އެސްޓީއޯއިން ވިއްކާ ޑީސަލާއި ޕެޓްރޯލްގެ އަގު އެ ކުންފުނިން ބޮޑުކޮށްފި އެވެ. މިއީ އެ ކުންފުނިން ވިއްކާ ތެލުގެ އަގު މިފަހުން މިހާ ބޮޑުތަނުން ބޮޑުކުރި ފުރަތަމަ ފަހަރެވެ. އެފްއެސްއެމް އިން ބުނީ މިއަދުން ފެށިގެން ޕެޓްރޯލް ލީޓަރެއް ގަންނަން ލިބޭނީ 16.01 ލާރިއަށްކަމަށެވެ. މީގެކުރިން ޕެޓްރޯލް ލީޓަރެއް ހުރީ 13:50 ލާރިއަށެވެ. އެހެންކަމުން މީ 2.51 ލާރީގެ ބޮޑު ވުމެކެވެ.އެސްޓީއޯއިން ތެލުގެ އަގުތައް ބޮޑުކޮށްފައި މި ވަނީ ދުނިޔޭގެ ބާޒާރުގައި ތެލުގެ އަގު މިވަގުތު އުފުލިފައި ވާތީ އެވެ. ދުނިޔޭގެ މާކެޓްގައި އެވްރެޖްކޮށް ސާފުނުކުރާ ތެޔޮ ފީފާއެއްގެ އަގު ވަނީ 81 ޑޮލަރަށް މިއަދު އަރައިފަ އެވެ.އެމެރިކާ އާއި އިޒްރޭލުން އީރާނަށް ދޭން ފެށި ހަމަލާތަކުގެ ރައްދުގައި އީރާނުން ވެސް ގެންދަނީ މެދުއިރުމަތީގައި ހުރި އެމެރިކާގެ އަސްކަރީ މަރުކަޒުތަކަށް އަމާޒުކޮށްގެން ހަމަލާދެމުންނެވެ. އެކަމާ ގުޅިގެން މެދުއިރުމަތީގެ ދަތުރުފަތުރުގެ ނިޒާމަށް ވެސް ވަނީ ވަރަށް ބޮޑަށް ހުރަސް އެޅިފަ އެވެ.މެދުއިރުމަތިން ތެޔޮ ސަޕްލައި ކުރަން ބޭނުންކުރާ މުހިންމު ޗެނަލެއް ކަމަށްވާ ހޮރްމުޒް ކަނޑުއޮޅި ވެސް އީރާނުން ވަނީ ބަންދުކޮށްފަ އެވެ. އެކަމާ ގުޅިގެން ތެލުގެެ އަގު އުފުލެން މިހާރު ވަނީ ފަށައިފަ އެވެ. ހަނގުރާމައާ ގުޅިގެން ތެލާއި ކާބޯތަކެތީގެ އަގު ކޮންޓްރޯލްކޮށް، ރާއްޖެއަށް ބޭނުންވާ މިންވަރަށް އެ ތަކެތި ލިބޭނެ އިންތިޒާމްތައް ހަމަޖައްސަމުންދާ ކަމަށް ސަރުކާރުން ކުރިން ވަނީ ބުނެފަ އެވެ.