ސުނާމީ ކާރިސާއަށް ދިހަ އަހަރު ފުރުނުއިރުވެސް ދާއިމީ ބޯހިޔާވަހިކަމެއް ނުލިބޭ އެތައް ސަތޭކަ ރައްޔިތުން އެބަތިބި ކަމަށް ހައުސިން މިނިސްޓަރު ޑރ މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ގައުމީ ދުވަހާއި ގައުމީ އެއްބައިވަންތަކަމުގެ ދުވަސް ފާހަގަކުރުމަށް ރޭ ދަރުބާރުގޭގައި ބޭއްވި ޖަލްސާގައި ވާހަކަފުޅު ދައްކަވަމުންނެވެ.
ހައުސިން މިނިސްޓަރު ޑރ. މުއިއްޒު ވިދާޅުވީ ސުނާމީއާއި ގުޅިގެން ރާއްޖެ އާރާސްތުކުރުމަށް ދުނިޔޭގެ އެކި ކަންކޮޅުތަކުން ވަރަށް ގިނަ އެހީތައް ލިބުނު ކަމަށެވެ. އޭގެ ތެރެއިން ބޮޑު ބައެއް ކަނޑައެޅީ ސުނާމީއާއި ގުޅިގެން ގެދޮރު ގެއްލުނު މީހުންނަށް ދާއިމީ ބޯހިޔާވަހިކަން ފޯރުކޮށްދިނުމަށް ކަމަށާއި ނަތިޖާއެއްގެ ގޮތުން ގިނަ ރައްޔިތުންނަށް ދާއިމީ ބޯހިޔާވަހިކަން ފޯރުކޮށްދެވިފައިވާ ކަމަށް މިނިސްޓަރ ވިދާޅުވިއެވެ.
ނަމަވެސް އެމަނިކުފާނު ވިދާޅުވީ މިއަދާއި ހަމައަށް ވެސް ދާއިމީ ބޯހިޔާވަހިކަން ނުލިބޭ އެތައް ސަތޭކަ ރައްޔިތުން އެބަތިބި ކަމަށެވެ.
"ވޭތުވެދިޔަ ފަސް އަހަރު ތެރޭ މި މައްސަލައަށް އެކަށީގެންވާ ސަމާލުކަމެއް ދެވިފައި ނެތުމުން މިއަހަރާއި ހަމައަށް އައިރުވެސް ދާއިމީ ބޯހިޔާވަހިކަމެއް ނުލިބޭ އެތައް ސަތޭކަ ރައްޔިތުން އެބަތިބި. މިގޮތުން ގއ.ގެ ހަތަރު ރަށެއްގައި 298 ގެއާއި ތ. މަޑިފުށީގައި 41 ގެ އިމާރާތް ކުރަން ފަށައި ވަނީ ނުނިމި. މިގެތަކުގެ މަސައްކަތް އެކަށީގެންވާވަރާ ގާތަށް ވެސް ނުކުރެވި ހަތަރު އަހަރެއްހާ ދުވަސް ވަނީ ގޮސްފައި. އަދި އެގެތައް ހަދަން ގެނައި އެތައް މިލިއަން ރުފިޔާއެއްގެ ތަކެތި ވަނީ ބޭނުން ނުކޮށް ހުރުމުން ހަލާކުވެގެން ގޮސްފައި" މިނިސްޓަރު ވިދާޅުވިއެވެ.
ޑރ. މުއިއްޒު ވިދާޅުވީ ސުނާމީ ކާރިސާއަށް 10 އަހަރު ވެގެންދާއިރު ވެސް ދާއިމީ ބޯހިޔާވަހިކަން ސަރުކާރުން ފޯރުކޮށްނުދެވި އޮތުމަކީ ސަރުކާރަށް އުޒުރެއް ދެއްކޭނެ ކަމެއް ނޫން ކަމަށެވެ. އެހެންކަމުން ސަރުކާރަށް އަހަރު ވުމުގެ ކުރިން އެ ފަރާތްތަކަށް ދާއިމީ ބޯހިޔާވަހިކަން ފޯރުކޮށްދިނުމަށް ވަރަށް ގިނަ މަސައްކަތްތަކެއް ކޮށްފައިވާ ކަމަށެވެ. އެގޮތުން މަޝްރޫއުގެ މަސައްކަތް ކުރިއަށް ގެންދިއުމަށް ކޮންޓްރެކްޓަރަށް ސަރުކާރުން ކޮށްދެވޭނެ ހުރިހާ ކަމެއް ކޮށްދީފައިވާ ކަމަށް ވިދާޅުވިއެވެ.
އަދި ވިދާޅުވީ މިއަދަށް މަސައްކަތް ނުނިމޭނެހެން ހީވެގެން ސީދާ ސަރުކާރުން މި މަސައްކަތުގެ ތެރެއަށް ވަނުމަށް ނިންމައި މިހާތަަނަށް ނުހިންގާ ވަރުގެ ބޮޑު އޮޕަރޭޝަނެއް ކުރު މުއްދަތެއްގެ ތެރޭގައި ފަށާފައިވާ ކަމަށެވެ.
