އަންނަ ކައުންސިލު އިންތިޚާބުގައި ވާދަކުރާ ކެންޑިޑޭޓުންގެ ކުށާއި ދަރަނީގެ ރެކޯޑުތައް ސާފުކުރުމަށް އެތައް ދުވަހެއް ނަގާ ކަމަށާއި، އިލެކްޝަންސް ކޮމިޝަނުން އިންތިޚާބުގައި ވާދަކުރަން ހުޅުވާލި މުއްދަތު ކުރު ކަމަށް ބުނެ، އިދިކޮޅު އެމްޑީޕީން މިއަދު ކަންބޮޑުވުން ފާޅުކޮށްފިއެވެ. އޭޕްރިލް މަހުގެ ހަތަރުވަނަ ދުވަހު އޮންނަ އިންތިޚާބުގައި ވާދަކުރާ ކެންޑިޑޭޓުން ކުރިމަތިލާން ޖެހޭނީ އިލެކްޝަންސް ކޮމިޝަނުގެ މައިޕޯޓަލް މެދުވެރިކޮށެވެ. އިލެކްޝަންސް ކޮމިޝަންގެ އޮންލައިން ޕޯޓަލް މެދުވެރިކޮށް އިންތިޚާބަށް ކުރިމަތިލުމަށް ހުޅުވާލީ މިމަހުގެ 17ވަނަ ދުވަހެވެ. އެ ފުރުސަތު ހުޅުވާލީ އަންނަ އާދީއްތަ ދުވަހުގެ ދަންވަރު 12 ޖެހުމުގެ ނިޔަލަށެވެ. އެ މުއްދަތު ކުރު ކަމަށް ބުނެ، އެމްޑީޕީގެ ރަސްމީ ސޯޝަލް މީޑިއާ އެކައުންޓްތަކުގައި ކުރި ޕޯސްޓެއްގައިވަނީ، އިންތިޚާބުގައި ވާދަކުރާ ކެންޑިޑޭޓުންގެ ކަންކަން ފުރިހަމަކުރުމުގައި ދަތިތައް ދިމާވަމުން އަންނަ ކަމަށެވެ. އެގޮތުން ކަރެކްޝަންސް އާއި ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ)އާއި އެންޓި-ކޮރަޕްޝަން ކޮމިޝަން (އޭސީސީ)އާއި ޕްރޮސެކިއުޓަރު ޖެނެރަލުގެ އޮފީސް ފަދަ އިދާރާތަކުން ކުށުގެ ރެކޯޑު ސާފުކޮށް، ފުރިހަމަކުރަންޖެހޭ އެހެނިހެން ކަންކަން ފުރިހަމަކުރުމަށް ވަގުތު ނަގާ ކަމަށް، އެ ޕޯސްޓުގައިވެއެވެ. "ދައުލަތުގެ އިދާރާތަކުން ރިކޯޑް ސާފުކުރުމާއި އެހެނިހެން ކަންކަން ފުރިހަމަކުރުމަށް އެތަކެއް ދުވަހެއް ނަގާތީ، މިއީ ފޯމު ހުށަހެޅުމަށް އެކަށީގެންވާ މުއްދަތެއް ނޫންކަން ފާހަގަކޮށް، މިކަމުގެ ސަބަބުން އެތައް ބަޔަކަށް އިންތިޚާބަށް ކުރިމަތިލުމުގެ ފުރުސަތު ގެއްލިދާނެކަމުގެ ކަންބޮޑުވުން ފާޅުކުރަމެވެ،" އެ ޕޯސްޓުގައި ލިޔެފައިވެއެވެ. އެހެންވެ، އެކަން ހައްލުކޮށްދިނުމަށް އެމްޑީޕީން ވަނީ އިލެކްޝަންސް ކޮމިޝަނަށް ގޮވާލައިފައެވެ. އެމްޑީޕީން މިފަދައިން ޕޯސްޓުކުރިއިރު، އަންނަ ކައުންސިލު އިންތިޚާބުގައި ވާދަކުރާ ކެންޑިޑޭޓުންގެ ކުށުގެ ރެކޯޑު ސާފުކުރުމަށް އެއްފަހަރާ ގިނަ ފޯމުތައް ފޮނުވުމުން، ކަރެކްޝަންސްގެ ސާވާއަށް ލޯޑު ބޮޑުވެ، ކުށުގެ ރެކޯޑު ސާފުކުރުމުގައި ދަތިތައް ކުރިމަތިވެފައިވާ ކަން އެ ޚިދުމަތުން ވަނީ މިއަދު ހާމަކޮށްފައެވެ. އެ މައްސަލަ ހައްލުކުރުމަށް މަސައްކަތްކުރަމުން އަންނަ ކަމަށް ބުނުން ފިޔަވައި ކަރެކްޝަންސް އިން މާ ބޮޑު ތަފުސީލެއް ނުދެއެވެ. ފާހަގަކުރެވޭ ގޮތުގައި އެމްޑީޕީން ވަނީ، މެނުއަލްކޮށް ނުވަތަ ގަނޑުކޮށް ފޯމް ބަލައިގަތުމުގެ އިންތިޒާމް ހަމަޖެއްސުމަށް އިލެކްޝަންސް ކޮމިޝަނަށް މިދިޔަ ހޮނިހިރު ދުވަހު ގޮވާލައިފައެވެ.