ފޯޅަވަހި (ޗާގޯސް) ލިބުން އެންމެ ޙައްޤުކަން ބޮޑީ ދިވެހިރާއްޖެޔަށް ކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިފަދައިން ވިދާޅުވީ، މިއަދު ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި، ނޫސްވެރިޔަކު ދެންނެވި ސުވާލަކަށް ޖަވާބުދެއްވަމުންނެވެ.
އެމަނިކުފާނު ވިދާޅުވީ ފޯޅަވައްސަކީ، (ޗާގޯސްއަކީ) ދިވެހިންނާ ގުޅުންހުރި ތަނެއްކަމުގެ ތާރީޚީ ހެކިތައް ފެންނަން އެބަހުރި ކަމުގައެވެ. އޭގެ ހެއްކެއްގެ ގޮތުގައި އެމަނިކުފާނު ވިދާޅުވީ، ފޯޅަވަހީގެ ޗާޓަކާ އެކު 9 ވަނަ ޙަސަން ރަސްގެފާނު 16 ވަނަ ޤަރުނުގައި ލިޔުއްވާފައިވާ ސިޓިފުޅެއް އެބައޮތްކަމުގައެވެ. އެހެންކަމުން ފޯޅަވަހި (ޗާގޯސް) ލިބުން ހައްގުވެރި ޤައުމަކާ އެތަން ހަވާލުކުރާނަމަ، އެޤައުމު ލިބެން ޖެހޭނީ ދިވެހިރާއްޖެޔަށް ކަމަށްވެސް އެމަނިކުފާނު ވިދާޅުވިއެވެ. އެހެންކަމުން، މިހާރު ފޯޅަވަހި (ޗާގޯސް) އޮތްގޮތައް އިނގިރޭސި ސަރުކާރުގެ ބެލުމުގެ ދަށުގައި އޮތުން ފިޔަވައި، ދުނިޔޭގެ އެއްވެސް ޤައުމަކާ ފޯޅަވަހި (ޗާގޯސް) ޙަވާލު ކުރާނަމަ، އެތަން އެންމެ ހައްގުކަން ބޮޑީ ދިވެހިރާއްޖެއަށް ކަމަށްވެސް އެމަނިކުފާނު ވިދާޅުވިއެވެ.
ފޯޅަވަހި (ޗާގޯސް) ދިވެހިރާއްޖެޔަށް ހޯދުމަށްޓަކައި މަސައްކަތްތަކެއް އިނގިރޭސި ސަރުކާރާއެކު ކުރެވެމުންދާކަން އެމަނިކުފާނު ހާމަކުރެއްވިއެވެ. އެގޮތުން އެކަމާ ގުޅޭ ދެސިޓީއެއް ފޮނުއްވާފައި ކަމަށާ، އަދި އިނގިރޭސި ބޮޑުވަޒީރާއެކު ފޯނުން މަޝްވަރާ ތަކެއް ކޮށްފައިވާ ކަމަށްވެސް އެމަނިކުފާނު ވިދާޅުވިއެވެ. އަދި އޭގެ ޑޮކިޔުމެންޓޭޝަން ތައްޔާރުކޮށް ހުށަހަޅަންޖެހޭ ފަރާތްތަކަށް ހުށަހަޅުއްވާނެ ކަމުގައިވެސް އެމަނިކުފާނު ވިދާޅުވިއެވެ.
ފޯޅަވަހީގެ (ޗާގޯސްގެ) މައްސަލައިގައި ކުރީގެ ރައީސް އިބްރާހީމް މުޙައްމަދު ޞާލިޙް، މޮރިޝަސްގެ ކުރީގެ ބޮޑުވަޒީރު ޕްރަވިންދު ކުމާރު ޖުގްނައުތަށް 22 އޯގަސްޓް 2022 ގައި ފޮނުއްވި ސިޓީފުޅު އަނބުރާ ގެނައުމަށް ސަރުކާރުން ނިންމަވާފައިވާކަން ރައީސުލްޖުމްހޫރިއްޔާ ރަސްމީކޮށް މޮރިޝަސްގެ ބޮޑުވަޒީރަށް އަންގަވައިފައިވާކަމަށް އެމަނިކުފާނުވަނީ، މިއަހަރުގެ ރިޔާސީ ބަޔާނުގައި ވިދާޅުވެފައެވެ. އަނބުރާ ގެނައުމަށް ސަރުކާރުން ނިންމަވާފައިވާ މި ސިޓީއަކީ، ފޯޅަވަހީގެ (ޗާގޯސްގެ) މައްސަލައިގައި އިންޓަރނޭޝަނަލް ކޯޓް އޮފް ޖަސްޓިސްއިން ދީފައިވާ އިސްތިޝާރީ ލަފަޔަކާއި ގުޅިގެން، އޭރުގެ ސަރުކާރުން ދިވެހިރާއްޖޭގެ ވިސްނުން ބަދަލުކުރިކަން ހާމަކޮށް ފޮނުވާފައިވާ ސިޓީއެކެވެ.