މެދުއިރުމަތީގައި މިހާރު ހިނގަމުންދާ ހަމަނުޖެހުންތަކާ ގުޅިގެން، އަރަބި އަދި އިސްލާމީ ގައުމުތަކާއެކު ދިވެހިރާއްޖެ ސާބިތުވެ އޮތްކަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހާމަކުރައްވައިފިއެވެ. ނޫސްވެރިންނާ ބައްދަލުކުރައްވައި ވާހަކަފުޅު ދައްކަވަމުން ރައީސް ވިދާޅުވީ، މެދުއިރުމަތީގެ މަސްރަހު ގޯސްވެ، އަރަބި ގައުމުތަކަށް އަމާޒުކޮށް ދެމުންދާ ހަމަލާތަކާ ގުޅިގެން އެ ގައުމުތަކުގެ ވެރިންނާ ގުޅުއްވައި ރާއްޖޭގެ ފުރިހަމަ ތާއީދު އޮތްކަން ހާމަކުރައްވަމުން ގެންދަވާ ކަމަށެވެ.
އެގޮތުން ރޭގެ ވަގުތެއްގައި ޔޫއޭއީގެ ރައީސަށް ފޯނުން ގުޅުއްވައި، ރާއްޖެއިން އެ ގައުމާއެކު އޮތްކަން ހާމަކުރައްވާފައިވާނެ ކަމަށް ރައީސް ވިދާޅުވިއެވެ. އެ ސަރަހައްދަށް ދެމުންދާ ހަމަލާތަކުގެ ސަބަބުން މީހުން މަރުވެ، އިމާރާތްތަކަށް ބޮޑެތި ގެއްލުންތަކެއް ލިބެމުންދާކަން ފާހަގަކުރައްވައި، ރައީސް ވަނީ މި ދަތި ދަނޑިވަޅުގައި ދިވެހި ރައްޔިތުން ތިބީ ޔޫއޭއީއާ އެކުގައިކަން އެ ގައުމުގެ ރައީސަށް ޔަގީންކޮށްދެއްވާފައެވެ.
މީގެ އިތުރުން، މިއަދުގެ ވަގުތެއްގައި ސައުދީ އަރަބިއްޔާ، ބަހުރައިން، އޮމާން އަދި ގަތަރުގެ ވެރިންނަށްވެސް ގުޅުއްވައި، އެ ގައުމުތަކާއެކު ދިވެހިރާއްޖެ އޮތްކަން ހާމަކުރައްވާނެ ކަމަށް ރައީސް ވިދާޅުވިއެވެ. މިއީ މެދުއިރުމަތީގެ ހާލަތު އިތުރަށް ގޯސްވަމުންދާ މި ނާޒުކު ވަގުތުގައި، އިސްލާމީ ގައުމުތަކާއެކު އޮންނަ ގާތް ގުޅުން ދެމެހެއްޓުމަށާއި، ސަރަހައްދީ ހަމަޖެހުމަށް ބާރުއެޅުމުގެ ގޮތުން ދިވެހި ސަރުކާރުން ކުރައްވާ މުހިންމު މަސައްކަތްތަކެއްކަން އެމަނިކުފާނު ފާހަގަކުރެއްވިއެވެ.
މެދުއިރުމަތީގެ މައްސަލަތަކުގައި ދިވެހި ސަރުކާރުން އަންނަނީ ވަރަށް ގާތުން ހާލަތު ދިރާސާކުރަމުންނެވެ. އަދި ހާއްސަ ގޮތެއްގައި ގަލްފުގެ އަރަބި ގައުމުތަކުގެ ސަލާމަތާއި ރައްކާތެރިކަމަށް އިސްކަންދީގެން، ބައިނަލްއަގުވާމީ މަސްރަހުގައި ރާއްޖޭގެ ހާރިޖީ ގުޅުންތައް ދަނީ ބައްޓަންކުރަމުންކަން ފާހަގަކުރެވެއެވެ.