މަތީ ދަރަޖަ ހޯދާ ފަރާތްތަކަށް ރައީސުލްޖުމްހޫރިއްޔާ ދެއްވާ ހާއްސަ އިނާމާ ބެހޭ ފަންނީ ކޮމިޓީގެ މުއްދަތު ހަމަވުމުން އެ ކޮމިޓީ ރައީސުލްޖުމްހޫރިއްޔާ އަބްދުﷲ ޔާމީން އަލުން އެކުލަވައިލައްވައިފި އެވެ.
ކޮމިޓީގެ ޗެއާމަނަކަށް ހަމަޖެއްސެވީ ފިޝަރީޒް މިނިސްޓަރު ޑރ. މުހައްމަދު ޝައިނީއެވެ. ކޮމިޓީގައި ހިމެނިވަޑައިގަންނަވާ އެހެން ބޭފުޅުންނަކީ ގ. ވައިޖެހޭގެއާގޭ ޑރ. މުހައްމަދު އާސިމާއި، މ. ދާޝިން ޑރ. އިބްރާހީމް ޒަކަރިއްޔާ މޫސާއާއި، މ. އެމޭޒަން ޑރ. މަރިޔަމް ސުޒީ އާދަމާއި، މ. ހުކުރަދިގޭ ޑރ. އިބްރާހީމް ޔާސިރު އަހްމަދެވެ.
މަތީ ދަރަޖަ ހޯދާ ފަރާތްތަކަށް ހާއްސަ އިނާމު ދެއްވުމުގެ މަގުސަދަކީ ރާއްޖެއަށް ރީތި ނަން ހޯދައިދޭ ފަރާތްތަކުގެ ކާމިޔާބީއާއި، ހިތްވަރާއި ހުނަރުން މަތީ ވަނަތައް ހޯދާ ފަރާތްތަކުގެ ކާމިޔާބީ އިހްތިފާލު ކުރުމާއި، މިފަދަ ކާމިޔާބީތައް ހޯދުމަށް ހިތްވަރު ދިނުމާއި، ރާއްޖެއަށް ބޭނުންވާ ދާއިރާތަކަށް ދިވެހިންގެ އުފެއްދުންތެރިކަމާއި މަސައްކަތްތެރިކަން މިސްރާބު ކުރުން ކަމަށް ރައީސް އޮފީހުން ބުނެ އެވެ.
ހާއްސަ އިނާމު ދެއްވާނީ ޖުމްހޫރީ ދުވަހުގެ މުނާސަބަތުގައި ބާއްވަވާ ރަސްމީ ޖަލްސާގަ އެވެ.