ސަޢޫދީ ޢަރަބިއްޔާއަކީ ތަރައްޤީގެ މަސައްކަތުގައި އިސް ބައިވެރިއެއް ކަމަށް މިނިސްޓަރ އޮފް ފޮރިން އެފެއާޒް ޑރ. ޢަބްދުﷲ ޚަލީލް ވިދާޅުވެއްޖެއެވެ.
ފޮރިން މިނިސްޓަރު އެކްސްގައި ކުރެއްވި ޕޯސްޓެއްގައި ވިދާޅުވީ ސަޢޫދީ ޢަރަބިއްޔާގެ މިނިސްޓަރ އޮފް ފޮރިން އެފެއާޒް، ޕްރިންސް ފައިސަލް ބިން ފަރްހާންއާ އެކު ބިނާކުރަނިވި މަޝްވަރާތަކެއް ކުރެއްވުމަކީ ލިބުނު ވަރަށް ޚާއްސަ ޝަރަފެއް ކަމަށެވެ.
އަދި ދެބޭފުޅުން ބޭއްވި ބައްދަލުކުރެއްވުމުގައި ދެޤައުމުގެ ދެމެދުގައި އޮތް ޒަމާންވީ ތާރީޚީ ގުޅުން އިތުރަށް ބަދަހިކުރެއްވުމުގެ މުހިންމުކަމުގެ މައްޗަށް އަޅުއްވާލައްވާފައިވާ ކަމަށެވެ.
ސަޢޫދީ ޢަރަބިއްޔާގެ ސަރުކާރަކީ ތަރައްޤީގެ މަސައްކަތުގައި އެންމެ އިސް ބައިވެރިއެއް ކަމަށާއި ސަޢޫދީ ޢަރަބިއްޔާއިން އަބަދުވެސް ދިވެހި ރައްޔިތުންނަށް ދެއްވާ ޚާއްޞަ އިސްކަމަށްޓަކައި މިނިސްޓަރު ވަނީ ޝުކުރު އަދާކުރައްވާފައެވެ. އަދި ދެޤައުމުގެ ގާތް ރަޙްމަތްތެރިކަމުގެ ގުޅުން އިތުރަށް ބަދަހިކުރެއްވުމަށް މަސައްކަތްކުރައްވާނެކަމުގެ ޔަޤީންކަންވެސް ވަނީ ދެއްވާފައެވެ.
މި ބައްދަލުކުރެއްވުމުގައި ރާއްޖެއާއި ސައުދީ އަރަބިއްޔާއާ ދެ ގައުމުގެ ދެމެދު ވިޔަފާރީގެ ދާއިރާއިން ގުޅުން ބަދަހިކުރުމާއި ރާއްޖޭގައި ސައުދީ އިންވެސްޓްމަންޓްތައް އިތުރުކުރުމަށް ކުރެވިދާނޭ ކަންކަމާ ގުޅޭގޮތުން ވެސް މި ދަތުރުފުޅުގެ ތެރެއިން މިނިސްޓަރު، ސައުދީ އަރަބިއްޔާގެ މިނިސްޓާ އޮފް ކޮމާސް ޑރ. މާޖިދު ބިން އަބްދުﷲ އަލް ގަސާބީއާއެކުމަޝްވަރާ ކުރެއްވިއެވެ.