ސުޕްރީމް ކޯޓުގެ ފަނޑިޔާރުކަމުން ސަސްޕެންޑު ކޮށްފައިވާ ޑރ. އަޒްމިރާލްދާ ޒާހިރުގެ މައްސަލަތައް ބެލުމުގައި ޖޭއެސްސީގެ މެންބަރުން އަމަލު ކުރަންޖެހޭ ސުލޫކީ މިންގަނޑާ ހިލާފަށް އަމަލު ކޮށްފައިވާ ކަމަށް ވިދާޅުވެ އެ މައްސަލަ ބަލައިދިނުމަށް އެދި ރައްޔިތުންގެ މަޖިލީހަށް އަޒްމިރާލްދާ މައްސަލައެއް ހުށަހަޅައިފި އެވެ.
ޖޭއެސްސީ މެންބަރުންގެ ސުލޫކީ މައްސަލަ ބަލައިދިނުމަށް އެދި އަޒްމިރާލްދާ މަޖިލީހަށް ފޮނުއްވި ސިޓީގައި ވިދާޅުވެފައި ވަނީ އޭނާގެ މައްސަލަތައް ތަހުގީގު ކުރުމުގެ ތެރޭގައި އެ ކޮމިޝަނުގެ ގާނޫނުގައި ބަޔާން ކޮށްފައިވާ ސުލޫކީ މިންގަނޑާ މެންބަރުން ތަކުރާރުކޮށް ހިލާފުވެފައިވާ ކަމަށެވެ.
އެ މައްސަލަ ބަލައި، ޖޭއެސްސީގެ މެންބަރުން އަމަލު ކުރައްވަން ޖެހިވަޑައިގަންނަވާ ސުލޫކީ މިންގަނޑުން ބޭރުން ކުރައްވަމުން ގެންދަވާ އަމަލުތައް ހުއްޓުވައި ފިޔަވަޅު އަޅައިދިނުމަށް އަޒްމިރާލްދާ މަޖިލީހަށް ފޮނުއްވި ސިޓީގައި އެދިވަޑައިގެންފައިވެ އެވެ.
އެގޮތުން ޖޭއެސްސީ މެންބަރުން އަމަލު ކުރައްވަން ޖެހިވަޑައިގަންނަވާ ސުލޫކީ މިންގަނޑުން ބޭރުން ކުރައްވާފައިވާ ކަމަށް ވިދާޅުވެ އަޒްމިރާލްދާގެ ސިޓީގައި ހަ ކަމެއް ފާހަގަކުރައްވައި ތަފުސީލު ހިމަނުއްވާފައިވެ އެވެ.
އެއީ:
އަޒްމިރާލްދާގެ މައްޗަށް ކުރަނީ އޭނާގެ ފިރިކަލުން މައްސަލައެއްގައި ހައްޔަރު ކުރުމުން، ބަންދުން ދޫކޮށްލުމަށް އެ މައްސަލަ ބެއްލެވި ކްރިމިނަލް ކޯޓުގެ ފަނޑިޔާރުންނަށް ނުފޫޒު ފޯރުވި ކަމުގެ ތުހުމަތާއި މައްސަލައަކާ ގުޅިގެން ސުޕްރީމް ކޯޓަށް ލިބެންޖެހޭ މުހިންމު ލިޔެކިޔުންތަކެއް ފޯރުކޮށްދިނުމަށް ދެކޮޅު ހަދައިގެން ހައި ކޯޓުގެ ކުރީގެ ރަޖިސްޓްރާ ހުސެއިން މުހައްމަދު ހަނީފު ހާޒިރުކޮށް ޖަވާބުދާރީ ކުރި ތަނުގައި އޭނާ އިންނެވި ކަމަށް ބުނާ މައްސަލަ އެވެ.
