މި ރޯދަމަހުގެ ފުރަތަމަ 15 ދުވަސްތެރޭ، ފިތުރު ޒަކާތުގެ ގޮތުގައި 5.48 މިލިއަން ރުފިޔާ ލިބިފައިވާއިރު، އެއީ ފާއިތުވި ތިން އަހަރު ވެސް އެ މުއްދަތުގައި ލިބުނު އަދަދަށް ވުރެ އިތުރު އަދަދެއް ކަމަށް ތަފާސްހިސާބުން ދައްކައިފިއެވެ. ޒަކާތު ހައުސްއިން ފިތުރު ޒަކާތް ބަލައިގަންނަން ފަށާފައި ވަނީ ނިމިދިޔަ ފެބްރުވަރީ މަހުގެ 22 ވަނަ ދުވަހެވެ. ޒަކާތު ހައުސްގެ ތަފާސްހިސާބުތަކުން ދައްކާގޮތުން މި ރޯދަމަހުގެ ފުރަތަމަ 15ގައި ފިތުރު ޒަކާތުގެ ގޮތުގައި ޒަކާތު ހައުސްއަށް ވަނީ 5.48 މިލިއަން ރުފިޔާ ލިބިފައެވެ. އެއީ ނިމިދިޔަ 2025 ވަނަ އަހަރުގެ އެ މުއްދަތުގައި ލިބިފައިވާ 4.46 މިލިއަން ރުފިޔާއާ އަޅައިބަލާއިރު، 1.02 މިލިއަން ރުފިޔާގެ އިތުރުވުމެކެވެ. ނިމިދިޔަ 2024 ވަނަ އަހަރުގެ މި މުއްދަތުގައި ޒަކާތު ހައުސްއަށް ލިބިފައިވަނީ 2.63 މިލިއަން ރުފިޔާއެވެ. އަދި 2023 ވަނަ އަހަރު ލިބިފައި ވަނީ 2.79 މިލިއަން ރުފިޔާއެވެ. https://x.com/ZakatHouseMv/status/2030539533834650081 ޒަކާތު ހައުސްއިން އަންނަނީ އޮންލައިންކޮށް، ހަތް ޕްލެޓުފޯމެއް މެދުވެރިކޮށް ޒަކާތް ބަލައިގަންނަމުންނެވެ. އެއީ: ދިރާގު މޯބައިލް އެޕްއާއި ދިރާގު ޕޭ ވެބްސައިޓް އުރީދޫ އެމް ފައިސާ މޯބައިލް އެޕް މޯލްޑިވްސް އިސްލާމިކް ބޭންކުގެ މޯބައިލް އެޕް ބޭންކް އޮފް މޯލްޑިވްސްގެ މޯބައިލް އެޕް ފަހިޕޭ މޯބައިލް އެޕް އަވަސް މޯބައިލް އެޕް ބަނޑޭރި ޕޭ ވެބްސައިޓް ފާހަގަކުރެވޭ ގޮތުގައި، އޮންލައިންކޮށް ޒަކާތް ދައްކަން އަހުލުވެރި ނޫން މީހުންނަށް ޚާއްސަކޮށް، މި އަހަރު ވަނީ ކޭޝް ކާޑުން ވެސް ޒަކާތް ބަލައިގަންނަން ފަށާފައެވެ. ޒަކާތު ހައުސްއިން ބުނި ގޮތުގައި، އަތޮޅުތެރޭގެ ރަށްރަށުގައި، އޮންލައިންކޮށް ޒަކާތް ދެއްކުމަށް އަހުލުވެރި ނޫން ފަރާތްތަކުން ފިޠުރު ޒަކާތް ދައްކާނީ އެ ރަށެއްގެ ލޯކަލް ކައުންސިލު އިދާރާއަށެވެ. ނަގުދު ފައިސާއިންނާއި ގޮވާމުން ޒަކާތް ބަލައިގަތުމަށް ކައުންސިލުތަކުން ބޭނުންކުރާނީ އެކަމަށް ޓަކައި ޚާއްސަކޮށްގެން ތައްޔާރުކޮށްފައިވާ ފިޠުރު ޕޯޓަލް ކަމަށް ޒަކާތު ހައުސްއިން ވަނީ ބުނެފައެވެ.