ހުޅުމާލޭ ހޮސްޕިޓަލުގައި ހިތުގެ ބަލިތައް ދެނެގަންނަ އެންމެ ޒަމާނީ، ފަހުގެ ކާޑިއޯވަސްކިއުލާ އަލްޓްރާސައުންޑް ސިސްޓަމް ބޭނުންކުރަން ފަށައިފިއެވެ. އެސްޓީއޯއިން ބުނީ، އެސްޓީއޯ ހެލްތުކެއާއިން ހުޅުމާލޭ ހޮސްޕިޓަލަށް އެމެރިކާގެ ޖީއީ ހެލްތުކެއާ ބްރޭންޑުގެ ވިވިޑް އީ-95 މޮޑެލްގެ ކާޑިއޯވަސްކިއުލާ އަލްޓްރާސައުންޑް ސިސްޓަމެއް ހަދިޔާކުރީ، ސިއްހީ ޚިދުމަތްދޭ ތަންތަނަށް ޒަމާނީ ވަސީލަތްތައް ފޯރުކޮށްދީ، ޚާއްސަ ބަލިތަކަށް ދެވޭ ފަރުވާގެ ފެންވަރު ރަނގަޅުކުރުމަށް ކުރަމުންދާ މަސައްކަތުގެ ދަށުން ކަމަށެވެ. އެސްޓީއޯއިން ހަދިޔާކުރި ކާޑިއޯވަސްކިއުލާ އަލްޓްރާސައުންޑް ސިސްޓަމް ބޭނުންކުރަނީ --- ފޮޓޯ/ އެސްޓީއޯ މި ސިސްޓަމް ބޭނުންކުރަން ފެށީ، ހުޅުމާލޭ ހޮސްޕިޓަލުގެ ސިއްހީ މާހިރުންނާއި ޓްރީޓޮޕް ހޮސްޕިޓަލުގެ މަންދޫބުންނާއެކީ ބޭއްވި ޓްރެއިނިން ސެޝަނަކާވެސް އެއްކޮށެވެ. މި ސިސްޓަމަކީ ޖީއީ ހެލްތުކެއާއާއި އެސްޓީއޯ ހެލްތުކެއާގެ ޕާޓްނާޝިޕްގެ ދަށުން ފޯރުކޮށްދިން ސިސްޓަމެއް ކަމަށް، އެސްޓީއޯއިން މައުލޫމާތުދެއެވެ. އެސްޓީއޯއިން ބުނީ ޖީއީ ވިވިޑް އީ-95އަކީ ހިތުގެ ބައިތަކާއި، ހިތް މަސައްކަތްކުރާ ގޮތާއި ލޭ ދައުރުވާ ގޮތް ސާފުކޮށް ބަލާލެވޭނެހެން ފަރުމާކޮށްފައިވާ އިމޭޖިން ސިސްޓަމެއް ކަމަށެވެ. އަދި އަލަށް އުފަންވާ ކުދިންގެ ހިތުގެ އައިބުތައް ދެނެގަތުމަށާއި، ހުރިހާ އުމުރުފުރައެއްގެ ބަލިމީހުންގެ ޓެސްޓުތައް ހެދުމަށް މި ސިސްޓަމްގެ ސަބަބުން މަގުފަހިވެގެންދާނެ ކަމަށް، އެސްޓީއޯއިން ބުންޏެވެ. އެސްޓީއޯއިން ހަދިޔާކުރި ކާޑިއޯވަސްކިއުލާ އަލްޓްރާސައުންޑް ސިސްޓަމްގައި ހިތުގެ ބައެއް ރީޑިންތައް --- ފޮޓޯ: އެސްޓީއޯ އެ ކުންފުނިން ބުނީ، ފަރުވާގެ ކަންކަމުގައި އަވަސް ނިންމުންތައް ނިންމުމަށް މި ސިސްޓަމުން އެހީތެރިވެދޭ ކަމަށެވެ. ރާއްޖޭގައި މިފަދަ ޚާއްސަ ޚިދުމަތްތައް ލިބެން ހުރުމަކީ މުއައްސަސާތަކުގެ ގާބިލުކަން އިތުރުވެ، ބޭރުގެ އެހީތެރިކަމަށް ބަރޯސާވާންޖެހޭ މިންވަރު ކުޑަވެގެންދާނެ ކަމެއް ކަމަށް، އެ ކުންފުނިން ސިފަކުރެއެވެ.