"މަސައްކަތް ނިންމުމަށްޓަކައި ގއ. ދާންދޫގައި އަޅަމުންދާ 87 ގޭގެ މަސައްކަތް އެމްޓީސީސީއާއި ސަރުކާރުން ހަވާލުކުރި. ގއ. ވިލިގިލީގައި އަޅަމުންދާ 77 ގޭގެ ތެރެއިން 25 ގެ ނިންމުމަށް އެމްއާރުޑީސީއާއި ހަވާލުކުރެވުނު. ގއ. މާމެންދޫގައި އަޅަމުންދާ 84 ގޭގެ މަސައްކަތް އެމްއެންޑީއެފާއި ހަވާލުކުރި. އެކަމަކު މާމެންދޫގައި އެމްއެންޑީއެފުން ވަރަށް ހީވާގިކަމާއެކު މަސައްކަތް ކުރަމުން ދަނިކޮށް މާލެއަށް ދިމާވި ފެނުގެ ހާދިސާއާ ގުޅިގެން ވަރަށް ބުރަކޮށް އެކަމުގައި ހަރަކާތްތެރިވާން ސިފައިންނަށް ޖެހުމުން މާމެންދޫގެ 50 ގެއެއްގެ މަސައްކަތް އެކި ކުންފުނިތަކާއި އަނެއްކާވެސް ހަވާލުކުރެވުނު" ޑރ. މުއިއްޒު ވިދާޅުވިއެވެ.
މީގެ އިތުރަށް ތ. މަޑިފުށީގައި ހަދަމުންދިޔަ 41 ގޭގެ މަސައްކަތް ވެސް ޑިސެމްބަރު 26 އަށް ނުނިމޭނެކަން ޔަގީންވުމުން އެ މަސައްކަތުގެ އެއްބައިވެސް ދެ ކުންފުންޏަކާއި ސަރުކާރުން ހަވާލުކޮށްފައިވާ ކަމަށް މިނިސްޓަރު ވިދާޅުވިއެވެ.
މިނިސްޓަރު މުއިއްޒު އިތުރަށް ވިދާޅުވީ މި ކުރެވުނު މަސައްކަތުގެ ނަތީޖާ އެދެވޭ ގޮތެއްގައި ހާސިލް ކުރުމަށް ގިނަ ގޮންޖެހުންތަކެއް ކުރިމަތިވި ކަމަށެވެ. އެގޮތުން ދިމާވި އެންމެ ބޮޑު އެއް ގޮންޖެހުމަކީ މަސައްކަތަށް ކުރިން ގެނެސްފައި ހުރި ސާމާނު ހަލާކުވުމުގެ ސަބަބުން އަނެއްކާވެސް ތަކެތި ހޯދަން ޖެހި، ކުޑަ ވަގުތުކޮޅެއްގެ ތެރޭގައި އެކަން ކުރަން ޖެހުން ކަމަށް ވިދާޅުވިއެވެ. އަދި މޫސުން ގޯސްވުމަކީ ވެސް ރާއްޖެއިން ބޭރުންނާއި މާލެއިންނާއި އެހެން ރަށްރަށުން ސާމާނު އެ ރަށްރަށަށް ގެންދިއުމަށް ދިމާވި ވަރަށް ބޮޑު ހުރަހެއް ކަމަށް މިނިސްޓަރު ފާހަގަކުރެއްވިއެވެ.
މީގެ އިތުރަށް މިނިސްޓަރު ވިދާޅުވީ މި މަސައްކަތް ނިންމުމަށް ކުރަމުންދިޔަ މަސައްކަތަށް އިދިކޮޅު ފަރާތްތަކުން ވެސް އެކި ކަހަލަ ހުރަސްތައް ކުރިމަތި ކުރި ކަމަށެވެ. އެގޮތުން ކޮށް ނިންމާފައި ހުރި މަސައްކަތްތަކަށް ގެއްލުން ދިނުމާއި ކޮންޓްރެކްޓަރަށް ހުރަސްއަޅައި މަސައްކަަތަށް ހުރަސްއަޅާފައިވާ ކަމަށް ވެސް އެމަނިކުފާނު ވިދާޅުވިއެވެ.
ހައުސިން މިނިސްޓަރު ވިދާޅުވީ އެ ގޮންޖެހުންތަކާއިއެކު ވެސް ކުރެވުނު މަސައްކަތުގެ ނަތީޖާ ވަރަށް ވެސް ރަގަޅު ކަމަށާއި، މީގެ ކުރިން ހަތަރު ވަރަކަށް އަހަރު ދުވަހުގެ ތެރޭގައި ކުރެވުނު މަސައްކަތަށް ވުރެ ގިނަ މަސައްކަތް ވޭތުވެދިޔަ މަހެއްހާ ދުވަހުގެ ތެރޭގައި ކުރެވިފައިވާ ކަމަށެވެ.
"މަޑިފުށީގައި ހަދަމުންދިޔަ 41 ގެ އެެއްކޮށް ވަނީ ނިމިފައި. ދާންދޫގައި ހަދަމުންދިޔަ 87 ގޭގެ ތެރެއިން 86 ގޭގެ މަސައްކަތް ވަނީ ނިމިފައި. ނިލަންދޫގެ 50 ގޭގެ ތެރެއިން 45 ގެ ވަނީ ނިމިފައި. ވިލިގިލީ 77 ގޭގެ ތެރެއިން 59 ގޭގެ މަސައްކަތް ވަނީ ނިމިފައި. މާމެންދޫ 84 ގޭގެ ތެރެއިން 51 ގޭގެ މަސައްކަތް ވަނީ ނިމިފައި" ޑރ. މުއިއްޒު ވިދާޅުވިއެވެ.
މިނިސްޓަރު ވިދާޅުވީ ނުނިމި ހުރި ގެތައް ނިންމުމަށް ވެސް ވަރަށް ގިނަ މަސައްކަތްތަކެއް ކުރެވެމުންދާ ކަމަށެވެ. އަދި ވިދާޅުވީ ސުނާމީއާއި ގުޅިގެން ގެދޮރު ގެއްލި ވަގުތީ ހިޔަލުގައި ދިރިއުޅޭ އެއްވެސް ރައްޔިތަކު މިހާރު ރާއްޖޭގެ އެއްވެސް ހިސާބެއްގައި ނުހުންނާނެ ކަމަށެވެ.