އިންޑިއާއަކީ އަބަދުވެސް ރާއްޖޭގައި އޮތް ޑިމޮކްރަޓިކް ނިޒާމަށް އެއްބާރުލުން ދޭނެ ގައުމެއް ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ނަޝީދު މިހެން ވިދާޅުވީ، ރައީސް ޑރ. މުހައްމަދު މުއިއްޒުގެ ވެރިކަން އިންޑިއާގެ ރޯ އެޖެންޓުންގެ އެހީތެރިކަމާ އެކު ވައްޓާލަން ރާއްޖޭގެ އިދިކޮޅު ފަރާތްތަކުން ބޮޑު ރޭވުމެއް ރާވަމުންދިޔަ ކަމަށް އެމެރިކާގެ މަޝްހޫރު ދުވަހު ނޫސް، ވޮޝިންގްޓަން ޕޯސްޓުގައި ޝާއިއުކުރި ރިޕޯޓާއި ގުޅިގެން އެކްސްގައި ކުރެއްވި ޕޯސްޓަެއްގައެވެެ.
ނަޝީދުގެ ޕޯސްޓުގައި ވިދާޅުވީ ވޮޝިންޓަން ޕޯސްޓުގައި އޮތް އެ ރިޕޯޓު ޝައުގުވެރިކަމާއެކު އެމަނިކުފާނުވެސް ވިދާޅުވެފައިވާނެ ކަމަށެވެ. ރައީސް މުއިއްޒު އާއި ދެކޮޅަށް ރޭވުމެއް ރޭވިކަމުގެ މައުލޫމާތެއް އެނގިވަޑައިނުގަންނަވާކަން ހާމަކުރައްވަމުން ނަޝީދު ވިދާޅުވީ ބައެއް މީހުން އަބަދުވެސް މަސައްކަތް ކުރަނީ ދެކޮޅުވެރިކަމުގެ ރޭވުންތައް ރާވައި އެކަންކަން ހާސިލް ކުރުމަށް ކަމަށެވެ.
މީގެ އިތުރުން ނަޝީދު ވިދާޅުވީ ރާއްޖޭގެ ވެރިއަކު މަގާމުން ދުރު ކުރުމަށް ނުވަތަ ވެރިކަން ވައްޓާލަން އިންޑިއާ އިން މަސައްކަތްކޮށްފައިނުވާ ކަމަށެވެ. އަދި އިންޑިއާ އިން އަބަދުވެސް ރާއްޖޭގެ ޑިމޮކްރަސީއަށް އެއްބާރުލުން ދޭ ކަަމަށާއި އިންޑިއާ އިން ދުވަހަކު ވެސް ރާއްޖެއިން ކަންކުރަންވީ ގޮތް އަންގާފައި ނުވާނެކަމަށް ނަޝީދު ވިދާޅުވިއެވެ.
ވޮޝިންޓަން ޕޯސްޓުގައި 'އަ ޕްލޮޓު އިން ޕެރަޑައިސް އެންޑް އިންޑިއާސް ސްޓްރަގްލް ފޯ އިންފުލުއެންސް އިން އޭޝިއާ'، މި ސުރުހީގެ ދަށުން މިއަދު ޝާއިއުކޮށްފައިވާ ރިޕޯޓެއްގައި ބުނެފައިވަނީ ރައީސް މުހައްމަދު މުއިއްޒުގެ ވެރިކަން ވައްޓާލުމަށް ހަ މިލިއަން ޑޮލަރު ނުވަތަ ގާތްގަނޑަކަށް 92.5 މިލިއަން ރުފިޔާ ކަނޑައަޅައި، އެ ފައިސާ ހޯދުމަށް އިންޑިއާގެ އެހީ ހޯދަން ރޭވިކަމަށެވެ.