުލުހުން ވަނީ އެތައް ފަހަރެއްގެ މަތިން ވަދެފައެވެ. ކުއްލި ހާލަތު އިޢުލާނު ކޮށްފައި ވުމުގެ ސަބަބުން އާންމު ތަންތަނުގައި އެއްވެ އުޅުމުގެ މިނިވަންކަން ހިފަހައްޓާފައިވާ އިރު، އެމްޑީޕީ ހަރުގޭގެ ބޭރުގައި ބައެއް މީހުން ތިބުމުގެ ސަބަބުން ފުލުހުން ވަނީ، އެމީހުން ހަރުގެއަށް ވަނުމަށް ނުވަތަ އެސަރަހައްދު ދޫކޮށް ދިއުމަށް އަންގައިފައެވެ.
އަދި އެމްޑީޕީގެ ޤައުމީ މަޖިލީހުގެ ޖަލްސާގައި ސައުންޑު ސިސްޓަމް ބޭނުންކުރަމުން ދާތީ، މަގުމަތީގައި އަޑުގަދަ ވާތީ ފުލުހުން ވަނީ ހަރުގެ ތެރެއަށް ދެފަހަރަކު ވަދެ، ސައުންޑް ސިސްޓަމް ކަނޑައިލުމަށް އެދިފައެވެ.