"އަހަރެން އޭނައަށް ވިސްނައިދީދީ ވަރުބަލިވެއްޖެ... ބައްޕައަށް ރައާބިލް މިނިވަންކުރީ، ނާވީކަން އެނގިއްޖެނަމަ ދެން ވާނެ ގޮތެއް އަހަންނަށް އަންދާޒާވެސް ނުކޮށްލެވޭ..." ނަމީރަށް އެހެން ބުނެވުމާއެކު އޭނައަށް ދެލޯ މަރައިލެވުނެވެ. އެހެންނަމަވެސް ދެވަނަ ސިކުންތުގައި އޭނަގެ ކަންފަތުގައި ޖެހުނީ، އިންޖާބުގެ ބާރު ހަޅޭކުގެ އަޑެވެ. ސިހުނު ނަމީރަށާއި ޝައިސްތާއަށް އަޑު އައި ދިމާލަށް ބަލައިލެވުނެވެ. އޭރު އިންޖާބު ހުރީ ރުޅި އައިސް ރަތްވެފައެވެ. އޭނަގެ ދެލޯ ދިއްލިފައިވާއިރު، ކުއްލިއަކަށް، ބާރުވައިރޯޅިތަކެއް ތަނަށް ޖެހެން ފަށައިފިއެވެ. ހީވީ ތޫފާނެއްގެ އަސަރު ކުރަން ފެށިހެންނެވެ. "ބައްޕަ...." ނަމީރު ގަނޑުވި ފަދައެވެ. އޭނައަށް ބަލައިލެވުނީ ކައިރީގައި ހުރި ޝައިސްތާއަށެވެ. ޝައިސްތާވެސް ހުރީ ބިރުން ގުޑިލަން ނުކެރިފައެވެ. އެ ދެމީހުންގެ ހިތް ތެޅެން ފެށީ އިންތިހާ ބާރުމިނުގައެވެ. އިންޖާބުގެ އެ ރުޅިވެރިކަން މީގެ ކުރިން ނަމީރަށް ފެނިފައި ވިޔެއްކަމަކު މިފަހަރު އެ ފެންނަމުން ދިޔަ ފަދަ އަސަރެއް އޭނާއަކަށް ދުވަހަކުވެސް އެ މޫނުމަތީން ފެނިފައެއް ނުވެއެވެ. "ރައާބިލް މިނިވަންކުރީ ނާވީއޭ..." ބިރުން ހަރަކާތެއް ގެންނަން ނޭނގިފައި ނަމީރާ ޝައިސްތާއާ ތިއްބާ އިންޖާބު އެމީހުންނާ ގާތަށް ފިޔަވަޅެއް އަޅައިލިއެވެ. އެއާއެކު، ނަމީރާ ޝައިސްތާއަށް ބޭއިޚްތިޔާރުގައި ފަހަތަށް ޖެހެވުނެވެ. އެއްޗެއް ބުނަން ދެމީހުން ކުރެ އެކަކުވެސް ދުލެއް ހަރަކާތެއް ނުކުރިއެވެ. އިންޖާބުގެ އެ ރުޅިވެރިކަމާ ކުރިމަތިލާނީ ކިހިނެއްކަމެއް އެއިން އެކަކަށްވެސް ނޭނގުނެވެ. "ޖަވާބު ދީ... ރައާބިލް ފިލަން އެހީވީ ނާވީތަ؟" ކިތަންމެ ރުޅިއައިސް ހުރިނަމަވެސް، އިންޖާބަށް ވެސް ނާވީ އެފަދަ ކަމެއް ކޮށްފާނެކަމަކަށް ޤަބޫލެއް ނުކުރެވެއެވެ. ނާވީ އަކީ އެއްއިރެއްގައިވެސް ގަނޑުވަރުގެ ކަމަކަށް ޝައުޤުވެރިކަން ހުރި ޒުވާނެއް ނޫނެވެ. އޭނަ އަބަދުވެސް ޝައުޤުވެރިވަނީ ދުނިޔޭގެ އެތަން މިތަނަށް ދަތުރުކުރުމަށެވެ. އެކުވެރިޔާ ދައިސަމްއާ ދެމީހުން އެކުގައި ޝަހަރުގައިވެސް ތިބެނީ މަދު ފަހަރެއްގައެވެ. ވީއިރު ނާވީ އެފަދަ ކަމެއް ކޮށްފާނެހެއްޔެވެ؟ އޭނަ ރައާބިލް މިނިވަންކުރިނަމަ އެކަމުގެ ފަހަތުގައި ފޮރުވިފައިވާ ސަބަބަކީ ކޮބައިހެއްޔެވެ؟ އިންޖާބުގެ ރުޅިވެރިކަން އިތުރު ވަމުން ދިޔައީ ނަމީރާ ޝައިސްތާގެ ހިމޭންކަމުންނެވެ. އޭނަގެ ކެތްތެރިކަން ކޮޅުންލާން ފެށުމުން އަނެއްކާވެސް ހަޅޭއްލަވައިގަތެވެ. ނަމީރު ހިންދިރުވައިލިއެވެ. އޭނަގެ ހިތަށް ކުޑަވެސް ހަމަޖެހުމެއް ލިބިގެން ދިޔައީ އެމީހުން ދެއްކި ވާހަކަތަކުން ބައްޕައަށް އަޑު އިވުނީ ފަހު ޖުމްލަ އެކަނިކަން އެނގުމުންނެވެ. އެހެންނަމަވެސް، އެ ހަމަޖެހުން ވެސްއެކީ ގެއްލިގެން ދިޔައީ އިތުރަށް އެއިން އެއްވެސް ކަމެއް ވެސް ސިއްރުކުރުމަކީ ނާދިރުކަމެއްކަން ފަހުމްވުމުންނެވެ. "އަހަރެން އެބަ ސުވާލެއް ކުރަމޭ... ނާވީހެއްޔޭ އެކަން ކުރީ؟ އޭނަ ކީއްކުރަން ރައާބިލް މިނިވަންކުރަންވީ؟ ކޮން އިރަކު އޭނަ ގަނޑުވަރުގެ ކަންތައްތަކަށް ޝައުޤުވެރިވާން ފެށީ؟" އިންޖާބުގެ ހިތުގައި އުފެދިފައިވަނީ ހުސް ސުވާލެވެ. "ކަލޭމެން ދެމީހުން ތެރެއިން އެކަކު ޖަވާބު ނުދިނަސް އަހަންނަށް އެހުރިހާކަމެއް ހޯދޭނެ. އަދި ކަންތައްތައް އެނގޭނެ ގޮތްތައްވެސް ހުންނާނެ. އެކަމަކު އަހަންނަށް އެނގެން ޖެހޭ ކަމެއް ސިއްރުކޮށްގެން ތިޔައިގެ ތެރެއިން އެކަކަށްވެސް ފައިދާއެއް ނުވާނެ." "ނަމީރު..." ޝައިސްތާއަށް ނަމީރުގެ އަތުގައި ހިފައްޓައިލެވުމާއެކު ތުރުތުރު އަޅަމުން ދިޔަ އަޑަކުން ވާހަކަ ދެކެވުނެވެ. އޭރު އޭނައަށް ރޮވިއްޖެއެވެ. "އަހަރެންގެ ދަރިފުޅު..." ޝައިސްތާއަށް އެހެން ބުނެވުނީ ކިތަންމެ މަޑުން ނަމަވެސް އިންޖާބަށް އެ އަޑު އިވުނެވެ. އޭނައަށް އެދެމީހުންގެ މޫނުމަތީން އެއްކަމެއް ޔަޤީންވެސް ވެއްޖެއެވެ. ކިތަންމެ ޤަބޫލުކުރަން ދަތިވިނަމަވެސް، ރައާބިލް ފިލަން އެހީވީ ނާވީ ކަމެވެ. ހިނދުކޮޅަކަށް އޭނަގެ ސިކުނޑިވެސް ގަނޑުވެލިއެވެ. "ހަނދާންކުރާތި. އެކަކަށްޓަކައިވެސް އަހަރެން އަހަރެންގެ އުސޫލުތަކެއް ބަދަލެއް ނުކުރާނަން. ކުށްވެރިއަކަށް އެހީތެރިވާނީވެސް ކުށްވެރިއެއް..." އިންޖާބު ބުނެލިއެވެ. އޭނަ ދިނީ އިންޒާރެކެވެ. އެކަކުވެސް އޭނަގެ ކުރިމަތީގައި ތަފާތު ނުވާނެކަމުގެ ޔަޤީންކަމެވެ. ޝައިސްތާގެ ދެލޮލުން ކަރުނަ ފައިބަން ފެށިއެވެ. "ނަމީރު... އަހަރެންގެ ދަރިފުޅު..." ނަމީރުގެ އަތަށް ކުޑަކޮށް ދަމައިލުމާއެކު އޭނައަށް އަނެއްކާވެސް ވައި އަޑުން ބުނެވުނެވެ. އިންޖާބު ކިތަންމެ ހަރުކަށިކަން ދެއްކި ނަމަވެސް ޚުދު އޭނަގެ ހިތަށްވެސް ވަނީ ފާޑެއްގެ ގޮތެއް ވެފައެވެ. އެފަދަ ކަމެއް ނާވީ ކޮންފާނެކަމުގައި އޭނަ ހުވަފެނުންވެސް ދެކެފައެއް ނުވެއެވެ. "ކޮބާ ނާވީ؟" އިންޖާބުގެ އިތުރު ސުވާލެއް އެ ދެމީހުންނާ އަމާޒުވީ ނާވީ ގަނޑުވަރުގައި ނެތްކަން އޭނައަށް އެނގޭތީއެވެ. "ކޮބާހޭ ނާވީ؟ އޭނަ ކޮންތާކުވީ؟ ރައާބިލްއާއެކުގަތަ ވީ؟" "އިންޖާބު..." ނަމީރާ ޝައިސްތާއަށް ޖަވާބެއް ނުދެވި އުޅެނިކޮށް ދެން އިވުނީ ބަތީލާގެ އަޑެވެ. އޭނަ އައިސް އިންޖާބާ އަރާ ހަމަކޮށްލިއިރު، އޭނަގެ ދެލޯވެސް ވަނީ ފެންކަޅިވެފައެވެ. ވެގެން އުޅޭ ގޮތް އޭނައަށް ވެސް ފަހުމް ވެއްޖެއެވެ. "މި ދެމީހުން ދައްކާ ވާހަކަ އަޑު އިވޭތަ އެބަ ބަތީލާ... ރައާބިލް ފިލަން އެހީތެރިވީ ނާވީއޯ... " އިންޖާބުގެ ރުޅިވެރިކަމަށް ބަދަލެއް ނާދެއެވެ. އޭނައަށް ބަތީލާއަށް ބަލައިލެވުނުއިރު، ބަތީލާގެ ދެލޮލުގައިވި ކަރުނައިގެ އަސަރުތަކުން އެހިތް މަޑުވެލަން އުޅުނެވެ. އެހެންނަމަވެސް އެ މޫނުމަތީން ދެން ފެންނަމުން ދިޔަ އަސަރުތަކުން، އެކަން ބަތީލާއަށް އެނގޭކަން، އިންޖާބަށް ފަހުމްވިއެވެ. "ބަތީލާ... ބަތީލާއަށްވެސް އެނގޭތަ؟" އިންޖާބުގެ އަޑަށް ހައިރާންކަން ވެރިވިއެވެ. ބަތީލާ ކުށްވެރިއެއް ފަދައިން އިސްޖަހައިލިތަން ފެނި، އޭނައަށް ދެބުމަ ގާތްކޮށްލެވުނެވެ. ދެން ބަލައިލެވުނީ ނަމީރާއި، ޝައިސްތާއަށެވެ. "މިތަނުގައި އެއްވެސް ކަމެއް ނޭނގެނީ އަހަންނަށް އެކަނި ދޯ... ހަމަމިހާރު ހުރިހާކަމެއް އަހަންނަށް ކިޔައިދީ!" އެއިން އެކެއްގެ ފަރާތުންވެސް ޖަވާބެއް ނާންނާނެކަން އިންޖާބަށް އެނގެއެވެ. އެ ތިން މީހުންވެސް އިންތިހާއަށް ނާވީ ދެކެ ލޯބިވެއެވެ. ވީއިރު ނާވީއަށް ގެއްލުމެއް ވާން އެމީހުން އެދޭނީވެސް ކިހިނަކުން ހެއްޔެވެ؟ " އެންމެ ރަނގަޅު. އެކަކުވެސް ވާހަކަ ދައްކާކަށް ބޭނުމެއް ނުވިއެއްނު. ދެން ހުރިހާކަމެއް ހޯދާނީ އަހަރެން އަމިއްލައަށް." އިންޖާބު ގާތަށް ރުޅި އައެވެ. އޭނަ ބަތީލާއަށްވެސް ބަލައިލިއެވެ. އިންޖާބު ކަންތައްކޮށްފާނެ ގޮތަކާ މެދު ހާސްވެފައިވާ ބަތީލާ، ހިންދިރުވައިލިއެވެ. އިންޖާބަށް ކަންތައް ސިއްރުކޮށްގެން ވާނެ ފައިދާއެއް ނެތްކަން އޭނައަށް އެނގޭ ޙާލު ނަމީރާ ޝައިސްތާއަށް ބަލައިލެވުނެވެ. އޭރުވެސް ރޮމުން ދިޔަ ޝައިސްތާ ދެފަރާތަށް ބޯ ހޫރައިލިއެވެ. ނޫނެކޭ ބުނުމުގެ ގޮތުންނެވެ. "އިންޖާބު. އަހަރެން ހުރިހާ ވާހަކައެއް ކިޔައިދޭނަން." އެތަނުން ދާންވެގެން