އެ ދެ މައްސަލަ ވެސް ޖޭއެސްސީން ތަހުގީގު ކުރަމުންދާއިރު، އެ މައްސަލަތަކުގައި އަޒްމިރާލްދާގެ ބަޔާން ނަގައި ޖޭއެސްސީން ވަނީ ނިންމައިފަ އެވެ.
އަޒްމިރާލްދާގެ އިތުރުން ސުޕްރީމް ކޯޓުގެ ފަނޑިޔާރު، މަހާޒް އަލީ ޒާހިރު އާއި އެ ކޯޓުން އިސްތިއުފާދެއްވި ހުސްނުއްސުއޫދު ސަސްޕެންޑުކޮށް ސުލޫކީ މައްސަލަތަކެއް ބަލަން ފެށީ ސިޔާސީ ޕާޓީއަކުން ވަކިކޮށްފި ނަމަ މެންބަރުންގެ ގޮނޑި ގެއްލޭ ގޮތަށް ގާނޫނުއަސާސީގެ 73 ވަނަ މާއްދާއަށް ގެނައި ބަދަލު ބާތިލް ކުރަން ހުށަހަޅާފައި އޮތް މައްސަލައިގެ އަޑުއެހުމެއް ތާވަލުކުރި ދުވަހު އެވެ.
އެ މައްސަލަ ސުޕްރީމް ކޯޓުގައި ކުރިއަށް ދަނިކޮށް ސުޕްރީމް ކޯޓުގެ ފަނޑިޔާރުންގެ ތެރެއިން ދެ ފަނޑިޔާރަކު ވަކި ކުރަން މަޖުބޫރުވާ ގޮތަށް ރައްޔިތުންގެ މަޖިލީހުގެ ސުޕަ މެޖޯރިޓީ އޮންނަ ވެރިކަން ކުރާ ޕީއެންސީން ފެބްރުއަރީ 27، ގައި ބިލެއް ވެސް ފާސްކުރި އެވެ. ނަމަވެސް އެ ބިލަށް ފާޑުކިޔުން އަމާޒުވުމުން ތަސްދީގު ނުކުރައްވައި ރައީސް މުއިއްޒު އަނބުރާ މަޖިލީހަށް ފޮނުވީ އެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު އާއި ބަންޑާރަނައިބު އަހުމަދު އުޝާމް ފަނޑިޔާރުގެއަށް ނުފޫޒު ފޯރުވާ ކަމަށް ވިދާޅުވެ ހުސްނުއްސުއޫދު ފަނޑިޔާރުކަމުން އިސްތިއުފާދެއްވީ އެއަށްފަހު އެވެ.
ސުޕްރީމް ކޯޓުގެ ފަނޑިޔާރުން ސަސްޕެންޑުކުރި މައްސަލަ ހުސްނުއްސުއޫދުގެ އިތުރުން އަޒްމިރާލްދާ ވަނީ އދ. އަށް ހުށަހަޅުއްވާފަ އެވެ. އަޒްމިރަލްދާ މައްސަލަ ހުށަހެޅުއްވީ ގާނޫނީ ވަކީލުންނާއި ފަނޑިޔާރުންގެ މިނިވަންކަމާ ބެހޭ އދ. ގެ ރެޕަޓުއާއަށެވެ. ހުސްނުއްސުއޫދު މައްސަލަ ހުށަހެޅުއްވީ އދ. ގެ އިންސާނީ ހައްގުތަކާ ބެހޭ ކޮމިޝަނަރުގެ އޮފީހަށެވެ.
ސުޕްރީމް ކޯޓުގެ ފަނޑިޔާރުން ސަސްޕެންޑު ކުރި މައްސަލައިގައި ޖަވާބުދާރީވުމަށް އދ އިން ދިވެހި ސަރުކާރަށް ވަނީ އަންގައިފަ އެވެ. ނަމަވެސް ސަރުކާރުން ރަސްމީކޮށް އަދި އެކަމުގައި އެއްވެސް އެއްޗެއް ނުބުނެ އެވެ.