ސްރީ ލަންކާގައި ފެންބޮޑުވެ، ބިންގަނޑު ކަނޑައިގެން ދިއުމުގެ ހާދިސާތަކުގައި މަރުވި މީހުންގެ އަދަދު 159އަށް އަރައި 200އަށް ވުރެ ގިނަ މީހުން ވަނީ ގެއްލިފަ އެވެ.
ލަންކާގެ ޑިޒާސްޓާ މެނޭޖްމަންޓް ސެންޓަރުން ބުނި ގޮތުގައި އެ ހާދިސާގައި 20،000އަށް ވުރެ ގިނަ ގެދޮރު ހަލާކުވެ، 108،000އަށް ވުރެ ގިނަ މީހުން ދައުލަތުގެ ވަގުތީ ހިޔާތަކަށް ވަނީ ބަދަލުކޮށްފަ އެވެ.
އޮފިޝަލުން ވިދާޅުވި ގޮތުގައި، ތޫފާން 'ދިތުވާ' ފައިބައިގެން ދިޔަ އިރު، އެ ގައުމުގެ ތިން ބައިކުޅަ އެއްބައި ސަރަހައްދުގައި ކަރަންޓާއި ފެން ނުލިބޭކަށް ނެތެވެ.
ކެލާނީ ކޯރުގެ ފެންގަނޑު ވަރަށް ބޮޑަށް އުފުލެމުންދާތީ އެ ސަރަހައްދުތަކުން މީހުން ހުސްކުރުމުގެ އަމުރު ދައުލަތުގެ އިދާރާތަކުން އަންނަނީ ތަންފީޒު ކުރަމުންނެވެ.
އެންމެ ގިނަ މީހުން މަރުވެފައި ވަނީ ކެންޑީ އާއި ބަޑުއްލާއި އެކަހެރި ސަރަހައްދުތަކުގަ އެވެ. އެ ސަރަހައްދުތަކާ ވަނީ ގުޅުން ކެނޑިފަ އެވެ.
"ބިންގަނޑު ކަނޑައިގެން ދިއުމުގެ ސަބަބުން ހުރިހާ މަގުތަކެއް ބަންދުވެފައި އޮތުމުން އަޅުގަނޑުމެންނަށް ވިލެޖް ދޫކޮށް ދެވޭކަށް ނެތް. ކާބޯތަކެތި ނުލިބި ސާފު ފެން ހުސްވަމުން މިދަނީ،" ބަޑުއްލާގެ މަސްޕަންނާ ވިލެޖްގެ ސަމަން ކުމާރާ ބުންޏެވެ.
އެ ހާދިސާގައި މަރުވި މީހުންގެ ތެރޭގައި އުމުރުން ދުވަސްވީ މީހުން ބަލަހައްޓާ ތަނެއްގައި ދިރިއުޅޭ 11 މީހުން ވެސް ހިމެނޭ ކަމަށް ފުލުހުން ބުނެ އެވެ.
އަނޫރާދަޕޫރާގައި ފެންގަނޑަށް ގެނބެމުން ދިޔަ ބަހަކުން 69 މީހަކު ވަނީ ސަލާމަތްކޮށްފަ އެވެ.
އެ ގައުމުން ބޭރުގައި ދިރިއުޅޭ ލަންކާގެ ރައްޔިތުންނާއި ހެޔޮ އެދޭ ފަރާތްތަކުން އެހީވުމަށް ސަރުކާރުން ވަނީ އިލްތިމާސްކޮށްފަ އެވެ.
މިދިޔަ ހުކުރު ދުވަހު އެރި ދިތުވާ ތޫފާން އެރީ އިރުމަތީ އައްސޭރިފަށެވެ. ނަމަވެސް އެ ތޫފާން ވަނީ އެ ގައުމު ދޫކޮށް ގޮސްފަ އެވެ.
ލަންކާގައި 2003 ވަނަ އަހަރު ހިނގި އެންމެ ބޮޑު ފެންބޮޑުވުމުގެ ހާދިސާގައި 254 މީހުން މަރުވެ، އެތައް ހާސް ބަޔަކު ގެދޮރު ދޫކޮށް ދިއުމަށް މަޖުބޫރުވި އެވެ.