އިންޖާބު އަވަސްވެގަތް ވަގުތު އޭނަގެ އަތުގައި ހިފައްޓަމުން ބަތީލާ ވާހަކަ ދެއްކިއެވެ. އިންޖާބު މަޑުކުރުމާއެކު ބަތީލާ އިންޖާބަށް ބަލައިލުމަށްފަހު ވަގުތުން އަތުން ދޫކޮށްލައިފިއެވެ. "މަންމާ... ނޫން... ނާވީ..." ޝައިސްތާއަށް ބުނެވުނެވެ. ނަމީރު ޝައިސްތާ އޭނާގެ ގަޔާ ގާތްކޮށްލީ ހިތްވަރު ދިނުމުގެ ގޮތުން ނަމަވެސް، ޚުދު އޭނަގެ ހިތްވެސް ދިޔައީ ނާވީއަށްޓަކައި ބިރުން ތުރުތުރު އަޅަމުންނެވެ. އޭނައަކީ އިންޖާބުގެ އުފަން ދަރިއަކަށްވީ ހިނދުވެސް އެ ބައްޕަ ވަނީ އޭނައަށް ވެސް އަނިޔާވެރިވާން ފަސްނުޖެހޭނެކަން ސާބިތުކޮށްދީފައެވެ. ވީއިރު ނާވީއާ މެދު ވެސް އަމަލުކުރާނީ އެ އުސޫލުންކަން އޭނައަށް އެނގެއެވެ. ރައާބިލް ފަދައިން ނާވީ އެ ބިންގަރާހުގައ ގައިދުވާން އޭނަ އެދޭނީ ކިހިނަކުން ހެއްޔެވެ؟ އެ އަނިޔާތައް ނާވީއަށް ލިބޭތަން ބަލަން ކެތްކުރާނީ ކިހިނަކުން ހެއްޔެވެ؟ އުމުރު ދުވަހު އަނިޔާގައި ހޭދަކުރާތަން ބަލާނީ ކިހިނަކުން ހެއްޔެވެ؟ ނާވީ ކުރީކުށެއްކަން އޭނައަށް ނޭނގެނީއެއް ނޫނެވެ. އެހެންނަމަވެސް، އެފަދަ އަނިޔާއެއް ލިބެން ރުހެވޭނީ ކިހިނަކުން ހެއްޔެވެ؟ "ވާހަކަ ކުރިއަށް ގެންދޭ..." އިންޖާބުގެ ހަރުކަށިކަމަށް ބަދަލެއް ނާދެއެވެ. "އިންޖާބު..." ބަތީލާ އިންޖާބަށް ގޮވައިލިއެވެ. އޭނަ ބޭނުންވީ ރުޅި މަޑުކުރަން ބުނަން ނަމަވެސް، ދެން ކިޔައިދޭ ވާހަކަތަކުން އޭނަ އިތުރަށް ރުޅި އަންނާނީކަން އެނގި ބަތީލާ ހިމޭންވީއެވެ. "ކިހިނެއްވީ؟ ބަތީލާ..." އިންޖާބު ގޮބައިލިއެވެ. "ނާވީ... ނާވީ ލޯބިވަނީ...." އެހިސާބަށް ބުނެފައި ބަތީލާ މަޑުޖެހުނެވެ. އޭނައަށް ފަހު ފަހަރަށް ނަމީރަށް ބަލައިލެވުނެވެ. އެ ނަޒަރުން އޭނައަށް މާފުކުރާށޭ ބުނާ ކަހަލައެވެ. "ނާވީ ލޯބިވަނީ....؟" އިންޖާބު ތަކުރާރުކޮށްލިއެވެ. ފާއިތުވަމުން ދިޔަ ކޮންމެ ސިކުންތަކާ އެކު އޭނަގެ ކެތްތެރިކަން ކޮޅުންލަމުން ދިޔައެވެ. "އިންސިއެއް.... އިންސިއެއް ދެކެ...." ޖެހިލުންވި ނަމަވެސް ބަތީލާ ހާމަކޮށްލިއެވެ. އެހެން ބުނެލިއިރު ފުންނޭވާއެއް ދޫކޮށްލަމުން އޭނަ ދެލޯ މަރައިލިއެވެ. ހީވީ އަމިއްލަ މީހާގެ އިޙްސާސްތައް ކޮންޓްރޯލް ކުރަން މަސައްކަތްކުރަމުން ދިޔަހެންނެވެ. ބަތީލާގެ އަޑު ނުކުތީ ކިތަންމެ މަޑުން ނަމަވެސް، އިންޖާބުގެ ކަންފަތާ ހަމައަށް އެ އަޑު ފޯރީ ހޮނު ގުގުރިހެއް