މާލޭގެ ޒަރޫރީ މުދަލުގެ އަގުތަކުގެ އިންޑެކްސް (އީސީޕީއައި) އޮކްޓޯބަރުގައި އޭގެ ކުރިން، ސެޕްޓެމްބަރާ އަޅާބަލާއިރު %0.98 ޕޮއިންޓް ދަށަށް ގޮސްފި އެވެ.
ވީ ކިހިނެއް؟ - ނޭޝަނަލް ބިއުރޯ އޮފް ސްޓެޓިކްސްއިން އާންމުކޮށްފައިވާ ފަހުގެ ހިސާބުތަކަށް ބަލާއިރު، މާލޭގައި %114.04ގައި ހުރި ޒަރޫރީ މުދަލުގެ އިންފްލޭޝަން ދަށަށް ދިޔުމުގެ މައިގަނޑު ސަބަބަކީ، ކާބޯތަކެތީގެ ބާވަތްތަކުގެ އަގު ހެޔޮވުމެވެ. އެގޮތުން ސީޕީއައި: 
ކާބޯތަކެތީގެ ސީޕީއައި ވަނީ %1.49 ޕޮއިންޓް ދަށްވެފައި 
މޭވާގެ ބާވަތްތަކުން %7.94 ޕޮއިންޓް ވަނީ ދަށްވެފައި އަދި ތަރުކާރީން %0.98 ދަށްވުމެއް
ހަކުރު، ޖޭމު، މާމުއި، ޗޮކްލެޓް އަދި ފޮނިކާތަކެތީގެ ބައިން %1.15 
ކިރު، ކިރުގެ އުފެއްދުންތައް އަދި ބިހުގެ ބާވަތްތަކުން %0.38 ގެ އަގުތައް އުފުލިފައި
މަހުން މަހަށް ބަލާއިރު އަގުތައް ދަށަށް ދިޔަ ނަމަވެސް އަހަރީ އިންފްލޭޝަން ރޭޓުން ދައްކަނީ ތަފާތު މަންޒަރެކެވެ. މިދިޔަ އަހަރުގެ އޮކްޓޯބަރާ އަޅާބަލާއިރު މާލޭގައި ޒަރޫރީ ބާވަތްތަކުގެ އަގު ވަނީ %1.89އަށް އުފުލިފަ އެވެ. މީގެ މާނައަކީ މީގެ އެއް އަހަރު ކުރިޔާ އަޅާބަލާއިރު ޒަރޫރީ މުދަލުގެ އަގުތައް މަތިވެފައިވުމެވެ. 
އަހަރުން އަހަރަށް ބަލާއިރު، ކާބޯތަކެތީގެ އަގުތައް ވަނީ %1.82 އުފުލިފަ އެވެ. މި އުފުލުމަށް އެންމެ ބޮޑަށް މަގުފަހިވީ:
މޭވާ: %6.94 މަތިވެފައި 
އެހެނިހެން ކާބޯތަކެތި: %4.06 މަތިވެފައި 
ތަރުކާރީގެ އަގުތައް: %10.10 ޕޮއިންޓް ދަށްވެފައި 
އެކިއެކި ބާވަތްތަކުން އިންފްލޭޝަނަށް އައި ބަދަލުތަކަކީ: 
ބުއިންތައް: މަހުން މަހަށް %0.45 އަދި އަހަރުން އަހަރަށް %2.68އަށް މައްޗަށް އަގުތައް މައްޗަށް ދިޔަ. އަހަރުން އަހަރަށް ބަލާއިރު އެންމެ ބޮޑު އިތުރުވުމެއް ފެނިފައިވަނީ ކޮފީ އާއި ކޮފީގެ ބަދަލުގައި ބޭނުންކުރާ ބާވަތްތަކުން %8.68 އަދި މޭވާ އާއި ތަރުކާރީގެ ޖޫހުން %5.67
ޕާސަނަލް ކެއާ ޕްރޮޑަކްޓްސް (ހަށިގަނޑު ރީތިކޮށް ބެލެހެއްޓުމަށް ބޭނުންކުރާ ތަކެތި): މަހުން މަހަށް %0.18 މައްޗަށް މި ބައިގެ އަގުތައް އުފުލުނުއިރު، އަހަރުން އަހަރަށް %2.99ގައި އަގުތައް ބޮޑުވި 
ގޭހާއި އެހެނިހެން ތެލުގެ ބާވަތްތައް: މިދިޔަ ސެޕްޓެމްބަރުން އޮކްޓޯބަރު އަގުތައް %0.64ގައި ބޮޑުވި ނަމަވެސް މިދިޔަ މަހާ އަޅާބަލާއިރު އަހަރުން އަހަރަށް އަގުތައް ވަނީ %0.83 ޕޮއިންޓް ދަށަށް ގޮސްފައި 
މޫސުމީ ބަދަލުތަކާ ގުޅިގެން މޭވާ އާއި ތަރުކާރީގެ އަގުތައް އޮކްޓޯބަރުގައި ކުޑަ ލުޔެއް ލިބުނު ނަމަވެސް، އަހަރުން އަހަރަށް ބަލާއިރު އަގުތައް މަތިވުމުން ބުނެދެނީ ޒަރޫރީ މުދަލުގެ އިންފްލޭޝަންގެ ޕްރެޝަރު އަދިވެސް ބޮޑުކަމެވެ.