ސައިޕްރަސްގެ އަކްރޯޓިރީގައި ހުންނަ އިނގިރޭސިވިލާތުގެ އަސްކަރީ މަރުކަޒަށް ޑްރޯން ހަމަލާއެއް ދީފައިވާ ކަމަށް ޝައްކު ކުރެވޭ ކަމަށް އިނގިރޭސިވިލާތުގެ ދިފާއީ ވުޒާރާއިން ބުނެފިއެވެ. ރޭ ދަންވަރު ދިން އެ ހަމަލާގައި އެއްވެސް މީހަކަށް އަނިޔާވި ކަމަަކަށް ރިޕޯޓުކޮށްފައިނުވާ ކަމަށް އަލް ޖަޒީރާއިން ބުނެއެވެ. އަކްޓޯކިރީގައި ހުންނަ މި މަރުކަޒަކީ މެދުއިރުމަތީގައި އިނގިރޭސިވިލާތުގެ އޮޕަރޭޝަންތައް ހިންގާ މައިގަނޑު އަސްކަރީ ފެސިލިޓީއެވެ. މި ރެއިޑް ކުރިއަށް ގެންގޮސްފައިވަނީ އީރާނަށް ހަމަލާދިނުމަށް އެގައުމުގެ މަރުކަޒުތައް ބޭނުންކުރުމަށް އެމެރިކާއަށް ހުއްދަ ދީފައިވާ ކަމަށް އިނގިރޭސިވިލާތުގެ ބޮޑުވަޒީރު ކައިރް ސްޓާމާ ވިދާޅުވެފައިވަނިކޮށެވެ. މަރުކަޒުތައް ބޭނުންކުރުމުގެ ހުއްދަ ދިން ނަމަވެސް އީރާނަށް ދޭ ހަމަލާތަކުގައި އެ ގައުމުން ބައިވެރިނުވާކަމަށް ވަނީ ވިދާޅުވެފައެވެ. "ނަމަވެސް އަޅުގަނޑުމެން މި ސަޕޯޓް ކުރަނީ އަޅުގަނޑުމެންގެ އެކުވެރިންނާއި މި ސަރަހައްދުގައި ތިބި އަޅުގަނޑުމެންގެ ރައްޔިތުންގެ ޖަމާއަތުގެ އަމިއްލަ ދިފާއުގައި." އެކްސްގައި ކުރެއްވި ޕޯސްޓެއްގައި ސްޓާމާ ވިދާޅުވިއެވެ. ބަހްރެއިންގައި އިނގިރޭސި ސިފައިން ތިބި ސަރަހައްދަކާ ކައިރިއަށް ހަމަލާ ދީފައި. ފޮޓޯ/ރޮއިޓާސް ރޯޔަލް އެއާފޯސް އަކްރޮޓިރީ ބޭސް އަކީ ސައިޕްރައިސްގެ ދެކުނުގެ އައްސޭރިފަށުގެ ސިޓީއެއް ކަމަށްވާ ލިމާސޯލް ކައިރީގައި އޮންނަ ސަރަހައްދެކެވެ. ލަންޑަނުން ދާދި ފަހުން ވަނީ ސަލާމަތީ ފިޔަވަޅުތަކުގެ ގޮތުގައި އެ ސައިޓަށް އިތުރު އެސެޓްތަކާއި ވައިގެ އަދި ޑްރޯން ޑިފެންސް ސިސްޓަމްތަކާއި ރާޑަރާއި އެފް-35 މަތިންދާބޯޓުތައް ވެސް ގެންގޮސްފައެވެ. އެމެރިކާ އާއި އިޒްރޭލު ގުޅިގެން އީރާނާ ދެކޮޅަށް ދޭން ފެށި ހަމަލާތަކަށް ރައްދު ދިނުމުގެ ގޮތުން އީރާނުން ވަނީ މެދުއިރުމަތީގައި ހުންނަ އެމެރިކާގެ އަސްކަރީ މަރުކަޒުތަކަށް ހަމަލާދީފައެވެ. އެގޮތުން ޔޫއޭއީގެ ދުބާއީ، އަބޫދާބީ، ގަތަރުގެ ދޯހާ ބަހްރެއިން އަދި އޮމާނަށް ވެސް ވަނީ ހަމަލާދީފައެވެ.