ހެންނެވެ. ހައިރާންވީ ވަރުން ދެބުމަ ގާތްކޮށްލެވުނުއިރު، ތަނުގައިވި ތޫފާނީ ވައިރޯޅިތަކަށް ވެސް އަސަރުކުރިއެވެ. ކޮންމެވެސް ވަރަކަށް ވައިރޯޅިތައް ހިނދުނެވެ. "ކީކޭ؟" އޭނައަށް އެހެން އަހައިލެވުނުއިރު ހައިރާންކަން އެ އަޑުން ފާޅުވަމުން ދިޔައެވެ. އެވަގުތު މީގެ ފަންސަވީސް އަހަރުކުރީން ރައާބިލް ބުނެލި ޖުމްލަތަކެއް އޭނަގެ ކަންފަތުގައި ގުގުމާލައިފިއެވެ. "އަހަންނަށް މި އަނިޔާ ދީފައި ކަލޭމެން އެކަކަށް ވެސް ހަމަޖެހުމެއް ނުލިބޭނެ. މިއަދު ނޫނީ މާދަން. މަގޭ އަރުތެރޭ ލީ ހިތިރަހަ ކަލޭމެންގެ އަރުބުޑުގައި ވެސް އަދި ލާނެ. ހަނދާންކުރައްޗޭ" ރައާބިލް އެބުނި ބަސްތައް ހަޤީޤަތަކަށްވަނީ ހެއްޔެވެ؟ އޭނަ އެންމެ ލޯބިވާ ކާފަ ދަރިފުޅު އެފަދަ ކުށެއް ކުރީ ހެއްޔެވެ؟ އިންޖާބުގެ ހިތަށް ފާޑަކަށް ފިނިވެލިއެވެ. "ނާވީ ކޯންޗެކޭ؟ އިންސާނެކޭ... ލޯބިވަނީއޭ؟" ދެވަނަ ސިކުންތުގައި އޭނަގެ އަޑު ބާރުވެގެން ދިޔައެވެ. ޤަބޫލުކުރަން ބޭނުންނުވެފައުވާ ފަދައަކުން ފަހަރަކު މީހެއްގެ މޫނަށް ބަލައިލެވުނެވެ. ބަތީލާ އެބުނީ ފަހަރެއްގައިވެސް އޭނަ އުންމީދުކޮށްގެން ހުރި ވާހަކައެއް ނޫނެވެ. މިހުރިހާ ދުވަސްވީއިރު ނާވީ އެފަދަ ކަމެއްގެ ހިލަމެއް ވެސް އޭނައަށް ވިޔަކަ ނުދެއެވެ. އަނެއްކާ ނާވީ އެހާ ގަނޑުވަރާ ދުރުގައި އުޅޭ ސަބަބަކީ އެއީ ހެއްޔެވެ؟ އޭނަ ހީކުރީ އެއީ ނާވީ ތަންތަނަށް ދަތުރުކުރާހިތްވާތީ އުޅޭ ގޮތެއް ކަމުގައެވެ. ނާވީ ދެކެ އިންތިހާއަށް ލޯބިވާތީ، އޭނަވެސް ކާފަދަރިފުޅަށް ދޫ ދިނީއެވެ. މިނިވަންކަން ދިނީއެވެ. އެމިނިވަންކަމާ ލޯބީގައި އެފަދަ ގޮތަކަށް ކޮޅުފައިން ޖަހާފާނެ ކަމަށް އޭނަ ދުވަހަކުވެސް އުންމީދެއް ނުކުރެއެވެ. ޔަޤީންކޮށްދޭށޭ ބުނާފަދައަކުން ބަތީލާއައަށް ބަލައިލެވުނެވެ. ބަތީލާ ބޯ ޖަހާލާފައި މިފަހަރުވެސް އިންޖާބާ ނަޒަރު ވަކިކޮށްލީއެވެ. ނަމީރާ ޝައިސްތާގެ ޙާލަކީވެސް އެއީއެވެ. "ކިހާ ދުވަހެއް ވެއްޖެ މިކަމެއް ހިނގާތާ؟ ކޮބާ ނާވީ މިހާރު؟ އެ އިންސި ކައިރީގަތަ؟" އިންޖާބަށް ސުވާލުކުރެވުނެވެ. ރައާބިލް މިނިވަންކުރި ސަބަބުވެސް އޭނައަށް އިތުރަށް ކިޔައިދޭކަށް އެކަކަށްވެސް ނުޖެހުނެވެ. އިންޖާބުގެ ވިސްނުންތޫނު، ތަޖުރިބާކާރު ސިކުނޑިއަށް ހުރިހާކަމެއްވެސް ނަގައިގަނެވިއްޖެއެވެ. "ނަމީރު... ޝައިސްތާ...ބަތީލާ... ކޮބާހޭ ނާވީ؟ އެ އިންސި ކައިރީގަތަ؟ ރައާބިލް މިހާރު ކޮބާ؟" އިންޖާބު ވަކިވަކީން ފަހަރަކު މީހަކަށް ގޮވައިލިއެވެ. އެ ތިން މީހުންނަށް އެހުރިހާކަމެއް ވެސް އެނގޭނެކަން އިންޖާބަށް ޤަބޫލުކުރެވެވެއެވެ. ރަނީމްއަކީ އިންސާނެއް ނޫންކަމުގައި ބުނަން ނަމީރުގެ އަނގަ ހަރަކާތްކޮށްލި ނަމަވެސް ޝައިސްތާ އެކަމަށް ހުރަސް އެޅިއެވެ. ކޮންމެ ގޮތަކަށް ކަންތައްވިޔަސް، ރަނީމްއަށް އޮތީ ނުރައްކަލެވެ. ރަނީމް އިންސާނަކަށް ވުމުގެ ނުރައްކަލަށް ވުރެ، އެއީ އެމީހުންގެ ނަސްލުގެ މީހެއްކަން އެނގުމުން ލިބޭ އަނިޔާ ބޮޑުވާނެކަމުގައި އޭނައަށް ޤަބޫލުކުރެވެނީއެވެ. އެއީ ރައާބިލް އާއި ސަމްރާގެ ދަރިއެވެ. ވީއިރު އިންޖާބު ރަނީމްއަށް ގެއްލުން ދީފާނެއެވެ. ބަތީލާއަކަށްވެސް އަދި ރަނީމްގެ ހަޤީޤަތެއް ނޭނގެއެވެ. ނާވީ އާ އެ ރަނީމްގެ، ވާހަކަތައް ކިޔައިދިން އިރު، ރަނީމްގެ ޙަޤީޤަތާ ރަނީމްއަކީ ރައާބިލްގެ ދަރިކަން އެމީހުން ވަނީ ބަތީލާއަށް ސިއްރުކޮށްފައެވެ. އެހެންކަމުން ބަތީލާ ހީކުރަނީ އެއީ އިންސާނެއް ކަމުގައެވެ. "އަހަރެން ކަންތައްތައް ހޯދައިފިނަމަ މާ ރަނގަޅެއް ނުވާނެ..." އިންޖާބު އަނެއްކާވެސް އިންޒާރެއް ދިނެވެ. ނަމީރާ ޝައިސްތާގެ އިތުރުން ބަތީލާއަށް މަޖުބޫރުވީ، އެމީހުންނަށް އެނގޭ މިންވަރަށް ވާހަކަތައް ކިޔައިދިނުމަށެވެ. އެމީހުން ވާހަކަ ދައްކަމުން ދިޔަ ވަރަކަށް އިންޖާބުގެ ރުޅިގަނޑު އިތުރަށް ހިލުން ނޫންކަމެއް ނުވިއެވެ. "އަހަރެން ބޭނުން ހަމަ މިހާރު އެ ރަށަށް ދާން... " އިންޖާބު ބުންޏެވެ. މީގެ ކުރިން ސަމްރާ އުޅުނު ރަށުން ރައާބިލް ނުފެނުނު ސަބަބު އޭނައަށް ފަހުމްވީ ދެނެވެ. އެ ދުވަހު ނަމީރަށް ފުރުސަތު އޮވެމެ އެކަން ސިއްރުކުރުމުން ވެސް އޭނަ ހިތްހަމަ ނުޖެހުނެވެ. "ނަމީރު މަސައްކަތްކުރީ ނާވީއާ ރައާބިލްއާ ދެމީހުން ހިމާޔަތްކުރަން... އަހަރެން ހިޔެއްވެސް ނުކުރަން ތިކަމުގައި ކަލޭމެން އެންމެން ހިއްސާ ވާނެކަމަށް." އިންޖާބު ބުންޏެވެ. "ހިނގާ އަހަންނާއެކު." އިންޖާބު އެ އެންމެންނަށް ބަލައިލިއެވެ. ގަނޑުވަރުގެ އެއްވެސް ސިފައިންގެ މީހަކު ނުލާ އިންޖާބު އެ ތިންމީހުންނާއެކު ސަމްރާމެން ރަށަށް ދާންވެގެން އަވަސްވެގަތެވެ. އޭރު މެންދަމުން އަލިވެ ދޭއް ޖަހާ ބޮޑުވެއްޖެއެވެ. ***** "ކަންބޮޑުނުވޭ ސަމްރާ... ރަނީމް ހުރީ ނާވީއާއެކުގައޭ... އޭނަ ރަނީމްއަށް ގެއްލުމެއް ވާން ދޫކޮށްލަފާނެހެން