ދިރާސީ އާ އަހަރުގެ ކިޔެވުން މިއަދު ފެށިއިރު، ބައެއް ސްކޫލުތަކުގެ ދަރިވަރުންނަށް އަދިވެސް ފޮތްތައް ހަމަނުވާކަން އެނގިއްޖެ އެވެ.
ތަފްސީލް - ދޮޅުމަސް ދުވަހުގެ ޗުއްޓީއަކަށް ފަހު، ސަރުކާރުގެ 219 ސްކޫލެއްގައި ވަނީ މިއަދު ކިޔެވުން ފަށާފަ އެވެ. އެކަމަކު 'ދައުރު'އަށް އެނގިފައިވާ ގޮތުގައި، ބައެއް ރަށްރަށުގެ ސްކޫލުތަކުގެ ދަރިވަރުންގެ ފޮތްތައް އަދިވެސް ނުލިބެ އެވެ. ބައެއް ސްކޫލުތަކުގައި ފޮތްތައް ހަވާލުކުރުން އިއްޔެ ވެސް ކުރިއަށް ގެންގޮސްފައިވެ އެވެ.
ސްކޫލުތަކަށް ފޮތްތައް ފޮނުވާ ނިމިފައިވޭތޯ 'ދައުރު'ން ސުވާލުކުރުމުން، އެޑިއުކޭޝަން މިނިސްޓްރީން ވަކި ޖަވާބެއް ދީފައެއް ނުވެ އެވެ.
އެކަމަކު މިނިސްޓަރު ޑރ. އިސްމާއިލް ޝަފީއު ބައެއް މީޑިއާތަކަށް ވިދާޅުވެފައިވާ ގޮތުގައި، ސްކޫލުތައް މި ހުޅުވީ ފުރިހަމައަށް ތައްޔާރުވެގެންނެވެ. ދަރިވަރުންނަށް ބޭނުންވާ ހުރިހާ ފޮތްތަކެއް ސްކޫލުތަކަށް މިހާރު ފޮނުވާ ނިމިފައިވާއިރު، ސްކޫލުތަކަށް ޓީޗަރުން ހަަމަވާނެ ކަމަށް ވެސް އޭނާ ވިދާޅުވެފައިވެ އެވެ.
އެނގުން މުހިންމު - އަހަރީ ބޮޑު ޗުއްޓީއަށް ފަހު 80،000އަށް ވުރެ ގިނަ ދަރިވަރުން މިއަދު ސްކޫލަށް ނުކުމެފައިވެ އެވެ. މިނިސްޓްރީން އެންމެ ފަހުން އާއްމުކުރި ތަފާސްހިސާބުތަކަށް ބަލާއިރު:
މި އަހަރު ޕްރީ ސްކޫލު ނިންމައި 4،700އަށް ވުރެ ގިނަ ދަރިވަރުން ގްރޭޑް އެކަކަށް ބަދަލުވި
ރަށްރަށުގެ ސްކޫލުތަކުން މާލެއަށް 1،500އެއްހާ ދަރިވަރުން ބަދަލުވި
މާލެއިން ހުޅުމާލޭގެ ސްކޫލުތަކަށް 800އަށް ވުރެ ގިނަ ދަރިވަރުން ބަދަލުވި