އެމެރިކާގެ ރައީސް ޑޮނަލްޑް ޓްރަމްޕް، ޗައިނާގެ ރައީސް ޝީ ޖިންޕިންއާ ބައްދަލުކުރެއްވުމަށް އަންނަ މޭ މަހުގެ 14 އިން 15އަށް ބެއިޖިންއަށް ދަތުރެއް ކުރައްވާނެކަން ވައިޓް ހައުސްއިން އިއްޔެ ކަށަވަރުކޮށްދީފި އެވެ.
ކުރިން މި މަހުގެ ފަހުކޮޅަށް ތާވަލުކުރި މި ދަތުރު ފަސްކުރަން ޖެހުނީ އީރާނުގައި މިހާރު ހިނގަމުންދާ ހަނގުރާމައިގެ ސަބަބުންނެވެ.
ވައިޓް ހައުސްގެ ޕްރެސް ސެކްރެޓަރީ ކެރޮލީން ލީވިޓް ވިދާޅުވި ގޮތުގައި، ރައީސް ޓްރަމްޕްގެ ސަމާލުކަން މިވަގުތު އަސްކަރީ ހަރަކާތްތަކަށް ހުއްޓިފައިވާތީ، ދަތުރު ފަސްކުރުމަކީ ކޮންމެހެން ބޭނުންތެރި ކަމެކެވެ.
"މިފަދަ ހަނގުރާމަވެރި އޮޕަރޭޝަންތަކެއް ކުރިއަށްދާއިރު ރައީސް ގައުމުގައި މަޑުކުރެއްވުމުގެ މުހިންމުކަން ރައީސް ޝީ ގަބޫލުކުރައްވާ،" ލީވިޓް ވިދާޅުވި އެވެ.
މި ދަތުރު އާ ތާރީހަކަށް ތާވަލުކުރެވުނީ ހަނގުރާމަ ނިމުމަކަށް އަންނާނެ ކަމަށް ބެލެވޭތީތޯ ކުރެވުނު ސުވާލަށް ޖަވާބު ދެއްވަމުން ލީވިޓް އެކަން ދޮގުކުރެއްވި އެވެ. ނަމަވެސް، ސަރުކާރުގެ ލަފާކުރުންތަކަށް އިޝާރާތް ކުރައްވައި އޭނާ ވިދާޅުވީ، "އަޅުގަނޑުމެން އަބަދު ވެސް ލަފާކުރަނީ ގާތްގަނޑަކަށް ހަތަރެއް ނުވަތަ ހަ ހަފުތާގެ މުއްދަތެއް. އެހެންކަމުން އެ މުއްދަތަށް ބަލައިގެން އަންދާޒާ ކުރެވިދާނެ،" ކަމަށެވެ.
މިދިޔަ މަހުގެ 28ގައި އެމެރިކާ އާއި އިޒްރޭލު ގުޅިގެން އީރާނަށް ދޭން ފެށި ހަމަލާތަކާ އެކު ފެށުނު މި ހަނގުރާމައަށް މިހާރު ވަނީ މަހެއްވާން ގާތްވެފަ އެވެ. ވައިޓް ހައުސްއިން އޮޕަރޭޝަންތައް ކާމިޔާބުކަމާ އެކު ކުރިއަށްދާ ކަމަށް ބުނި ނަމަވެސް، ހަނގުރާމަ އަދިވެސް ދަނީ ވަރުގަދަކޮށް ކުރިއަށެވެ. 
މި ހަނގުރާމައިގެ ސަބަބުން ދުނިޔޭގެ ހަކަތައިގެ ބާޒާރަށް ވަނީ ބޮޑެތި ލޮޅުންތަކެއް އަރާފަ އެވެ. ވަކިން ހާއްސަކޮށް، ތެޔޮ އުފުލާ މުހިންމު މަގެއް ކަމަށްވާ ހޮރްމޫޒް ކަނޑުއޮޅި އީރާނުން ބަންދުކޮށްފައި އޮތުމުން އޭގެ ނޭދެވޭ އަސަރު ދަނީ ކުރަމުންނެވެ. އީރާނުގެ ތެލުގެ %80އަށް ވުރެ ގިނައިން ގަންނަ ޗައިނާއިން ވަނީ މަސްރަހު ފިނިކުރުމަށް ގޮވާލާފަ އެވެ.
ޗައިނާގެ ފޮރިން މިނިސްޓްރީގެ ތަރުޖަމާނު ލިން ޖިއާން ވިދާޅުވީ ހޮރްމޫޒް ކަނޑުއޮޅީގެ ނުތަނަވަސްކަމުގެ ސަބަބުން ބައިނަލްއަގުވާމީ މުދަލާއި ހަކަތައިގެ ވިޔަފާރިއަށް ބުރޫއަރާފައިވާ ކަމަށެވެ. އަދި ހުރިހާ ފަރާތްތަކަކުން ވެސް އަސްކަރީ ހަރަކާތްތައް ވަގުތުން ހުއްޓާލުމަށް އޭނާ ބާރުއެޅުއްވި އެވެ.
ކަނޑުއޮޅި އަލުން ހުޅުވުމަށް އެހީތެރިވުމަށް ރައީސް ޓްރަމްޕް ބެއިޖިންއަށް ހުށަހެޅުއްވި ނަމަވެސް، ޗައިނާއިން މިހާތަނަށް އެކަމަށް އިންކާރުކޮށްފައިވެ އެވެ.
އެމެރިކާގެ އެތެރޭގެ މަސްރަހަށް ބަލާއިރު، މި ހަނގުރާމައަށް އާންމުންގެ ބޮޑެތި ފާޑުކިޔުންތަކެއް ވަނީ އަމާޒުވެފަ އެވެ. ޕިއު ރިސާޗު ސެންޓަރުން ކުރި ދިރާސާއަކުން ދައްކާ ގޮތުގައި، އެމެރިކާގެ ރައްޔިތުންގެ %59 ގަބޫލުކުރަނީ އަސްކަރީ ބާރުގެ ބޭނުންކުރުމަކީ ނިންމި ނުބައި ނިންމުމެއް ކަމަށެވެ. އަދި %54 މީހުން ގަބޫލުކުރާ ގޮތުގައި، މި ހަނގުރާމަ މަދުވެގެން ހަ މަސްދުވަހަށް ދެމިގެންދާނެ އެވެ.
ބެއިޖިންގައި ބޭއްވުމަށް ހަމަޖެހިފައިވާ މި ބައްދަލުވުމުގައި، އީރާނުގެ މައްސަލައިގެ އިތުރުން، ޓްރަމްޕްގެ ރިޔާސަތުގައި ދެ ގައުމުގެ ދެމެދުގައި އުފެދުނު ވިޔަފާރީގެ ނުތަނަވަސްކަމާއި ޓެރިފްތަކާ ގުޅޭ ގޮތުން މަޝްވަރާކުރެވޭނެ ކަމަށް ބެލެވެ އެވެ.
މީގެ އިތުރުން، މިއަހަރުގެ ފަހުކޮޅު ރައީސް ޝީ ވޮޝިންޓަނަށް ކުރައްވާ ދަތުރެއްގައި ރައީސް ޓްރަމްޕް އޭނާއަށް މަރުހަބާ ވިދާޅުވާނެ ކަމަށް ވެސް ބެލެވެ އެވެ.