ރައްޔިތުންގެ މަޖިލީހުގެ ނައިބު ރައީސް، ދިއްގަރު ދާއިރާގެ މެންބަރު އަޙްމަދު ނާޒިމް އެ މަޤާމުން ވަކިކުރުމުގެ ޤަރާރު ރައްޔިތުންގެ މަޖިލީހަށް މިއަދު ހުށަހަޅައިފިއެވެ.
މިކަން ރައްޔިތުންގެ މަޖިލީހުގެ އިދާރާއިން ވަނީ ރަސްމީކޮށް ކަށަވަރުކޮށްދީފައެވެ.
މަޖިލީހުގެ އިދާރާއިން އެކްސްގައި ކުރި ޕޯސްޓެއްގައި ބުނެފައިވަނީ، ނައިބު ރައީސް އަޙްމަދު ނާޒިމް މަޤާމުން ވަކިކުރުމުގެ އިތުބާރު ނެތްކަމުގެ ޤަރާރު އެ އިދާރާއަށް މިހާރު ލިބިފައިވާ ކަމަށެވެ. އަދި މި މައްސަލަ ކުރިއަށްގެންދާނީ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީއާއި ރައްޔިތުންގެ މަޖިލީހުގެ ޤަވާއިދުގައި ކަނޑައެޅިފައިވާ އިޖުރާއަތްތަކުގެ މަތިން ކަމަށްވެސް މަޖިލީހުން ހާމަކޮށްފައިވެއެވެ.
ނާޒިމް މަޤާމުން ވަކިކުރުމުގެ މަސައްކަތް ފަށާފައިވަނީ ވެރިކަންކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) އާއި އެ ޕާޓީގެ ޕާލިމަންޓަރީ ގްރޫޕުގެ އިތުބާރު އޭނާއަށް ނެތް ކަމަށް ނިންމުމާ ގުޅިގެންނެވެ.
ޕީއެންސީގެ ޕީޖީ ލީޑަރު، އިނގުރައިދޫ ދާއިރާގެ މެންބަރު އިބްރާހިމް ފަލާހު ވިދާޅުވީ، ”ނާޒިމްގެ މައްޗަށް ޕާޓީގެ އިތުބާރު މިހާރު ގެއްލިފައިވާ ކަމަށާއި، އޭނާ މަޤާމުން ވަކިކުރުމަށް ބޭނުންވާ ޤާނޫނީ އަދަދަށް ސޮއި ހަމަކޮށް މަޖިލީހަށް ހުށަހަޅާފައިވާ“ ކަމަށެވެ.
ފަލާހު އިތުރަށް ފާހަގަކުރެއްވި ގޮތުގައި، ނާޒިމް މަޖިލީހުގެ ނައިބު ރައީސް ކަމުން ވަކި ކުރިޔަސް، އޭނާ ޕާޓީގެ މެމްބަރު ކަމުން ވަކި ކުރުމުގެ ވިސްނުމެއް މިވަގުތު ޕާޓީގެ ނެތެވެ. މި މައްސަލަ ހުށަހެޅިއިރު، މަޖިލީހުގެ ރައީސްގެ މަޤާމުގައި ހުންނެވީ އަބްދުއްރަހީމް އަބްދުﷲ އެވެ.
މަޖިލީހުގެ ޤަވާއިދު ބުނާގޮތުން، މަޖިލީހުގެ ނައިބު ރައީސް މަޤާމުން ވަކިކުރުމުގެ މައްސަލައެއް ހުށަހެޅުމުން، އެ މައްސަލަ ކުރިއަށްގެންދިއުމަށްޓަކައި ބޭނުންވާ ނޯޓިސް ދިނުމާއި، މަޖިލީހުގެ ޖަލްސާއަށް އެ މައްސަލަ އެޖެންޑާކުރުމުގެ ކަންކަން ކުރިއަށް އޮތް ދުވަސްތަކުގައި ހިނގަމުންދާނެއެވެ.