އެމެރިކާ އާއި އީރާނާ ދެމެދު މެދުކެނޑިފައިވާ ސުލްޙައިގެ ވާހަކަތައް އަލުން ފެށުމަށް މަގުފަހިކުރުމުގެ ގޮތުން، މެދުވެރިއެއްގެ ދައުރު އަދާކުރާ ޕާކިސްތާނުގެ އިންޓީރިއާ މިނިސްޓަރު މުހުސިން ނަގްވީ އީރާނުގެ ވެރިރަށް ތެހެރާނަށް ރަސްމީ ދަތުރުފުޅެއް ފައްޓަވައިފިއެވެ.
ހޮނިހިރު ދުވަހު ފެއްޓެވި ދެ ދުވަހުގެ މި ދަތުރުފުޅަކީ ސަރަހައްދީ ހަމަޖެހުން ޤާއިމުކުރުމަށް ޕާކިސްތާނުން ކުރަމުންދާ މަސައްކަތްތަކުގެ ބައެއް ކަމަށް އީރާނުގެ ދައުލަތުގެ މީޑިއާއިން ވަނީ ރިޕޯޓުކޮށްފައެވެ.
ތެހެރާނުން މުހުސިން ނަގްވީއަށް މަރުޙަބާ ދެންނެވީ އީރާނުގެ އިންޓީރިއާ މިނިސްޓަރު އެސްކަންދަރު މޯމެނީއެވެ.
މި ދަތުރުފުޅަކީ ޕާކިސްތާނުގެ ނުފޫޒުގަދަ އަސްކަރީ ވެރިޔާ ފީލްޑް މާޝަލް އާސިމް މުނީރު އީރާނަށް ކުރެއްވި ދަތުރުފުޅަށްފަހު، މާގިނަ ދުވަސްތަކެއް ނުވަނީސް ކުރެއްވި ދަތުރުފުޅެކެވެ. ޕާކިސްތާނުގެ މަސްދަރުތަކުން އަލް އަރަބިއްޔާ ނޫހަށް މަޢުލޫމާތު ދީފައިވާ ގޮތުގައި، މި ދަތުރުފުޅުގެ މައިގަނޑު އަމާޒަކީ ދެ ފަރާތް އެއްބަސްވާ ފަދަ ސުލްޙައިގެ ވަކި އޮނިގަނޑެއް އެކުލަވައިލުމެވެ.
​މި މަޝްވަރާތަކުގައި އެމެރިކާއިން ވަނީ އެ ޤައުމުން ހުށަހަޅާފައިވާ ބައެއް ކަންކަމަށް އީރާނުން ޖަވާބުދާރީވުމަށް އެދިފައެވެ. އަދި ހޮރްމޫޒް ކަނޑުއޮޅީގެ މައްސަލަތަކުގައި ކުރިއެރުންތަކެއް ލިބިފައިވާތީ، އެމެރިކާ އާއި އީރާނާ ދެމެދު މިވަގުތަށް ވަގުތީ އެއްބަސްވުމަކަށް އައުން ނޫން އިތުރު ގޮތެއް ނެތް ކަމަށް މަސްދަރުތަކުން ބުނެއެވެ.
ޕާކިސްތާނުން ދަނީ މި ދެ ޤައުމުގެ ދެމެދުގައި ވަރަށް ހަރަކާތްތެރި މެދުވެރިއެއްގެ ދައުރު އަދާކުރަމުންނެވެ. އެގޮތުން މިދިޔަ މަހުވެސް ދެ ޤައުމުގެ މަންދޫބުންގެ މެދުގައި މުހިންމު ބައްދަލުވުމެއް ޕާކިސްތާނުން ވަނީ އިންތިޒާމުކޮށްފައެވެ.
މިދިޔަ ފެބްރުވަރީ މަހުގެ 28 ވަނަ ދުވަހު އެމެރިކާ އާއި އިޒްރޭލުން އީރާނަށް ދިން ހަމަލާތަކާ ގުޅިގެން ފެށުނު ހަނގުރާމަ މެދުކެނޑިފައިވަނީ، އޭޕްރީލް މަހުގެ އަށްވަނަ ދުވަހުން ފެށިގެން ޤާއިމުކުރި ވަގުތީ ސުލްޙައިގެ އެއްބަސްވުމެއްގެ ދަށުންނެވެ. އީރާނުގެ ފޮރިން މިނިސްޓަރު އައްބާސް އަރާގްޗީ ހުކުރު ދުވަހު ވިދާޅުވީ، އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން މަޝްވަރާތައް ކުރިއަށް ގެންދަން ބޭނުންވާ ކަމުގެ މެސެޖުތަކެއް ލިބިފައިވާ ކަމަށެވެ.
ނަމަވެސް، އީރާނުގެ ޤާނޫނުހަދާ މަޖިލީހުގެ ރައީސް އަދި މަޝްވަރާތަކުގައި އިސްކޮށް އުޅުއްވާ މުޙައްމަދު ބާގިރު ޣަލިބާފް އަންގާރަ ދުވަހު އިންޒާރު ދެއްވީ، އީރާނުން ހުށަހަޅާފައިވާ 14 ނުކުތާގެ ސުލްޙައިގެ ހުށަހެޅުމަށް އެމެރިކާއިން އެއްބަސްވާން ޖެހޭނެ ކަމަށެވެ.
އީރާނުގެ ރައްޔިތުންގެ ޙައްޤުތައް ހިމެނޭ މި ހުށަހެޅުން ޤަބޫލުނުކޮށްފިނަމަ އެމެރިކާއަށް ނާކާމިޔާބީއާ ކުރިމަތިލާން ޖެހޭނެ ކަމަށް އޭނާ ވިދާޅުވިއެވެ. މީގެ ކުރިން ޓްރަމްޕް ވަނީ އީރާނުގެ ބައެއް ހުށަހެޅުންތަކަށް އިންކާރު ކުރައްވާފައެވެ. އެހެންކަމުން މިހާރު އޮތް ސުލްޙައިގެ އެއްބަސްވުން އޮތީ ވަރަށް ނާޒުކު ފައްތަރެއްގައެވެ.