މ. ރިމްލާސްގޭގައި ރޭ މެންދަމުގެ ވަގުތެއްގައި އަލިފާން ރޯވެ، ބޭނުން ނުކުރެވޭ ވަރަށް އަނދައިފި އެވެ.
ވީ ކިހިނެއް؟ - އެމްއެންޑީއެފުން ބުނި ގޮތުގައި، އަލިފާން ރޯވިކަމުގެ ރިޕޯޓު އެތަނަށް ތިބުނީ ދަންވަރު 3 ޖަހާކަންހާއިރެވެ. އަދި ސިފައިން އެ ތަނަށް ގޮސް ކުރި މަސައްކަތުން އަލިފާންގަނޑު ނިއްވާލެވުނީ ގަޑިއިރެއް ފަހުން ކަމަށް އެތަނުން ބުންޏެވެ.
ތަފްސީލް - އެނގިފައިވާ ގޮތުގައި، އަލިފާނުގެ ސަބަބުން އެ ގޭގެ ހުރިހާ އެއްޗެއް ވަނީ ބޭނުން ނުކުރެވޭ ވަރަށް އަނދާހުލިވެފަ އެވެ.
ހާދިސާ ހިނގި ވަގުތު ގޭގައި ހަތް މީހަކު ދިރިއުޅެ އެވެ. އެއީ ތިން ކުޑަކުދިންނާއި އަންހެނަކާއި ތިން ފިރިހެނުންނެވެ. އެކަމަކު އެއްވެސް މީހަކަށް އަނިޔާއެއްވި ކަމެއް އެނގިފައެއް ނުވެ އެވެ.
ނެޝަނަލް ޑިޒަސްޓާ މެނޭޖްމެންޓް އޮތޯރިޓީން ބުނީ:
އެ އެންމެންނަށް ވެސް މިހާރު ވަގުތީ ހިޔާވަހިކަން ފޯރުކޮށްދީފައި
ދިރިއުޅޭނެ ތަނެއްގެ އިތުރުން، ކާބޯތަކެތި ވެސް ފޯރުކޮށްދީފައިވޭ
ވަގުތީ ހިޔާވަހިކަން ދީފައިވަނީ ފަސް ދުވަހުގެ މުއްދަތަށް
އެނގުން މުހިއްމު - ރޯދަމަސް ފެށުނު ފަހުން، ހުޅުމާލޭގެ ވަން އެވެނިއު އެޕާޓްމަންޓެއްގައި ވެސް ރޯވެ ބޭނުން ނުކުރެވޭ ވަރަށް ވަނީ އަނދައިފަ އެވެ. އަލިފާން ރޯވީ، ވަން އެވެނިއުގެ ހަތް ވަނަ ބުރީގައި ހުންނަ އެޕާޓްމަންޓެއްގެ ބަދިގޭގަ އެވެ.