ޕީއެންސީގެ ސަރުކާރުން މިހާރު ކުރަނީ، ޚުދުމުޚުތާރު ވެރިކަމަކާ ދިމާލަށް ރާއްޖެ ގެންދަން ކުރާ މަސައްކަތްތައް ކަމަށް އިދިކޮޅު އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ. ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއްކޮށްލުމާ ގުޅޭ ގޮތުން، ރައްޔިތުންގެ ފެންނަ ނުފެންނަ ވޯޓެއް އަންނަ އޭޕްރިލް މަހުގެ ހަތަރުވަނަ ދުވަހު ނަގަން ވަނީ ނިންމައިފައެވެ. މައި ދެ އިންތިޚާބު އެއްކޮށްލުމާ ދެކޮޅުކަން ފާހަގަކޮށް އެމްޑީޕީން ބޭއްވި ޖަލްސާގައި ޝާހިދު ވިދާޅުވީ، ކުރިއަށްއޮތް ލޯކަލް ކައުންސިލް އިންތިޚާބުގައި ވެރިކަންކުރާ ޕީއެންސީން ވާދަކޮށްގެން ނުވާނެކަމަށް ގަބޫލުކުރައްވާ ކަމަށެވެ. އެއީ، އިންތިޚާބުތަކުގައި ވާދަކުރަންޖެހޭނީ އެ އިންތިޚާބެއްގެ ކަންތައްތައް ގަބޫލުކުރާ ބައެއްކަމަށް ވާތީ ކަމަށާއި، ސަރުކާރުގެ އެ ޝަރުތު ހަމަނުވާ ކަމަށް އޭނާ ވިދާޅުވިއެވެ. އެގޮތުން ވެރިކަން ކުރާ ޕީއެންސީއަކީ ލާމަރުކަޒީ ނިޒާމު ގަބޫލުކުރާ ބައެއް ނޫން ކަމަށް ތުހުމަތު ކުރައްވައި ޝާހިދު ވަނީ، އެ ނިޒާމު ގަބޫލުނުކުރާ ބަޔަކު އިންތިޚާބުގައި ބައިވެރިވެގެން ނުވާނެ ކަމަށް ވިދާޅުވެފައެވެ. ފުޓްބޯޅަ މުބާރާތަކަށް ގޮވާލުމުން ކްރިކެޓް ޓީމަކުން ބައިވެރިއެއް ނުވާނެ. އެއީ އެކަން އޮންނާނެ ގޮތަކީ. ޕީއެންސީ ސަރުކާރަކީ، އެއްވެސް ގޮތަކަށް ލާމަރުކަޒީ ނިޒާމު ގަބޫލުކުރާ ބައެއް ނޫން. އެމްޑީޕީގެ ރައީސް އަބްދުﷲ ޝާހިދު ޝާހިދު ވަނީ ކައުންސިލްތަކަށް އެމްޑީޕީގެ ސަރުކާރުން ދީފައިހުރި ބާރުތައް އަނބުރާ ''މިނިސްޓްރީ އޮފް އެޓޯލްސް އެޑްމިނިސްޓްރޭޝަން'' އަކަށް މި ސަރުކާރުން ޖަމާކުރިކަމަށް ވިދާޅުވެފައެވެ. އަދި މިހާރު ކައުންސިލްތަކަށް ރަށްރަށުގެ ހޮޅިދަނޑީގައި ހުންނަ ބޮތްކެއް ވެސް ނެގޭނީ ހުއްދަ ނަގައިގެން ކަމަށް އޭނާ ވަނީ ވިދާޅުވެފައެވެ. ޝާހިދު ވިދާޅުވީ ޕީއެންސީ ސަރުކާރުގައި ލާމަރުކަޒުކުރުމުގެ ޒައްރެއްގެ މިންވަރު ވެސް ނެތް ކަމަށެވެ. އެހެންކަމުން "ފުޓްބޯޅަ މުބާރާތެއްގައި ކްރިކެޓް ޓީމަކުން ބައިވެރިނުވާނެ ފަދައިން" މި އިންތިޚާބުގައި ޕީއެންސީއިން ބައިވެރިވާނެ ކަމެއް ނެތް ކަމަށް އޭނާ ވަނީ ވިދާޅުވެފައެވެ. ޝާހިދު ވަނީ ރާއްޖޭގެ ރައްޔިތުންނަށް، ޕީއެންސީގެ ކެންޑިޑޭޓުންނަށް ވޯޓުނުދިނުމަށް ގޮވާލައްވައިފައެވެ. އެ ކެންޑިޑޭޓުންނަށް ވޯޓު ދީފިނަމަ ރާއްޖޭގައި ގާއިމްކުރަން ބޭނުންވާ ލާމަރުކަޒީ ނިޒާމާއި، އިދާރީ ދާއިރާތައް ލާމަރުކަޒީ އުސޫލުން ހިންގާނެ ގޮތް ބަޔާންކޮށްފައިވާ ގާނޫނުއަސާސީގެ އަށްވަނަ ބާބު ނެތިގެންދާނެ ކަމަށް އޭނާ ވިދާޅުވިއެވެ. މި ރާއްޖޭގައި މި އޮތް ޑިމޮކްރެޓިކް ނިޒާމު ފުނޑާލުން ނޫން އެހެން އެއްވެސް ވިސްނުމެއް މި ސަރުކާރަކު ނެތް. މި ސަރުކާރުން އަޅުގަނޑުމެން ބޮޑުތަނުން ބުނަން ޖެހޭނީ ނޫނެކޭ. އެމްޑީޕީގެ ރައީސް އަބްދުﷲ ޝާހިދު ކައުންސިލް އިންތިޚާބުގައި ޕީއެންސީއިން ބައިވެރިވާން ނުޖެހޭނެކަމަށް ޝާހިދު ވިދާޅުވިއިރު، ޕީއެންސީގެ ޕީޖީ ލީޑަރު އިބްރާހީމް ފަލާހު މީގެ ކުރިން ވަނީ، ކައުންސިލާއި ޑަބްލިޔުޑީސީން ގާތްގަނޑަކަށް 800 ނުވަތަ 900 ގޮނޑި އެ ޕާޓީއަށް ކާމިޔާބު ކުރެވޭނެ ކަމަށް ވިދާޅުވެފައެވެ. ކައުންސިލް އިންތިހާބުގައި ލޯކަލް ކައުންސިލްތަކަށް 678 މެންބަރުން އިންތިޚާބުކުރާއިރު، އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށް ވެސް 678 އިންތިޚާބުކުރަންޖެހެއެވެ. އެހެންކަމުން އެ އިންތިޚާބުގައި ޖުމްލަ 1,356 މެންބަރުން އިންތިޚާބުކުރާނެއެވެ.