ސަމްރާއަށް ހީވޭތަ؟" ރައާބިލް ސަމްރާގެ އަތުގައި ހިފައްޓާލައިގެން އިނދެ ބުނެލިއެވެ. އޭނަ އިނީ ލުއިލުއިކޮށް ހިނިތުންވެލައިގެންނެވެ. ސަމްރާ އަދިވެސް ރަނީމްއާ މެދު ހާސްވެފައިވާކަން އޭނައަށް އެނގެއެވެ. ލަސްލަހުން ސަމްރާ ބޯ ޖަހައިލުމަށްފަހު، ހިނިތުންވެލި ވަގުތު، ގޭގެ ފުރާޅުމައްޗަށް އެއްޗެހިތަކެއް ފައިބައިގަތްފަދަ އަޑެއް އިވުނެވެ. ހަމައެއާއެކު ކޮޓަރި ތެރެ އާދަޔާ ޚިލާފަށް ފިނިވެލިއެވެ. އަރައިގެން ދިޔަ ފެހިނޫ އައްޔާއެކު، ޖެހިލި ރޯޅިއާއެކު އެތަނުން ދެން ފެނިގެން ދިޔައީ އިންޖާބާ އޭނަގެ ޢާއިލާއެވެ. ރައާބިލްގެ އިތުރުން ސަމްރާގެ ލޮލުގައިވެސް އެ އެންމެން އަޅައިގަތެވެ. ސަމްރާގެ ތުންފަތުގައިވި ހިނިތުންވުން ފަނޑުވެގެން ދިޔައިރު، މުޅި މީހާ ތުރުތުރު އަޅަން ފަށައިފިއެވެ. ރައާބިލްއަށްވެސް ސަމްރާގެ އަތުން ދޫކޮށްލެވުނީ ލިބުނު ސިހުމުގައި ކުއްލިއަކަށެވެ. އެހެންނަމަވެސް ދެވަނަ ސިކުންތުގައި އޭނަ ސަމްރާއަށް އެ މަންޒަރު ނުފެންނަ ގޮތަށް ހުއްޓުނެވެ. އެހެންނަމަވެސް ކޮންމެވެސް ވަރަކަށް ސަމްރާއަށް އެ މީހުން ފެނެއެވެ. މާޒީގެ ހަނދާންތައް އައިސް އޭނަގެ ލޯމަތީގައި ތަކުރާރުވާން ފެށިހެން ސަމްރާއަށް ހީވާން ފެށުމުން އޭނާގެ ދެލޯ ވަގުތުން ފެންކަޅިވެގެން ދިޔައެވެ. "ނަމީރު..." ފަހަރަކު މީހެއްގެ މޫނަށް ބަލައިލުމަށްފަހު، ރައާބިލްއަށް އޭނަގެ ދުލުން ބޭރުކޮށްލެވުނީ ނަމީރުގެ ނަމެވެ. ކޮންމެ ފަހަރަކު، އޭނައަށް އަނިޔާވެރިވަނީ ނަމީރެވެ. ނަމީރު އިސްޖަހައިލިތަން ފެނި ރައާބިލްއަށް ހިތިގޮތަކަށް ހީލެވުނެވެ. ސަމްރާ އެނދުގައި އޮވެ އޭނަގެ ކަނާއަތް ހަރަކާތްކޮށްލާފައި ރައާބިލްގެ އަތުގައި ހިފައްޓަން މަސައްކަތްކުރިއެވެ. "ކަންބޮޑުނުވޭ ސަމްރާ.." އެ ތިން މީހުންގެ ކުރިމަތީގައި އޭނައަށް ކުރެވޭނެ މާ ބޮޑުކަމެއް ނެތްކަން ޚުދު ރައާބިލްއަށްވެސް އެނގެއެވެ. ދެންވެސް އެމީހުންގެ ކުރިމަތީގައި އޭނަ ބަލިކަށިވާނެއެވެ. މިހާރު އަދި ކުރިއަށް ވުރެ ބޮޑަށެވެ. އޭނަގެ ވަރައެއް ނެތެވެ. އެ ވަރައާއެކު އޭނަގެ ބައެއް ބާރުތައްވެސް ވަނީ ނެތިގެން ގޮސްފައެވެ. "ލިބުނު އަނިޔާއަށްފަހު ވެސް ގޮތް ދޫކުރާކަށް ބޭނުމެއް ނުވި ދޯ...." އިންޖާބުގެ ބާރު އަޑު ތަނަށް ފެތުރިގެން ދިޔައެވެ. "ކަލޭ ހީކުރީ އަހަންނަށް ކަލޭ ވީތަނެއް ނުހޯދޭނެކަމަށްތަ؟" "އެނގޭ ހޯދޭނެކަން. އެނގޭ އެކަމުގައި އެހީތެރިވާނީ ނަމީރުކަންވެސް. މީގެ ކުރިންވެސް އޭނަ ކަންތައްކުރީ އެހެން. އަހަރެންގެ އެންމެ ގާތް ރަޙްމަތްތެރިއެއްގެ ގޮތުގައި ހުރެވެސް. މިއަދު ލަދުގަނޭ އެއީ އެއްއިރެއްގައި އަހަރެންގެ އެކުވެރިއެކޭ ބުނަންވެސް..." ރައާބިލް ހުރީ ސާބިތު ކަމާއެކުގައެވެ. އޭނަ އެންމެ ފަހުނޭވާއާ ޖެހެންދެން ސަމްރާ ހިމާޔަތްކުރާނަމޭ ބުނަމުން ދިޔަފަދައެވެ. ރައާބިލް އެބުނި ބަސްތަކުން ނަމީރުގެ ހިތަށް އަސަރުކުރިއެވެ. އޭނަގެ ހިތުން އަދިވެސް މާޒީގެ ރިހުންތައް ފިލައިގެނެއް ނުދެއެވެ. މި ވީ އަހަރުތަކުގައި އެކަންތައް ހިތުގެ ތެރޭގައި ރައްކާކޮށްގެން އުޅުނު ނަމަވެސް، އަލުން އަނެއްކާވެސް އެ ހުރިހާ އިޙްސާސެއް ހޭލައިގަތްފިއެވެ. "ކޮބާ އަހަރެންގެ ދަރިފުޅު ނާވީ؟ އޭނަ އިންސިއަކާ ގުޅިގެން އުޅެން ހިތްވަރު ދެނީ ކަލޭކަން އަހަންނަށް އެނގޭ..." އިންޖާބު އެހެން ހުރެފައި ދެން އަހައިލި ސުވާލާއެކު، ވެގެން އުޅޭ ގޮތް ރައާބިލްއަށް ސާފުވިއެވެ. އޭނައަށް ނަމީރަށް ބަލައިލެވުނެވެ. ރަނީމްގެ ހަޤީޤަތްވެސް ކިޔައިދިނީހެއްޔޭ އޭނަ ސުވާލުކުރާ ފަދައެވެ. ނަމީރު ދެފަރާތަށް ބޯ ހޫރައިލި ގޮތުންނާ އިންޖާބުގެ ވާހަކަ ހުރި ގޮތުން ހުރިހާކަމެއް އަދިވެސް އިންޖާބަށް ނޭނގޭކަން ރައާބިލްއަށް އެނގުނެވެ. އެހެންނަމަވެސް އެކަމަކުން އެ ހިތަކަށް ހަމަޖެހުމެއް ނުލިބުނެވެ. ދެން ބުނާނެ އެއްޗަކާ މެދު ރައާބިލްއަށް ވިސްނެމުން ދިޔައިރު، އޭނައަށް ޚިޔާރުކުރެވުނީ ހިމޭންކަމެވެ. ***** ނާވީއާއެކު އެ ފަޅުރަށުގައި އުފާވެރި ވަގުތުތަކެއް ރަނީމް ހޭދަކުރިއެވެ. އޭނަގެ ބާރުތައް ބޭނުންކުރާނެ ގޮތްތައް ނޭނގުނު ނަމަވެސް، އެކަންތައް ނާވީ ދިޔައީ މަޑުމަޑުން ބުނެދެމުންނެވެ. ނާވީ ރަނީމްއާ ކުރިމަތިލައިގެން ހުރުމަށްފަހު، އޭނަގެ އަތުގައި އޮތް އުޅާ ދައްކައިލިއެވެ. ރަނީމް ހިނިތުންވެލާ އޭނަގެ އަތް ދިއްކޮށްލުމުން ނާވީ ރަނީމްގެ އަތުގައި އުޅާ އަޅައިލަދިނެވެ. އަދި އޭނަ އެ އަތުގައި ބޮސްދިނެވެ. އެއަށްފަހު، ނާވީ ރަނީމް ގޮވައިގެން ދިޔައީ ރަނީމްމެން ރަށަށެވެ. ރަނީމްއާއެކު ގެއަށް ވަނުމަށްފަހު، ކޮޓަރިއާ ދިމާލަށް މިސްރާބުޖެހި ނާވީގެ ފިޔަވަޅުތައް ހުއްޓުނެވެ. މޫނުމަތީން ފެނުނު ހާސްކަމާއެކު އޭނަ ވަގުތުން ރަނީމް ގެނެސް ގަޔާ ކައިރި ކޮށްލައިފިއެވެ. (ނުނިމޭ)