ރައްޔިތުންގެ މަޖިލީހަށް އެމްޑީޕީ ޓިކެޓް ދޭނެ މީހުން ހޮވުމަށް އިއްޔެ ބޭއްވި ފަސް ދާއިރާއެއްގެ ތެރެއިން ޕްރައިމަރީގައި ތިން ދާއިރާއެއްގެ ވަގުތީ ނަތީޖާ ރޭ އިއުލާންކޮށްފި އެވެ.
އިއްޔެ ކުރިއަށް ގެންދިޔަ ފަސް ދާއިރާގެ ތެރެއިން ރޭ ނަތީޖާ އިއުލާންކުރި ހޯރަފުށީ ދާއިރާ ކާމިޔާބުކޮށްފައި ވަނީ އަހުމަދު ސަލީމް (ސައްލެ) އެވެ. އޭނާ އެ ދާއިރާ އަށް ހޮވިވަޑައިގަތްއިރު، އެ ގޮނޑީގެ މައްސަލާގައި އެ ދާއިރާ މިހާރު ތަމްސީލްކުރައްވާ އަހުމަދު ރަޝީދު ވަނީ އެމްޑީޕީން ވަކިވެވަޑައިގެންފަ އެވެ. އެނގިފައިވާ ގޮތުގައި އޭނާ ޕާޓީން ވަކިވެވަޑައިގަތީ ހޯރަފުށީ ދާއިރާގެ ގޮނޑި އަށް ސަލީމް ހޮވަން ޕާޓީގެ އިސް ފަރާތްތަކުން މަސައްކަތްކުރާ ކަމަށް ތުހުމަތުކުރައްވަ އެވެ.
ތުޅާދޫ ދާއިރާގެ ޓިކެޓު ލިބިވަޑައިގަތީ އެ ދާއިރާގެ މިހާރު ވެސް މެމްބަރު ނާޒިމް ރަޝާދަށެވެ.
ފުވައްމުލަކު މެދު ދާއިރާގެ ވަގުތީ ނަތީޖާ އިން އެ ދާއިރާގެ ޓިކެޓް ލިބިފައި ވަނީ މަޝްހޫރު ވިޔަފާރިވެރިއެއް ކަމަށްވާ އަހުމަދު ދީދީ (ކެމްޕަސް ޑީޑީ) އަށެވެ.
އެމްޑީޕީ ޕްރައިމަރީގައި އިއްޔެ ވަނީ މާމިގިއްޔާއި މަކުނުދު އާއި ގެމަނަފުއްޓާއި ވިލިފުށީ ދާއިރާގެ މާލޭގައި ތިބި މެމްބަރުންނާއި އެ ދާއިރާގެ ބުރުނީގެ ވޯޓުލުން ވެސް ކުރިއަށް ގެންގޮސްފަ އެވެ. އެހެން ނަމަވެސް އަދި އެ ދާއިރާތަކުގެ ނަތީޖާ އިއުލާނެއް ނުކުރެ އެވެ.
އެމްޑީޕީން ޓިކެޓް ދޭނެ ފަރާތްތައް ކަނޑައެޅުމަށް ޕްރައިމަރީ ބާއްވަން ނިންމީ ހުރިހާ ދާއިރާތަކުގައި އެއްފަހަރާ އެވެ. އެހެން ނަމަވެސް ވޯޓާސް ލިސްޓުގައި ހުރި މައްސަލަތަކާއި އިދާރީ ގިނަ މައްސަލަތަކެއް ކުރިމަތިވުމުން ޕްރައިމަރީ ފަސްކޮށް އެކި ދާއިރާތައް ބާއްވަނީ ވަކިވަކިންނެވެ.