ޔޫރަޕިއަން ޗެމްޕިއަންސް ލީގު ފުޓްބޯޅަ މުބާރާތުގެ ޕްލޭއޯފްގައި ވަރުގަދަ ރެއާލް މެޑްރިޑާއި މެންޗެސްޓާ ސިޓީ ވާދަކުރަން ޖެހިއްޖެ އެވެ.
މުބާރާތުގެ އެންމެ ކާމިޔާބު ޓީމު ސްޕޭނުގެ ރެއާލް އާއި ސިޓީ ވާދަކުރަން ޖެހުނީ ގަދަށް އަށް ޓީމުގެ ތެރޭގައި ލައްވާ ނުލުމުން ނުވަ ވަނަ ޓީމާއި 24 ވަނަ ޓީމުގެ މެދުގައި މިއަދު ނެގި ގުރަށް ފަހު އެވެ.
މި ދެ ޓީމު ކުޅެގެން މޮޅުވާ ޓީމެއް ގަދަ 16 ޓީމުގެ ބުރުގައި ކުއާޓާ ފައިނަލަށް ދިއުމަށް ވާދަކުރަންޖެހޭނީ ސްޕޭނުގެ އެތްލެޓިކޯ މެޑްރިޑާއި ޖަރުމަނުގެ ބަޔާ ލެވަކޫސަން ކުރެ ޓީމަކާ އެވެ. ރެއާލް މިވަގުތު ސްޕޭން ލީގުގެ އެއްވަނާގައި އޮތަސް ސިޓީ ވަނީ މި ސީޒަނުގައި ވަރަށް ބޮޑަށް އަޑިއަޅާލައިފަ އެވެ. ޕްލޭއޯފުން ޖާގަ ލިބުނީ ވެސް ގްރޫޕް ސްޓޭޖުގެ ފަހު މެޗުން މޮޅުވެގެންނެވެ.
ޕްލޭއޯފް މެޗުތައް ކުޅޭނީ ފެބްރުއަރީ މަހުގެ 11 ވަނަ ދުވަހާއި 18 ވަނަ ދުވަހު އެވެ. ފުރަތަމަ މެޗު ކުޅޭނީ ސިޓީގެ އިއްތިހާދު ސްޓޭޑިއަމުގަ އެވެ. ރެއާލްގެ ސެންތިއާގޯ ބާނަބައުގައި ކުޅޭނީ ފަހު މެޗެވެ.
ޕްލޭއޯފައިގައި ފްރާންސްގެ ޕީއެސްޖީ ވާދަ ކުރަން ޖެހުނީ އެ ގައުމުގެ ބްރެސްޓް 29އާ އެވެ. ބެލްޖިއަމްގެ ކްލަބް ބްރޫޖް ވާދަކުރާނީ އިޓަލީގެ އެޓްލާންޓާއާ އެވެ. އެޓްލާންޓާ އަކީ ހުސްވި ސީޒަނުގެ ޔޫރޮޕާ ލީގުގެ ޗެމްޕިއަނެވެ.
އިޓަލީގެ ޔުވެންޓަސް ވާދަކުރާނީ ނެދަލޭންޑްސްގެ ޕީއެސްވީއާ އެވެ.
ފްރާންސްގެ މޮނާކޯއާ ބައްދަލުކުރާނީ ޕޯޗުގަލްގެ ބެންފީކާ އެވެ. ޖަރުމަނުގެ ބޮރޫޝިޔާ ޑޯޓްމުންޑް ވާދަކުރާނީ ޕޯޗުގަލްގެ ސްޕޯޓިން ލިޒްބަނާ އެވެ. ސްކޮޓްލޭންޑްގެ ސެކްޓިކް ނުކުންނާނީ ޖަރުމަނުގެ ވަރުގަދަ ޓީމު ބަޔާން މިއުނިކާ ދެކޮޅަށެވެ. އިޓަލީގެ އޭސީ މިލާން ވާދަކުރާނީ ފޭނޫޑާ އެވެ.
މި ފަޖަހުގެ ޗެމްޕިއަންސް ލީގުގައި ގަދަ 16ގެ ކުރިން ޕްލޭސޯފް ބުރެއް ކުޅެން ޖެހުނީ މުބާރާތުގެ ފޯމެޓަށް ބޮޑު ބަދަލެއް ގެނައުމުންނެވެ. މި ގޮތުން މި ފަހަރު ހަމަޖައްސާފައިވަނީ ހޯމް އެންޑް އަވޭ އުސޫލު އުވާލައި ކޮންމެ ޓީމެއް ވެސް ގްރޫޕް ސްޓޭޖުގައި އަށް މެޗު ކުޅޭ ގޮތަށެވެ. އޮޓެމެޓިކުން ގަދަ 16 އަށް ދާގޮތަށް ހަމަޖައްސާފައިވަނީ ގްރޫޕް ސްޓޭޖް ނިމޭއިރު އެންމެ ގިނަ ޕޮއިންޓް ހޯދާ އަށް ޓީމެވެ.
މި އަށް ޓީމުގެ ގޮތުގައި ހިމެނުނީ އެއްވަނަ ހޯދި އިނގިރޭސިވިލާތުގެ ލިވަޕޫލް އާއި ދެ ވަނަ އަށް ދިޔަ ސްޕޭނުގެ ބާސެލޯނާ އާއި ފްރާންސްގެ ލިލް އާއި އިނގިރޭސިވިލާތުގެ އެސްޓަންވިލާ އާއި ސްޕޭނުގެ އެތްލެޓިކޯ މެޑްރިޑާއި ޖަރުމަނު ބަޔާ ލެވަކޫސަން އާއި އިނގިރޭސިވިލާތުގެ އާސެނަލް އާއި އިޓަލީގެ އިންޓަމިލާނެވެ.