މި އަންނަ ހުކުރު ދުވަހު މާލޭގެ ބޮޑެތި ހުރިހާ މިސްކިތްތަކެއްގައި އިމާމުވެ ހުކުރު ކުރާނީ ޒުވާން ޚަތީބުން ކަމަށް އިސްލާމިކް މިނިސްޓްރީން މިއަދު ބުނެފި އެވެ.
މިނިސްޓަރު ޑރ. މުޙައްމަދު ޝަހީމް އަލީ ސަޢީދު މިރޭ ވިދާޅުވި ގޮތުގައި މި ހުކުރުގަައި އިސްލާމީ މަރުކަޒާއި ސަލްމާން މިސްކިތުގައި އަދި މާލޭގެ ބޮޑެތި ހުރިހާ މިސްކިތްތަކުގައި އިމާމުވެ ހުކުރުކުރާނީ ފާހަގަކޮށްލެވޭ އިލްމީ އަދި ރީތިކޮށް ކީރިތި ޤުރުއާން ކިޔަވާ ޒުވާން ޚަތީބުންނެވެ.
މި ފުރުސަތު އެ ޒުވާނުންްނަށް ދޭން ބޭނުންވަނީ އެ ކުދިންގެ ލީޑާޝިޕް ބަލައިގަންނަކަމާއި އިސްލާމީ ކަންކަން ހިންގުމާއި އިސްލާމީ ޚިދުމަތުގައި އެކުދީންނަށް އޮތް ފުރުސަތުގެ ތަނަވަސްކަން ޔަޤީންކޮށް ދިނުމާއި ރައީސް ޑރ. މުޙައްމަދު މުޢިއްޒު ޒުވާން ޖީލު ބިނާކުރެއްވުމަށް ފެއްޓެވި މަސައްކަތްޕުޅަށް ބާރު ދިނުމުގެ ގޮތުން ކަމުގައި ވެސް ވިދާޅުވި އެވެ.
ޒުވާން ޚަތީބުން ތަމްރީނު ކުރުމަށް އިސްލާމިކް މިނިސްޓްރީން ވަނީ ތިން ބުރެއްގެ މަތީން ޚާއްސަ ޕްރަގްރާމްތަކެއް ހިންގާފަ އެވެ. އެ ޕްރަގްރާމްތަކުން މިހާތަނަށް 503 ޚަތީބުން ވަނީ ތަމްރީނު ކޮށްފަ އެވެ. ސަރުކާރުގެ އަމާޒަކީ މި ދައުރުގައި 500 ޒުވާން ޚަތީބުން ތަމްރީނު ކުރުމެވެ.
މިހާރުވެސް މާލޭގެ އެކި މިސްކިތްތަކާއި އަތޮޅުތެރޭގެ އެކި މިސްކިތްތަކުގައި ޒުވާން ޚަތީބުން ދަނީ އިމާމުވެ ނަމާދު ކުރަމުންނެވެ. ހުކުރު ޚުތުބާ ދިނުމާއި އިމާމުވެ ތަރާވީޙު ނަމާދު ކުރުމުގައި ވެސް ޒުވާން ޚަތީބުން ދަނީ ހަރަކާތްތެރިވަމުންނެވެ.