މަހުގެ އަގު ދެމެހެއްޓެނިވި ގޮތެއްގައި އެއް ހަމައެއްގައި ހިފެހެއްޓޭނީ މިހާރު ކުރިއަށްދާ ކޯލްޑް ސްޓޯރޭޖުތަކުގެ މަޝްރޫޢުތައް ނިމި، އޮޕަރޭޝަނަށް އައުމުން ކަމަށް މަސްވެރިކަމާއި ދަނޑުވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަހުމަދު ޝިޔާމް ވިދާޅުވެއްޖެއެވެ. މިނިސްޓަރު މިފަދައިން ވިދާޅުވީ ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅުދައްކަވަމުންނެވެ. މިނިސްޓަރު ޝިޔާމް ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އަމާޒަކީ މަހުގެ އަގު 20 ރުފިޔާއަށްވުރެ ދަށްވިޔަނުދީ ހިފެހެއްޓުން ކަމަށެވެ. އަދި މަސްވެރިންނަށް ލިބޭ އާމްދަނީ އިތުރުކުރުމަށްޓަކައި ޕްރައިވެޓް ސެކްޓަރާއި ސަރުކާރު ހިއްސާވާ ކުންފުނިތައް ގުޅިގެން ހަރުދަނާ ނިޒާމެއްގެ ތެރެއިން މަސައްކަތް ކުރަންޖެހޭ ކަމަށްވެސް މިނިސްޓަރު ފާހަގަކުރެއްވިއެވެ. މިނިސްޓަރު ވިދާޅުވީ މި ސަރުކާރުގެ އަމާޒަކީ މަސް ކިލޯއެއް ވިހި ރުފިޔާއަށްވުރެ ދަށްނުވާނެ ގޮތަށް އަގު ހިފެހެއްޓުންކަމަށެވެ. އެހެން ނަމަވެސް އެގޮތަށް އަގުތައް ދެމެހެއްޓެނިވި ގޮތެއްގައި އެއްހަމައެއްގައި ހިފެހެއްޓޭނީ މިހާރު ކުރިއަށްދާ ޕްރޮސެސްގެ ތެރެއިން ކުރިއަށްދާ ހުރިހާ ކޯލްޑް ސްޓޯރޭޖް ތަކެއް ނިމި ބޭނުންކުރަން ފެށުމުންކަމަށެވެ. "އަޅުގަނޑުމެންގެ އަމާޒަކީ ވިހި ރުފިޔާއަށްވުރެ ދަށްނުވާނެ ގޮތަށް އަގު ހިފެހެއްޓުން. މިކަން ކުރެވޭނީ މިހާރު ކުރިއަށްދާ ޕްރޮސެސްގަ ހުރި ހުރިހާ ކޯލްޑް ސްޓޯރޭޖްތަކެއް ނިމި އޮޕަރޭޝަނަށް އައުމުން. އޭރުން ޕްރޮސެސިންގް ކެޕޭސިޓީ އިތުރު ކެވާނެ އަދި ކެނެރީތަކުގެ މަސައްކަތް ބާރުމިނުގައި ކުރިއަށް ގެންދެވޭނެ." މިނިސްޓަރު ވިދާޅުވިއެވެ. ޕްރޮސެސިންގް ވަސީލަތްތައް ގާއިމުވުމުން، ގިނައިން މަސް ބޭނޭ މޫސުމުގައި މަސް ބޭރުކުރުމުގެ ބަދަލުގައި ރައްކާކުރެވޭނެ ކަމަށާއި، އޭގެ ސަބަބުން މަސް މަދު ދުވަސްވަރުވެސް ރަނގަޅު އަގު ހޯދޭނެ ކަމަށް ޝިޔާމް ވިދާޅުވިއެވެ. މަސްވެރިން ބާނާ މަހަށް 48 ގަޑިއިރު ތެރޭގައި ފައިސާ ދޫކުރުމުގެ ސިޔާސަތުގެ ދަށުން، މިދިޔަ ޖޫން މަހާ ހަމައަށް 1.1 ބިލިޔަނަށް ވުރެ ގިނަ ރުފިޔާ ދޫކޮށްފައިވާކަން މިނިސްޓަރު ހާމަކުރެއްވިއެވެ. މި ސަރުކާރު 2023 ވަނަ އަހަރު ވެރިކަމާ ހަވާލުވިއިރު، މަސްވެރިންނަށް ނުދީ 250 މިލިޔަން ރުފިޔާ އޮތްކަން ފާހަގަކުރައްވައި، މިނިސްޓަރު ވިދާޅުވީ ބެކްލޮގް ކްލިއަކުރުމަށް ރައީސް ޚާއްސަ އިސްކަމެއް ދެއްވި ކަމަށެވެ. 2024 ވަނަ އަހަރުގެ ޑިސެމްބަރު މަހުން ފެށިގެން މަސްވެރިން ބާނާ މަހަށް 48 ގަޑިއިރު ތެރޭގައި ފައިސާ ދެމުންދާކަންވެސް މިނިސްޓަރު ފާހަގަކުރެއްވިއެވެ. ނިންމަވާލައްވަމުން މިނިސްޓަރު ޝިޔާމް ވިދާޅުވީ ފާއިތުވި އަހަރުތަކުގައި މަސްވެރިކަމުގެ ސިނާޢަތަށް ބޭނުންވާ މުހިންމު އިންވެސްޓްމަންޓްތައް ކުރީގެ ސަރުކާރުތަކުން ކޮށްފައި ނުވާ ކަމަށެވެ. ނަމަވެސް މިހާރުގެ ސަރުކާރުގެ އަމާޒަކީ މަސްވެރި ސިނާޢަތަށް އިންގިލާބީ ބަދަލެއް ގެނެސް، ސިނާޢަތުގެ ތަރައްޤީއާއި ދެމެހެއްޓެނިވިކަން ކަށަވަރުކުރުން ކަމުގެ ޔަޤީންކަން ވަނީ ދެއްވާފައެވެ.