ދަރިވަރުން ދުވަސް ފަށަނީ ފަތިސް ނަމާދުކޮށްގެންތޯ ބެލުމަކީ މައިންބަފައިންގެ ޒިންމާއެއް ކަމަށާއި، އެކަން ކަށަވަރުކޮށްދެއްވުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެދިވަޑައިގެންފިއެވެ. ރައީސް މިކަމަށް އެދިވަޑައިގަތީ ހުޅުމާލެ ފޭސް 2 ގައި މިއަދު ހުޅުވި ޝަހީދު އަލީ ސްކޫލް ރަސްމީކޮށް ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.
މި ރަސްމިއްޔާތުގައި ރައީސް ވިދާޅުވީ، ކޮންމެ ކުއްޖަކު ވެސް ގަޑިއަށް ހޭލައި، ނަމާދުން ދުވަސް ފެށުމަށް އަޒުމް ކަނޑައަޅަންޖެހޭ ކަމަށެވެ. އަދި މިކަން ކުރުމުގައި މައިންބަފައިންގެ ދައުރު ބޮޑުކަން ފާހަގަކުރައްވައި، ދަރިން ނަމާދުކުރޭތޯ ބެލުމަށް ހުރިހާ ބެލެނިވެރިންނަށް ވެސް އެމަނިކުފާނު އިލްތިމާސްކުރެއްވިއެވެ.
ރައީސްގެ ވާހަކަފުޅުގައި، ދަރިވަރުންގެ މުސްތަގުބަލު ބިނާކުރުމުގައި އެންމެ މުހިންމު ކަމަކީ ހަރުދަނާ ބިންގަލެއް ކަމަށް ވިދާޅުވިއެވެ. އެގޮތުން ނަމާދަށް ފަރުވާތެރިވުމާއި، މައިންބަފައިންނާއި ޓީޗަރުންނަށް ކިޔަމަންތެރިވެ، ސްކޫލުން އަންގާ ގޮތަށް އަމަލުކުރުމުން އެޅިގެންދާ ބިންގަލަކީ ގުޑުވާނުލެވޭނެ ވަރުގަދަ ބިންގަލެއް ކަމަށް އެމަނިކުފާނު ސިފަކުރެއްވިއެވެ. އަދި ބިންގާ ބަލިކަށިވެ ރެނދުއަޅާފައިވާނަމަ، ކިޔަވައި ނިމިގެން ނުކުންނައިރު ހަޔާތުގައި ދަތިތަކާ ކުރިމަތިލާން ޖެހިދާނެކަން ފާހަގަކުރެއްވިއެވެ.
މީގެއިތުރުން، ދަރިވަރުން ނަފްސާނީ ގޮތުން ތައުލީމަށް ތައްޔާރުކުރުމަކީ ޓީޗަރުންނާއި ބެލެނިވެރިންގެ މަސްއޫލިއްޔަތެއް ކަމަށާއި، ސަރުކާރުން އެކަމަށް ބޭނުންވާ އެހީތެރިކަން ފޯރުކޮށްދޭނެ ކަމަށް ވެސް ރައީސް ވިދާޅުވިއެވެ. މި މޭރުމުން ވާހަކަފުޅު ދައްކަވަމުން، ނުކުޅެދުންތެރިކަން ހުންނަ ކުދިންނަށް ވެސް ފުރުސަތުތައް ފަހިކޮށްދިނުމުގެ ސިޔާސަތުގެ ދަށުން، ޝަހީދު އަލީ ސްކޫލުގައި ވެސް އެ ވަސީލަތްތައް ގާއިމުވެފައިވާކަން އެމަނިކުފާނު ފާހަގަކުރެއްވިއެވެ.
ރައީސް ވަނީ ލިބިފައިވާ ތައުލީމީ ފުރުސަތުތަކުގެ ބޭނުން އެންމެ ހެޔޮގޮތުގައި ހިފައި، ދީނީ ގޮތުން ރަނގަޅު އަގީދާއެއްގެ މަތީގައި ތިބެ، އަހުލާގު ރަނގަޅު ދަރިންތަކަކަށް ވުމަށް ހުރިހާ ދަރިވަރުންނަށް ގޮވާލައްވާފައެވެ. މިއަދު ހުޅުވުނު ޝަހީދު އަލީ ސްކޫލަކީ 2000 އަށް ވުރެ ގިނަ ދަރިވަރުންނާއެކު ކިޔަވައިދޭން ފެށި، ޒަމާނީ ވަސީލަތްތައް ހިމެނޭ ސްކޫލެކެވެ.